Vriende, dit is al na middag, tog wil ek kom groet. Hierdie dag het begin met ‘n koue wind wat waai hier in Windhoek, ek dink die Kapenaars het hulle koue wind vir ons gestuur. Nou is dit egter heerlik en die sonskyn.
Soms kom ons op ‘n plek, of geleentheid aan en daar is niemand wat ons ken nie. Ons kyk rond, maar sien niemand wat ons ken of groet nie. Dan voel ons so half verlore, so half of ons nie daar hoort nie.
Soms voel jy net geestelik en emosioneel so eensaam. Glo jy daar is niemand wat jou raak sien of omgee nie.
Ons as mense wil graag in ‘n omgewing wees waar ons iemand ken, waar ons met iemand kan gesels, of kan voel iemand sien jou raak.
Dawid was ook daar toe hy Psalm 142 geskryf het.
Psalm 142
5Ek sien uit na regs en kyk, maar daar is niemand wat my ken nie; die toevlug is vir my verlore; niemand vra na my nie.
6Ek roep U aan, o Here! Ek sê: U is my skuilplek, my deel in die land van die lewendes.
Oor die jare het ek geleer om alleen te wees. Om gelukkig te wees as ek alleen is. Om besig te wees as ek alleen is. Of selfs om gelukkig te wees al het ek niks om te doen nie. Ek is na jare se oefening, tuis in my eie vel en huis – stoksielalleen.
Dit waarheid is egter dat nie jy of ek ooit alleen sal wees nie. Soos Dawid moet ons net besef dat ons skuilplek nie by mense moet wees nie. Ons moet nie ons geluk en energie van ander mense kry nie, maar van God.
Dikwels het ek al gehoor en ek glo jy ook – ek is ‘n mense mens, ek moet mense om my hê om te kan funksioneer. Ek stem nie daarmee saam nie – was daar nog ‘n paar ander baba’s wat saam met jou gebore is op presies dieselfde uur? Is jy seker dat wanneer jy eendag jou laaste asem uitblaas daar ‘n hele magdom mense gaan wees?
Nee, vir seker nie. Wat jy wel kan weet is God sal daar wees, altyd.
Hou ek daarvan om met mense te gesels? Ja, ek hou baie daarvan. Ek het onlangs terwyl ek op Johannesburg lughawe was, met ‘n oom begin gesels wat van Amerika af in SA kom jag het. Ek het heerlik met hom gesels oor trofeejag omdat ek vir jare in trofeejag gewerk het.
So ek in sak en as gewees het as ek nie hom gehad het om mee te gesels nie? Nee, want ek het ‘n boek by my gehad wat ek sou lees.
Ons geluk, vrede, en afhanklikheid moet net van God wees – die mens is soos die wind – vandag daar en môre het hulle iemand anders waarmee hulle liewer tyd wil spandeer.
Bou jou geluk, vrede, en afhanklikheid rondom die Een wat altyd daar is, altyd luister, nooit te besig is nie, nooit jou sal wegstuur nie, nooit sal ophou om jou lief te hê nie.
Geen opmerkings nie:
Plaas 'n opmerking