My woorde

 
Die son het heeldag geslaap
die wolke verveeld rond gehang
en reën het ons almal verras
met 'n vroeë skou
saam met dit alles
het my woorde weggeloop
soos 'n onnutsige boklam
hul eie rigting ingeslaan
sonder 'n plan
net die pad gevat
en voort geneuk
waarheen
of tot waar
het ek geen benul
maar ek weet vir vandag
is hul moeg om te
doen soos ek wil
so laat ek hul maar los
om te bokspring en te val
net waar hulle wil
môre sal ek hul
weer in mooi
formasies rankskik
om almal te behaag
soos ons Vader beskik
miskien het hul net vir vannag
daar onder die sterre
tussen die blomme
van my ou Namakwaland
gaan rus
om môre te verskyn
met mooie kleure
en soete geure
net soos die blomme prag
so vir nou
rus maar sag
ons Vader hou ook
oor jul die wag.
(c) Marsofine Krynauw