Die woorde van jou mond

Goeiemôre Vriende,

Nog ‘n pragtige, helder sonskyn dag uit ons Vader se hand. Die luggie knyp soggens, maar deur die dag is dit heerlik warm.
Vanoggend het dit my opgeval dat twee van die drie pastore waarna ek luister uit verskillende skrifte dieselfde boodskap gehad het. Dit beteken dat dit beslis die boodskap is wat ons almal vandag moet hoor en oordink en krag daaruit put.
Soms is daar reuse voor ons, soms is ons omstandighede oorweldigend. Soms wag ons op uitkoms en dit lyk nie of ons Vader ons hoor nie. Dawid het definitief meer uitdagings, meer vyande, meer beproewinge as ons gehad.
In hierdie Psalm kom hy en hy kyk vir ‘n oomblik terug. Wat sien hy? Hy sien en onthou hoe God hom in die verlede bygestaan het. Hoe God hom nooit alleen gelaat het nie. Hoe God daar was om alles te laat uitwerk.
Psalm 143
5 Ek dink aan die dae uit die voortyd; ek peins oor al u dade; ek dink ná oor die werk van u hande.
6 Ek brei my hande tot U uit; my siel dors na U soos 'n uitgedorde land. Sela.
7Verhoor my tog gou, Here: my gees beswyk! Verberg u aangesig nie vir my nie, sodat ek nie word soos hulle wat in die kuil neerdaal nie.
8Laat my u goedertierenheid in die môre hoor, want op U vertrou ek; maak my bekend die pad wat ek moet gaan, want ek hef my siel op tot U.
9Red my van my vyande, Here! By U skuil ek.
Hy sien nie net die ontelbare dinge en situasies waaruit God hom gered het nie, maar ook verklaar hy sy afhanklikheid en bevestig dat hy net op ons Here sal vertrou om ook die situasie waarin hy nou is op te los vir hom.
Hoe kan hy so seker wees? Hy kan, want dit wat agter is, getuig van God se getrouheid in sy lewe. So is dit ook in ons eie lewens, as ons sou agtertoe kyk na die dinge wat ons Vader vir ons gedoen het, sal ons ook soos Dawid seker weet, dat ons God ook hierdie situasie waarin ons nou is sal en kan oplos.
Paulus kom in Handelinge 26, waar hy in die tronk is en die koning hom kans gee om sy saak te stel.
Handelinge 26:1 Agrippa sê toe vir Paulus: “Jy kan maar jou saak stel.”
Wat het Paulus te sê gehad? Het hy ‘n klomp redes aangevoer hoekom hulle hom moet vrylaat?
Nee, dit is nie wat hy met hierdie geleentheid wat hy gekry het gedoen het nie. Hy vertel sy lewens-getuienis vir die koning. Hy vertel waar en hoe God hom kom uithaal en red het. Hy vertel dat sy God daar was en altyd daar sal wees vir hom. Dat hy baie seker is dat sy Vader hom ook uit hierdie situasie sal red.
Wat doen ons as ons die kans kry om ons self te verdedig? Gee ons ‘n klomp leë verskonings? Of getuig ons oor die dinge wat ons God al in ons lewens vir ons gedoen het, met die seker wete Hy sal ons nooit alleen laat nie?
Vandag moet ons ophou verskonings maak vir situasies in ons lewens. Vandag moet ons begin om vir ons kinders, ons vriende, wie ook al wil luister of ons konfronteer ons getuienis te gee van God se goedheid en trou in ons lewens.
Ja, ons God is nie ‘n kitsoplossing nie. Tog is Sy tydsberekening altyd honderd persent perfek. Eer God met jou getuienis, loof en prys Hom, al lyk alles om jou heel uit plek. Hy was nog altyd daar, maar nog meer, Hy sal ook altyd daar wees as jy elke dag met jou hand in syne wandel.
Jy mag dalk in die rotsskeur vas gevang wees, maar God kan jou steeds laat blom.