Totale afhanklikheid van God.

Beste Vriende,

Hier in Windhoek is dit ‘n heerlike sonskyn dag. Ek het nou geheel en al in my tuin ingevaar en my bome en struike gesnoei, want hulle begin dan al bot. Ek weet die winter is nog lank nie met ons klaar hier nie. Hier kry ons wat die Duitsers noem die drie Eisheiligen. Daar is niks heilig aan nie glo my, behalwe dat laat in September wanneer Lente al begin het, en alles al besig is om te bot, daar drie onmoontlike koue dae kom wat die arme plante baie skade kan aandoen. Dankbaar dat ons Vader alles weer herstel.
Vanoggend se geselsie gaan oor ons afhanklikheid van God. Maar hoe baie van ons weet en besef hoe afhanklik ons van God is?
Ons lees in Matteus 5:3 Salig is die wat arm van gees is, want aan hulle behoort die koninkryk van die hemele. 1953 Vertaling
Die eerste vraag wat ons vra as ons hierdie vers in die 1953 vertaling lees is: Wat beteken arm van gees nou eintlik, en val ek dan in daardie kategorie?
‘n Heel relevante vraag. Ek het bietjie gaan oplees oor die verskil in die twee vertalings van 1953 en 1983.
Die term het sy oorsprong in die tyd toe daar baie rykes, rykes, middelklas, armes en slawe was. Die eerste drie klasse het oorvloed of genoeg gehad, maar die laaste twee klasse is onderdruk en het nie geweet waar hulle volgende dag se voorsiening vandaan sal kom nie. Dus was hulle die twee klasse wat baie goed geweet het op wie hulle moet vertrou en onvoorwaardelik afhanklik was van God.
Is dit nie nog vandag net so relevant nie? Is dit nie so as dit goed gaan met ons en ons het oorvloed vergeet ons ontsaglik maklik hoe ons daaraan gekom het en wie ons daarmee geseën het nie?
Daarmee gee ek geensins te kenne dat alle mense wat oorvloed het, nie hulle afhanklikheid van ons Vader besef nie, maar die teorie is waar.
Dit is verander in die 1983 vertaling na ‘wat weet hoe afhanklik’. Steeds moet jy eers besluit om God onvoorwaardelik te vertrou met ALLES in jou lewe, voor jy onder hierdie klas kan val.
Matteus 5:3 “Geseënd is dié wat weet hoe afhanklik hulle van God is, want aan hulle behoort die koninkryk van die hemel. 1983 Vertaling
Dus blyk dit uit vandag se teks vir my dat dit baie meer voordelig is om ‘n tekort aan wêreldsgoed te hê en van die begin af te weet, God sorg vir dit wat ek nodig het en meer. Sy voorsiening vir ons is nie die krummels nie, maar die ‘beker wat oorloop’ waarin daar gepraat word in ons bekende Psalm 23.
Mag ons dan net vra vir dit wat ons môre nodig het? Nee, jy mag ook jou drome met hom deel. By my is dit tans ‘n besoek aan my geliefde Namakwaland terwyl die blomme so oor die berge, vlaktes en heuwels pronk. Tog moet ons nie vergeet dat Hy nooit vir ons iets sal gee wat hy weet ons kan skade doen nie, daarom moet ons onthou om te vra in Sy wil.
Hoe lyk dit om afhanklik van ons Vader te wees?
Dit begin by jou wat jou nie vaskyk aan die geld in jou beursie of jou bankrekening nie. Jy wat jou nie vaskyk in die yskas wat daar nie veel in is nie. Jy wat jou nie vaskyk aan die droë aarde van jou plaas nie. Jy wat jou nie vaskyk in jou buurman se nuwe bakkie, trekker, of sy vrou se nuwe Mercedes nie.
Wat is die ewigheidswaarde van dit?
Wanneer jy op God begin vertrou vir elke dag, elke week, elke maand, elke jaar se voorsiening, sal Hy jou wys wat jou deel is om te doen. Nie dat Hy nodig het vir jou om iets te doen vir Hom om vir jou te voorsien nie, maar hoe anders sal ons gehoorsaamheid leer.
Ons het soveel minder nodig as wat ons en die wêreld ons wysmaak. Ek het groot geword, soos ek glo baie van julle, met kerse, olie lampe en ‘n AGA stoof vir warm water en kos maak. Wat is daarmee verkeerd? Op die aarde niks nie. Ons het net te gemaklik geword, en dit het ons al hoe verder van ons Vader afgeneem.
Soms word ek aan afhanklikheid herinner as ek dink aan die boere van Namakwaland, Boesmanland en selfs die druiwe boere langs die Olifantsrivier. As dit nie reën nie, gebeur niks. Tog oorleef hulle al vir jare en jare en is gelukkig.
Laat ons elke asemteug, elke tree, elke stukkie kos en al ons ander behoeftes aan ons Vader oorgee in die wete, niemand van ons het nog ophou asemhaal nie, en dit kom net van Hom. Laat ons in algehele afhanklikheid van ons Vader, die Almagtige wat hemel en aarde in ses dae geskape het leef.