Hier is Windhoek is die weer sowaar vandag so tussen die boom en die bas. Die son wil skyn, maar sukkel, die windjie roer saggies aan die blare, nog koud, nog warm. Gelukkig is ek hier om dit te kan beleef.
Vanoggend luister ek na een van die pastore van wie ek ‘n oggend oordenking ontvang. Hy getuig van twee wonderwerke wat God hierdie naweek in sy teenwoordigheid vir mense gedoen het. Dinge wat menslik onmoontlik was, maar wat vir God moontlik is en nadat hulle God aangeroep het, was Hy dadelik daar.
Hy noem dat ons soms bid vir ‘n deurbraak, maar voor ons nog amen gesê het reeds besluit het, dit gaan nie gebeur nie, of dit is nie moontlik nie. Ons meet vir God die Almagtige aan ons menslike standaarde.
PSALMS 145
Lofpsalm op die grootheid en goedheid van God.
1 'n LOFLIED van Dawid.
Alef. o My God, o Koning, ek wil U verhoog en u Naam loof vir ewig en altyd.
2 Bet. Elke dag wil ek U loof en u Naam prys vir ewig en altyd.
3 Gimel. Die Here is groot en baie lofwaardig, en sy grootheid is ondeurgrondelik.
4 Dalet. Die een geslag prys u werke by die ander, en hulle verkondig u magtige dade.
5 He. Ek wil spreek van die glans van u heerlike majesteit en van u wonderbare dade.
6 Wau. En hulle sal spreek van die krag van u vreeslike dade, en u grootheid wil ek vertel.
7 Sajin. Hulle sal die gedagtenis van u grote goedheid laat uitstroom en jubel oor u geregtigheid.
8 Get. Genadig en barmhartig is die Here, lankmoedig en groot van goedertierenheid.
9 Tet. Die Here is vir almal goed, en sy barmhartighede is oor al sy werke.
10 Jod. Al u werke loof U, o Here, en u gunsgenote prys U.
11 Kaf. Hulle maak melding van die heerlikheid van u koninkryk en spreek van u mag,
12 Lamed. om aan die mensekinders sy magtige dade bekend te maak en die glansryke heerlikheid van sy koninkryk.
13 Mem. U koninkryk is 'n koninkryk van alle eeue, en u heerskappy duur deur al die geslagte.
14 Samek. Die Here ondersteun almal wat val, en Hy rig almal op wat neergeboë is.
15 Ajin. Die oë van almal wag op U, en U gee hulle hul spys op die regte tyd.
16 Pe. U maak u hand oop en versadig alles wat lewe met welbehae.
17 Sade. Die Here is regverdig in al sy weë en goedgunstig in al sy werke.
18 Kof. Die Here is naby almal wat Hom aanroep, almal wat Hom aanroep in waarheid.
19 Resj. Hy vervul die wens van die wat Hom vrees, en Hy hoor hul hulpgeroep en verlos hulle.
20 Sjin. Die Here bewaar almal wat Hom liefhet, maar Hy verdelg al die goddelose.
21 Tau. My mond sal die lof van die Here uitspreek, en laat alle vlees sy heilige Naam loof vir ewig en altyd.
Net daarna lees ek uit my Bybelstudiegids, en die boodskap is dieselfde – Hou aan God vas – is die opskrif.
In Psalm 116 vertel Dawid hoe God hom gered het in ‘n tyd waarin hy reeds die dood in die oë gestaar het.
Psalm 116
Ek het die Here lief
1Ek het die Here lief,
want Hy verhoor my smeekgebede.
2Hy het na my geluister toe ek Hom aangeroep het.
3Bande van die dood het my omsluit,
doodsangs het my aangegryp,
ek het benoud en bekommerd geword.
4Toe het ek die Naam van die Here aangeroep:
“Here, red my tog!”
5Die Here is genadig en regverdig,
ons God ontferm Hom oor ons.
6Die Here beskerm die hulpeloses:
ek was magteloos, maar Hy het my gered.
7Ek moet nou tot rus kom,
die Here het goed aan my gedoen:
8U het my van die dood gered,
U het 'n einde gemaak aan my trane,
U het gesorg dat ek nie weer struikel nie.
9Ek kon voor die Here bly wandel
in die land van die lewendes.
10Ek het in U bly glo,
selfs toe ek gedink het dit is klaar met my
11en toe ek in my vertwyfeling besef het:
ek kan op geen mens staatmaak nie.
Hier noem Dawid drie dinge wat veral vir my uitstaan:
Dat God na hom geluister het;
Dat hy geglo het toe hy God aangeroep het;
En dat hy op geen mens kon staatmaak nie.
Ek dink dit moet die kern van ons gebede wees. Wanneer jy met God oor jou probleem praat, moet jy weet Hy hoor jou. Daarna moet jy onvoorwaardelik glo dat Hy Almagtig is en jou onmoontlike situasie vir Hom niks is om te verander nie. En die een wat eintlik heel eerste moet kom – ons kan op mense nie vertrou, ons hoop op hulle nie bou nie.
Nader vandag tot ons Vader, praat met Hom oor daardie probleem, stuk ongelukkigheid, siekte, wat ook al dit mag wees, glo en weet dat Hy tot alles in staat is.
Ons Vader is ‘n liefdevolle Vader en wil sy kinders gelukkig sien.
Geen opmerkings nie:
Plaas 'n opmerking