Goeiemôre Vriende,
In Windhoek nog ‘n betrokke dag, maar nie koud nie. Lente is oral sigbaar, nuwe blaartjies, botsels, blommetjies, te wonderlik die nuwe lewe.
Wat my vanoggend weer opval toe ek so in my tuin werskaf, is: Maak nie saak wat ons omstandighede, watter uitdagings om besig is om in ons lewens te woed nie, God se goedheid bly en is oral sigbaar. Hoe moeilik dit ook al vir ons mag wees, moet ons Hom vertrou vir alles.
In Psalm 146 spreek Dawid dieselfde gedagtes uit. Hy noem dat God altyd getrou is, altyd daar is, altyd daar sal wees. Die mense, jou vriende, jou familie, is dalk vandag daar en môre nie. Mense is te besig, mense het hulle eie lewens, maar God sal altyd daar wees, altyd help.
PSALMS 146
God die enigste ware helper.
1HALLELUJA! Loof die Here, o my siel!
2 Ek wil die Here prys solank as ek lewe; ek wil psalmsing tot eer van my God solank as ek nog daar is.
3 Vertrou nie op prinse, op die mensekind, by wie geen heil is nie.
4 Sy gees gaan uit, hy keer terug na sy aarde toe; op daardie dag is dit met sy planne gedaan.
5 Welgeluksalig is hy wat die God van Jakob het as sy hulp, wie se hoop is op die Here sy God,
6 wat hemel en aarde gemaak het, die see en alles wat daarin is; wat trou bly tot in ewigheid;
Dan kry jy daardie situasies waar jy weet geen mens sal jou kan help nie, daar is nie ‘n oplossing wat ‘n mens jou kan gee nie, net God kan.
Ons moet Hom net ons permanente Helper maak, onvoorwaardelik vertrou met alles in ons lewens. Maklik? Nee, nie maklik vir ons mense nie, maar met die hulp van Sy Heilige Gees kan dit maklik wees. Hy het ons in niks alleen gelaat nie en sal ook nooit nie.
Daardie probleem wat jy vandag het, waaruit jy nie kan kom nie, waarmee niemand jou kan help nie – gee dit vir God – Hy kan.
Geen opmerkings nie:
Plaas 'n opmerking