Goeiedag Vriende,
Ek hoop julle het almal die naweek die blomme geniet. Hier by ons is die weer heerlik, en ons kla nie al weet ons dit is nog nie Lente nie. Dit gee ons iets om na vooruit te kyk.
Vandag is ons bemoediging uit die baie bekende Matteus 6. Veral vir hierdie tyd waarin alles byna onbekostigbaar duur geraak het. As jy gaan kruideniersware koop, het alles so duur geword, dat jy byna nie kans sien om dit in jou mandjie te sit nie, tog moet ons eet. Vir my wat al baie, baie jare in Windhoek bly is dit steeds moeilik om vir vrugte en groente sulke verskriklike bedrae te betaal. Ek het groot geword tussen die vrugteboorde en groente was daar enige soort wat jy aan kon dink in ons eie groentetuin.
Tog kom Jesus in Matteus 6 en maan ons om Hom te vertrou vir ons voorsiening, een dag op ‘n slag.
Die sorge van die lewe
(ook Luk. 12:22-34)
25“Daarom sê Ek vir julle: Moet julle nie bekommer oor julle lewe, oor wat julle moet eet of drink nie, of oor julle liggaam, oor wat julle moet aantrek nie. Is die lewe nie belangriker as kos en die liggaam as klere nie? 26Kyk na die wilde voëls: hulle saai nie en hulle oes nie en hulle maak nie in skure bymekaar nie; julle hemelse Vader sorg vir hulle. Is julle nie baie meer werd as hulle nie? 27Trouens, wie van julle kan deur hom te bekommer sy lewe met een enkele uur verleng? 28En wat bekommer julle julle oor klere? Let op hoe groei die veldlelies: hulle swoeg nie en hulle maak nie klere nie. 29Maar Ek sê vir julle: Selfs Salomo in al sy prag was nie geklee soos een van hulle nie. 30As God dan die gras van die veld, wat vandag nog daar is en môre verbrand word, so versier, hoeveel te meer sal Hy dan nie vir julle sorg nie, julle kleingelowiges?
31“Julle moet julle dus nie bekommer en vra: ‘Wat moet ons eet of wat moet ons drink of wat moet ons aantrek?’ nie. 32Dit is alles dinge waaroor die ongelowiges begaan is. Julle hemelse Vader weet tog dat julle dit alles nodig het. 33Nee, beywer julle allereers vir die koninkryk van God en vir die wil van God, dan sal Hy julle ook al hierdie dinge gee.
34“Moet julle dus nie oor môre bekommer nie, want môre bring sy eie bekommernis. Elke dag bring genoeg moeilikheid van sy eie.”
‘n Gedeelte wat ek glo elke kind van God ken. Steeds bekommer ons elke dag ons oor presies die dinge waarvan Jesus hier praat. Ons vertrou liewer op ons eie insig en eie planne.
Dit is vir my so mooi as Jesus vra: 27Trouens, wie van julle kan deur hom te bekommer sy lewe met een enkele uur verleng?
Dink ‘n bietjie terug aan toe jy nagte en nagte wakker gelê het en jou lê en verknies het oor jou bekommernisse. Het jou slapeloosheid jou enigsins gehelp om die probleem op te los?
Ons besef ons het ‘n probleem, die eerste ding wat ons doen is om paniek-mode in te gaan. Of ‘n klomp mense te bel en hulle daarvan te vertel. Wat het ons bereik? Niks!
Juis daarom is die volgende vers so treffend: 30As God dan die gras van die veld, wat vandag nog daar is en môre verbrand word, so versier, hoeveel te meer sal Hy dan nie vir julle sorg nie, julle kleingelowiges?
Moet ons dan leeglê en niks doen nie? Nee, allermins. Ons doen wat ons hande vind om te doen, rustig en verder bid ons en vertrou ons God in die wete dat ons vir Hom baie meer werd is as die gras of die lelies van die veld.
Kom ons hardloop nie altyd alles vooruit nie. Probeer nie altyd ons eie situasie beheer nie, maar los dit in die Een wat ons liefhet, wat nie sluimer of slaap nie en wat ons nooit in die steek sal laat nie. Onvoorwaardelike vertroue en liefde, dit is al wat Hy van ons vra.
Geen opmerkings nie:
Plaas 'n opmerking