Kruisdraers

Goeiemôre Vriende,

‘n Pragtige lente dag hier in Windhoek soos dit al van laas week af was. So lekker dat ek my wintersklere vir somersklere verruil het en dit sê baie want hierdie Namakwaland-kind kry vinnig koud. In my tuin sien ek ook die lente, gesiggies blom, anemone blom, irisse blom en grasangeliere blom lustig. So helde en so vrolik, dan is ek nog geseënd met voëltjies wat graag hier by my kuier, en luister ek na hulle geselskap.
Ek hoop almal het die naweek ‘n kans gehad om te rus en die pragtige veld en blomme daar in my hartland te waardeer. Dit klink my daar by julle is die winter traag om te groet. Bly asseblief warm en gesond, die lente is om die draai.
Vanoggend lees ek uit Timoteus en hy was soos al die manne wat ons Vader gebruik het om sy Woord te boekstaaf, ‘n baie wyse man. Hy gesels oor hoe dit soms vir ons lyk dat dit met die goddeloses so goed gaan en dat ons kruisdraers soos ons Heiland moet wees.

2 Timoteus 3
Laaste opdrag aan Timoteus
10Maar jy het my nagevolg in leer, lewenswandel en lewensdoel, in geloof, geduld, liefde en volharding, 11in vervolging en ontbering soos my te beurt geval het in Antiogië, Ikonium en Listra. Watter vervolging moes ek nie alles verduur nie! Maar die Here het my uit almal gered. 12Almal wat in Christus Jesus toegewy aan God wil lewe, sal ook vervolg word. 13Maar goddelose mense en bedrieërs sal voortgaan van kwaad tot erger. Hulle mislei ander en word self mislei.
14Maar jy, bly by wat jy geleer het en wat jy vas glo. Jy weet tog wie jou leermeesters was 15en jy ken van kleins af die heilige Skrif. Dit kan jou die kennis bybring wat tot verlossing lei deur die geloof in Christus Jesus. 16Die hele Skrif is deur God geïnspireer en het groot waarde om in die waarheid te onderrig, dwaling te bestry, verkeerdhede reg te stel en 'n regte lewenswyse te kweek, 17sodat die man wat in diens van God staan, volkome voorberei en toegerus sal wees vir elke goeie werk.

Timoteus was ‘n man deur ons Vader uitgekies om ‘n gedeelte van die Bybel te skryf, hy was ‘n profeet wat in die weë van ons Vader gewandel het en die evangelie uitgedra het.
Tog skryf hy hier, dat selfs hy, nie leiding en swaarkry vrygespring het nie. Hy noem ook dat dit mag lyk dat die goddelose net lekker lewe, maar net hulself bedrieg.
Die antwoord is in vers 17, dat ons voorbereid en toegerus kan wees om Jesus se opdrag om dissipels kan maak kan uitvoer en dat ons soos ons Heiland ook kruisdraers kan wees. Hy het immer die swaarste kruis gedra vir ons.
Ja ons sal vervolging beleef, ons sal teenkanting beleef, ons sal selfs verwerp en verstoot word vir ons geloof in Christus, maar Hy het ons reeds met die hoogste prys vergoed – vergewing van sondes as ons dit bely, en die ewige lewe as ons streef om in gehoorsaamheid van sy woord te leef.
Baie male hoor jy mense sê: Daar is nie ‘n handleiding hoe om reg te leef nie. Dit is ‘n leuen! Daar is die beste handleiding – die Bybel. Jy moet dit net lees en toepas met die hulp van ons Vader se Gees binne jou.
Mooi loop op hierdie Maandag.