Waarmee is ons besig?

Vriende, ‘n hartlike goeiemôre uit Windhoek. Ek weet nie of julle nog koud kry nie, maar wat ek wel weet is dat my hart na die Namakwalandvlaktes hunker waar ons Vader gesaai het in oorvloed en die blommeprag die rante en vlaktes kleur in reënboog kleure.
Hoe lekker sal dit nie vir my wees om daar te gaan rondry en by elkeen te stop waarmee ek op die groep gesels nie, ‘n koppie koffie te drink en die dankbaarheid en vrede van ons Namakwaland te aanskou.
Vanoggend word ek aangepraat deur Johannes 8.

Johannes 8:48Die Jode het toe vir Hom gesê: “Ons het mos gesê jy is 'n Samaritaan en van die duiwel besete!”
49Jesus het geantwoord: “Ek is nie van die duiwel besete nie, maar Ek eer my Vader, en julle doen My oneer aan. 50Ek soek egter nie na eer vir Myself nie; daar is Een wat eer vir My soek, en Hy is regter. 51Dít verseker Ek julle: As iemand my woorde ter harte neem, sal hy in alle ewigheid nooit sterwe nie.”

Dit is Jesus self wat hier praat. Niks het verander vandat hierdie woorde geskryf is nie. Vandag nog doen ons as God se kinders Hom oneer aan.
Hoe?
Al het Hy ons van sy liefde en genade verseker, dat niks ons ooit uit sy hand kan ruk nie:
Bekommer ons ons daagliks oor dinge van hierdie wêreld;
Is ons steeds ongeduldig as ons vir iets vra as ons dit nie gou genoeg kry nie;
Vertrou en glo ons baie keer nie dat God ons kan help nie;
Is ons male sonder tal ondankbaar oor die vele seëning wat Hy ons gee;
Beperk ons Sy Almag en krag deur te vergeet dat Hy die Skepper van die heelal is en niks vir hom onmoontlik is nie;
Maak ons telkens staat op ons eie insig en krag en soms ook die van ander en nie op Sy wonder werkende krag nie;
Daar is sekerlik nog baie wat ons kan opnoem. Dit het net weer vir my duidelik geraak dat ons as mense nie die Almag, die krag die soewereiniteit van ons Vader verstaan nie.
Raak vir ‘n sekonde stil en dink aan hoeveel mense op die hele aarde is – ja ek weet jy kan jou verstand nie daarom kry nie. Nou, dink verder, ons Vader, die Drie-Enig-God – ken elkeen persoonlik, al ken hulle Hom nie. Verder het Hy elkeen lief, verder versorg Hy elkeen.
Hoe moeilik is dit soms om net na jou eie huishouding se mense om te sien liggaamlik en geestelik? Kry jy ‘n kykie van hoe ALMAGTIG ons Vader is?
Die is dieselfde Vader waarop ons nie wil onvoorwaardelik vertrou en ons lewe onvoorwaardelik aan Hom wil oorgee nie?
Ek kan net vir myself vra – is daar iets fout met my verstand as ek so onverantwoordelik optree? Wie dink ek is ek om te glo dat my mikro probleempies nie deur die Almagtige God opgelos kan word nie?
Dit het tyd geword dat ons gaan stilsit en met behulp van die woord en die Heilige Gees gaan kyk wie ons God is en wat Sy kapasiteit is – miskien sal ons dan bereid wees om ons lewe algeheel aan Hom oor te gee.
Mooi naweek en mooi loop daar deur die blomme.