Van smeltkroes na oorvloed!

Môre, môre Vriende,

Snaakse weer vanoggend hier by ons. Eers betrokke en toe kom die sonnetjie so floutjie uit en die windjie begin gesels.
Vanoggend is die verse wat ek graag met julle wil deel Psalm 66:10-12:
10Want U het ons getoets, o God, U het ons gelouter soos 'n mens silwer louter.
11U het ons in die net gebring, 'n swaar las op ons heupe gelê.
12 U het mense oor ons hoof laat ry; ons het in die vuur en in die water gekom, maar U het ons uitgelei in die oorvloed.
Geen belofte van net voorspoed nie. Net soos goud en silwer gelouter word, deur ‘n baie harde proses gaan voor die gesuiwer is om by hulle beste waarde uit te kom, so ook moet ons gelouter word.
Hoekom?
Dink bietjie terug aan Jesus se tyd op aard. Jesus, een van die Drie-eenheid, self God. Hy is verwerp, Hy is as leuenaar uitgemaak, Hy is deur satan versoek, Hy is nie aanvaar as die Christus nie, maak nie saak hoeveel tekens en wonder Hy gedoen het nie, Hy het die kruisweg alleen gestap en gesterf dat ons kan leef.
Wie is ons, dat ons elke dag vra – hoekom ek Here? Ons wil alles net op ‘n skinkbord kry en aanhou om ongehoorsaam te wees, aanhou om te sondig, aanhou om die wêreld eerste te stel en te aanbid, en net wanneer ons benoud raak, gryp ons na God.
Dit is gelukkig nie al wat hierdie vers ons leer nie. In die tweede deel - maar U het ons uitgelei in die oorvloed – is God se wonderlike belofte van oorvloed vir ons.
Oorvloed laat jou dadelik dink aan geld in die bank …
Nee, oorvloed is nie net finansieel nie. Wat van die oorvloed van jou gesondheid, die oorvloed van jou mense om jou, die oorvloed van jou mense wat vir jou werk, die oorvloed van die oes wat God gegee het, die oorvloed van vrede waarmee jy elke aand kan gaan rus, wetende dat God jou probleme oplos terwyl jy slaap.
Vriende julle sien, ons dien ‘n God van liefde. Net soos ons ons kinders moet tugtig om hulle te leer om op die regte pad te bly en verantwoordelike volwassenes te word, so moet ons Vader ons ook leer.
God se belofte is nie dat jou pad sonder dorings sal wees nie, maar nog steeds belowe Hy jou oorvloed as jy dit saam met Hom stap.
Wie van ons het enige deel daaraan dat ons Namakwaland se vlaktes, heuwels en berge oortrek is met blomme prag? Nie een nie! Steeds deel ons in die oorvloed van die oes.


Dankie vir die gebruik van Rensche Verwey se pragtige foto.