Dagsê liewe Vriende,
Die dag het weer met my weggehardloop, maar ek is dankbaar vir alles om my en bo alles my gesondheid. Ek sal eerlik wees, vanoggend toe ek wakker word was my eerste wens dat ek daar in my ou Namakwaland kan wakker word waar die blomme nou so pragtig staan. Tog is ek dankbaar vir die paar in my tuin. Ek hoop almal het die Vader se oorvloed die naweek geniet.
Vanoggend in my stiltetyd lees ek twee gedeeltes, en dit val my op dat dit so mooi by mekaar aansluit, net so reg soos ons Vader ons in sy Woord leer as ons bereid is om te leer.
Die eerste gedeelte kom uit 1 Korintiërs 10:13
Dit handel oor versoekings in ons lewe. Eerstens is versoekings nie van God nie, maar Hy laat dit toe om ons te vorm. Verder is daar die belofte van hierdie vers.
1 Korintiërs 10:13Geen versoeking het julle aangegryp behalwe 'n menslike nie; maar God is getrou, wat nie sal toelaat dat julle bo julle kragte versoek word nie; maar Hy sal saam met die versoeking ook die uitkoms gee, sodat julle dit sal kan verdra.
Daar is dus geen belofte dat ons as kinders van God net ‘n baie mooi en reguit pad sal hê nie, maar wel dat God wanneer die vyand ons aanval en al hierdie dinge oor ons pad bring daar sal wees om ons daardeur te help.
Dan kom ek by die tweede gedeelte Jakobus1:2-4. Dit gaan oor wat die doel van hierdie versoekings is.
Jakobus 1:2My broers, julle moet baie bly wees wanneer allerlei beproewings oor julle kom, 3want, soos julle weet, as julle geloof die toets deurstaan het, stel dit julle in staat om te volhard. 4En die volharding moet end-uit volgehou word sodat julle tot volle geestelike rypheid kan kom, sonder enige tekortkoming.
Ons Vader wat ons deur dit help, laat dit toe om ons geloof en afhanklikheid van Hom te versterk. Dus as ons bereid is om aan ons Vader vas te hou, Hom te raadpleeg as ons in hierdie beproewinge is, toe laat dat Hy ons daardeur help, sal ons elke keer makliker daar deur kom.
Ons sal later weet, hierdie is net ‘n molshoop, en glad nie ‘n berg nie, want ons God is groter. Ons moet net vasstaan in ons geloof, deur die goeie en die slegte tye. So raak ons uitdagings ons oorwinnings in Christus.
Geen opmerkings nie:
Plaas 'n opmerking