Goeiemôre Vriende
Lekker vars oggend in Windhoek. Wind stil. Ek is opgewonde, want ek gaan bietjie by die Kwekery rondloop tussen al die plante, bome en blomme. Julle behoort teen nou my goed genoeg te ken om te weet dat ek daar in my element is.
Vanoggend lees ek 1 Petrus 3
13Wie sal julle kwaad aandoen as julle julle beywer vir wat goed is? 14Maar selfs as julle sou ly omdat julle doen wat reg is, moet julle dit as 'n voorreg beskou. Moenie vir mense bang wees of julle laat afskrik nie. 15In julle harte moet daar net heilige eerbied wees vir Christus die Here. Wees altyd gereed om 'n antwoord te gee aan elkeen wat van julle 'n verduideliking eis oor die hoop wat in julle lewe. 16Maar doen dit met beskeidenheid en met eerbied vir God. Sorg dat julle gewete skoon bly, sodat dié wat julle oor julle goeie lewenswandel in Christus belaster, daaroor skaam kan kry dat hulle kwaad van julle gepraat het. 17As dit die wil van God mag wees dat julle moet ly wanneer julle goed doen, is dit beter só as om te ly wanneer julle kwaad doen.
18Ook Christus het een maal vir die sondes gely, die onskuldige vir die skuldiges, om julle na God te bring, Christus wat as mens doodgemaak is, maar deur die Gees lewend gemaak is. 19En so het Hy na die geeste in die gevangenis gegaan en daar sy oorwinning aangekondig.
Uit hierdie gedeelte in die Woord leer ons, dat selfs ons Koning, Jesus Christus lyding moes verduur. Ons weet reeds dat die lyding wat Hy moes verduur glad nie vergelyk kan word met wat ons as lyding sien nie. Sy lyding was bo ons verstand se begrip. Hy het gely vir mense wat hardkoppig en ongehoorsaam was en steeds is nadat Hy hierdie offer gebring het.
Dit leer ons ook dat deur lyding ons karakter gevorm word. Dit laat ons ‘n bitter klein insig kry van wat Jesus vir ons opgeoffer het en deur gegaan het. Tog is ons nooit alleen in ons lyding nie, Hy hou ons hand, hy dra ons deur, en as ons anderkant uitkom is ons sterker in geloof en nader aan Hom.
Wanneer vertrou ons iemand? Net wanneer ons gesien het dat daardie persoon werklik sy/haar woord gestand doen. Is dit nie ook hoe ons met Jesus handel nie? Ons moet net onthou, Hy is nie ‘n mens wat vir ons sal jok nie. Sy woord en beloftes staan vas tot aan die voleinding van die wêreld.
Hou op twyfel of God by magte is om jou deur jou bekommernisse en lyding te kan bystaan en deur dra. HY KAN!
Geen opmerkings nie:
Plaas 'n opmerking