Windstil en heerlik, my eerste renonkel het oopgegaan en is wit, pragtig.
Wanneer kom ons uitkoms en oorwinning?
So baie kere is daar groot bekommernisse in ons lewens. Dit laat ons wakker lê en moeg opstaan, flou deur die dag gaan. Ons dink ons brein so suf, maar ‘n oplossing het ons nie.
Ons maak allerhande planne, probeer hulle self, maar niks wil werk nie. Die probleem bly daar. Moeg en gedaan bid ons dan daaroor. Ongeduldig neem ons dit net weer terug die volgende dag en begin weer woed daarmee.
Wat sê ons Vader daarvan in Psalm 147?
Psalm 147
10Hy het geen welbehae in die krag van die perd, geen welgevalle in die bene van die man nie.
11Die Here het 'n welgevalle in die wat Hom vrees, wat op sy goedertierenheid hoop.
In normale taal beteken dit: God word nie beïndruk as jy as mens op jou eie krag staat maak nie, Hy het soek jou onvoorwaardelike vertroue alleen op Hom.
Hy wag vir jou om oor te gee, te erken dat jy tot niks in staat is as dit nie deur Sy krag is nie. Vir jou om jou vaste vertroue in Hom te stel dat Hy alleen jou bekommernisse en uitdaging kan oplos in Sy Almag en Hy wil dit ook doen.
Ja, die mensdom wil ons laat glo dat daar nie plek is vir swakkelinge op aarde nie. Dat jy jou ding moet doen. Dat jy nie afhanklik moet wees nie. Net mooi die teenoorgestelde van wat God van ons vra.
Afhanklikheid van God is geensins swakheid nie. Jy sal dit ook net regkry as jy elke dag baie, baie nou met ons Drie-Enige God wandel. In jou eie krag sal jy nooit God onvoorwaardelik kan vertrou nie, net deur die leiding van die Heilige Gees.
Onthou dat die vyand jou fokus van God probeer weg neem. Dat hy jou probeer besig hou met kommer, en beproewing en alles wat hy kan kry. Moet jou nie deur sy leuens laat mislei nie.
Die waarheid is en sal altyd wees: Ons dien ‘n God wat ALLES KAN en alles vir ons Sy kinders wil. Ons moet net oorgee, elke dag oorgee.
Ek deel graag met julle ‘n lied wat dit so mooi sê van Monique Spamers – luister gerus na die woorde. https://www.youtube.com/watch?v=Rcb90pX6osQ
Geen opmerkings nie:
Plaas 'n opmerking