Môre Vriende,
Die week het al weer om gevlieg, maar ons kla niks, want ons is gesond en geseënd.
Vanoggend kyk ek na ‘n video van ‘n vrou uit Amerika en haar storie tref my diep.
Sy vertel van ‘n jongmeisie wat op pad was om saam met haar vriendinne vir die aand te gaan partytjie hou. Haar moeder vra haar toe om ‘n paar houers met eiers by haar tante af te laat omdat dit op haar pad is. Sy stem toe in, kyk na haar motor en sê: “Ek sal dit maar in die kattebak moet sit, want die kar is vol van my vriendinne. Sy maak toe ook so.
Haar moeder, ‘n gelowige vrou, bid toe saam met haar en toe sy amen sê vra: “My kind neem tog vir God saam met jou?”
Die meisie kyk weer na haar motor wat vol is met haar vriendinne en antwoord: “Dan sal Hy maar in die kattebak saam met die eiers moet sit, want in die motor is daar nie plek nie.”
Sy vertrek toe. Later die aand ontvang die moeder ‘n oproep. “Jammer mevrou, jou dogter was in ‘n ongeluk, hulle is almal oorlede. Wat egter baie snaaks is, al is die motor heel ‘n wrak, daar is eiers in die kattebak, nie een van hulle het eers gebreek nie!”
Dadelik onthou sy haar dogter se woorde: “Dan sal God maar in die kattebak saam met die eiers moet sit, want in die motor is daar nie plek vir Hom nie.”
Waar sit God in jou lewe? Waar sit Hy in jou huwelik, jou werk, jou omgang met vriende? Is jou lewe ook so vol dat daar nie plek is vir Hom nie en Hy maar die plekkie in die kattebak by die eiers moet neem?
Miskien is dit hierdie naweek die tyd vir jou om daaroor te gaan besin – te gaan besluit of jy Hom die plek agter jou motor se stuurwiel gaan gee, die plek in jou huwelik, die plek saam met jou by jou werk, die plek reg langs jou as jy met vriende omgaan. Die belangrikste plek!
Onthou eiers het nie siele nie, maar ons het – sorg dat God die regte plek in jou lewe inneem, altyd, want spyt kom altyd te laat.
Geen opmerkings nie:
Plaas 'n opmerking