Môre, môre Vriende,
Ek was reeds in my tuin om te sien of my nuwe blomme-kindertjies wat ek gister geplant het gelukkig is. Hulle is heel gelukkig. Ek moet nou maar my eie Namakwaland hier om my probeer herskep, al sal ek dit in my hele lewe nie reg kry nie. Steeds is die blomme in my tuin balsem vir my blomme-siel.
Waaroor gesels ons vanoggend uit ons Vader se woord? Ons gesels heel dikwels oor die feit dat swaarkry ons nader aan ons Vader bring, ons laat besef hoe afhanklik ons van Hom is. Beteken dit dan dat as die altyd goed met ons gaan, ons nie naby aan ons Vader is nie?
In Johannes 16 is Jesus besig om sy dissipels voor te berei op sy kruisiging, tog is dit ook ‘n woord wat vandag nog steeds waar is.
Johannes 16: 33Dit sê Ek vir julle, sodat julle vrede kan vind in My. In die wêreld sal julle dit moeilik hê; maar hou moed: Ek het die wêreld klaar oorwin.”
Selfs hier maak Hy seker dat sy dissipels sal verstaan dat die lewe op hierdie aarde nie maanskyn en rose sal wees nie. Tog is daar mense wat dit altyd mee goed gaan, mense wat gelowig is, mense wat Jesus as hul verlosser aangeneem het.
Die geheim is eerstens om jouself en jou omstandighede nie met die van ander te vergelyk nie. Ons is uniek, en elkeen van ons maak ons eie keuses, wat soms veroorsaak dat ons paaie oor rotse en berge en baie gevaarlike terreine gaan. Tog na elke oorwinning het ons iets geleer, iets waarmee ons iemand wat later deur dieselfde gaan kan bemoedig. Want hoe bemoedig jy iemand wat ‘n kind verloor as jy nog nie self ‘n kind verloor het nie?
Die persoon waarmee dit altyd goed gaan, staan baie meer die gevaar om weg van God te beweeg. Om op eie krag te begin staat maak. Om te begin glo hulle het nie God nodig nie. Om te vergeet dat alles wat hulle wel het, van God is.
Die persoon waarmee dit altyd goed gaan moet dus baie hard werk daaraan om naby God te bly. Steeds elke dag in hulle voorspoed te besef, hulle voorspoed kom net van God. Voorspoed is nie noodwendig geld nie, voorspoed is ook gesondheid, kinders wat presteer en nie skeeftrek en hul met nonsens ophou nie. ‘n Man of vrou wat jou liefhet en by jou staan. Daardie oes wat suksesvol is.
As ons so na hierdie dinge kyk, is dit nie een iets wat jy vir jouself kan bewerk nie, net deur die guns en genade van ons Vader.
Daarom as dit met jou goed gaan, bly naby jou Vader. Kyk na ander deur Sy oë, help waar jy kan, wys jou dankbaarheid in die een taal wat God ons almal gegee het – die taal van liefde en omgee.
Net soos die blomme in ‘n tuin voor ‘n armmanshuis blomme bly en nie minder mooi is omdat hulle nie voor ‘n rykmanshuis staan nie, net so is God se liefde dieselfde vir ons almal. So as jou neus vandag in die lug is omdat jy glo jy is beter as ander of jy het meer as ander, laat sak maar daardie neus – dit is genade uit God se hand.
Geen opmerkings nie:
Plaas 'n opmerking