Wat is jou afgod?

Goeiedag Vriende,
Ek het eers met my dierbare vriendin gekuier vandag, maar steeds het ek glad nie van julle vergeet nie. Of sal ek sê van die handvol wat gereeld met my gesels vergeet nie. Ek is dankbaar vir elkeen se geselsie, en hoop alles gaan goed daar by julle.
Vanoggend lees ek die bekende gebeurtenis van Daniel se vriende in die Woord. ‘n Verhaal wat ons almal baie goed ken. Maar net om die geheues te verfris – die koning laat bou ‘n massiewe goue beeld en sy opdrag is dat as enige musiekinstrument speel, die hele volk daarvoor moet buig en dit aanbid. Daniel se vriende, Saderag, Mesag en Abadnego weier omdat hulle ons lewende Vader God Drie-enig aanbid. Hulle word in die vuuroond gegooi en God stuur sy engel om hulle te beskerm. Die mooiste deel is vir my dat toe hulle uit die vuur kom, hulle nie eers na vuurrook geruik het nie.
My vraag vandag is: Buig jy jou voor afgode neer?
Ek hoor ook die antwoord: Nee, Marsofine, nee!
Wel laat ons bietjie van nader daarna kyk. Rook jy? Gebruik jy meer as gereeld alkohol? Hou jy aan jou bankbalans vas asof jou lewe daarvan afhang? Is daardie 4x4 bakkie van jou darem iets wat jy net nie kans sien om iemand ander mee te laat ry nie? Is daardie man of vrou in jou lewe die een wat bepaal of jy Sondagoggend kerk toe gaan?
Ek kan aanhou met die lys vrae, daar is nog baie. As die antwoord op enige van hierdie ja is, het ons probleme. Afgode is nie net gou beelde nie, afgode is enigiets in jou lewe, waarop jy meer tyd spandeer, waarvoor jy nie kans sien om van ontslae te raak nie.
Hoeveel tyd spandeer ons om Bybel te lees, om met God ons Vader te praat, om te bid, om dankie te sê? Wanneer laas het jy meer as tien minute met jou God op ‘n slag spandeer? Met Hom jou hart gedeel soos wat jy dit met jou beste vriend doen? Met Hom gepraat en hom gevra wat sy wil vir jou lewe is? Vir Hom uit jou hart dankie gesê vir alles waarmee Hy jou elke dag seën?
Die bybelsemense het voor mensgemaakte afgode gebuig wat gesien kan word, maar buig ons nie steeds voor mensgemaakte afgode wat nie gesien kan word nie?
Kom ons ondersoek elkeen ons harte, en wees baie, baie eerlik met onsself. God ken reeds die antwoord, Hy is net te ‘n gentleman om ons daaraan te herinner. Kom ons kry die gesindheid van ‘n Saderag, Mesag en Abadnego – om hul knie voor geen ander as die lewende God te buig nie.