Leef in vrede, wees geseënd.

Dagsê Vriende,

Hier bly dit so snaaks betrokke, en glo dit as julle wil daar het selfs gister namiddag tien druppels geval. Dit is nie koud nie, net betrokke. Dit voel byna asof ek nou in Swakopmund by die see bly. Wat kan ek in elke geval anders as dankbaar wees. Die week is besig om uit te loop en my groot taak is byna voltooi.
Waaroor gesels ons vandag? Wat moet ons doen om die seën van die Here te ontvang?
Die sleutel is in Psalm 133. Ek plaas die hele kort treffende Psalm hier.

As broers eensgesind saam woon
1'n Pelgrimslied. Van Dawid.
Hoe goed, hoe mooi is dit
as broers eensgesind saam woon!
2Dit is soos reukolie
wat van die kop af in die baard afloop,
die baard van Aäron,
af tot by die soom van sy klere.
3Dit is soos die dou van Hermonberg
wat op die berge by Sion val.
Waar broers so saam woon, skenk die Here sy seën:
'n lang, lang lewe.

In hierdie Psalm sien ons dat ons Vader se hart eensgesindheid, vrede, harmonie is. As ons dit nou besef, vra ons wie is ons broer?
Ons broer is nie net ons familie nie, dit begin by jou familie in die gemeente, jou vriende, jou familie. God se hart is dat ons met almal vrede sal handhaaf. Hierdie is nie die enigste plek in die Woord wat daarna verwys word nie.

ROMEINE 12:18 AFR83
As dit moontlik is, sover dit van julle afhang, leef in vrede met alle mense.

GALASIËRS 5:22-23 AFR83
Die vrug van die Gees, daarteenoor, is liefde, vreugde, vrede, geduld, vriendelikheid, goedhartigheid, getrouheid, nederigheid en selfbeheersing. Teen sulke dinge het die wet niks nie.

it is so belangrik vir ons Vader dat dit deel van die vrug van die Gees is. God se belofte in Psalm 133:3b - Waar broers so saam woon, skenk die Here sy seën:
'n lang, lang lewe.

Dieselfde Gees wat in ons woon, God self, sal ons bystaan, ons raad gee, ons help – so ons hoef dit nie alleen te probeer nie. Om in vrede met mense te leef vra dat jy van gister sal vergeet, dat jy elke dag nuut sal begin, soos wat God met ons doen as ons hom vra om ons oortredinge te vergeef. Ons moet ook gister se verskille agter los, want wat kan dit aan vandag verander as jy dit bly saamdra, behalwe om jou van jou vrede en die seën van jou Vader te beroof.
Gaan jy dit verder toelaat dat onmin en twis en verskille jou weghou van die volle seën van jou Vader? Hy seën jou daagliks met baie dinge, maar daardie seën kan jy in soveel groter maat ervaar as jy in vrede en liefde met jou medemens, jou broer, jou vriende leef. Liefde is mos die grootste gebod en God is mos Liefde?