Die Jesus-manier

Goeiemôre Vriende,
‘n Stil, koue winters oggend. Vanoggend was ek voeg uit die vere, tog dankbaar vir warm klere en ‘n koppie koffie met beskuit. Nou nie daardie lekker boerbeskuit wat julle eet nie, maar tog.
Vanoggend wil ek gesels oor ons manier van optrede as christene en hoe ons dit behoort te doen.
Ons leef in ‘n wêreld waar jy wanneer jy by die voordeur uitstap te doen kry met dinge wat jou omkrap. Party mense selfs wanneer hulle hul oë oop maak. Dinge is dalk nie reg tussen jou en jou lewensmaat, of jou kinders nie. In die omgewing om jou gee iemand dalk ‘n mening waarmee jy nie saamstem nie, of sê iets van jou waarvan jy nie hou nie. Tussen die jongmense wat nog wild en wakker is, kan manne selfs handgemeen raak soms omdat hulle voel die ander persoon het hulle te na gekom.
Daar is baie dinge wat kan verkeerd gaan as ons nie naby Jesus, en in Sy voetspore loop nie. Almal loop nie daarin nie, maar dit is ons wat daarin probeer loop se plig om die regte keuse te maak hoe om op te tree.
Hoekom? Dit is die storie van die boom wat aan sy vrugte geken word. Hoe jy optree sal vir ander vertel of jy besig is om te probeer in Jesus se spore stap.
As jy wanneer jy kwaad of geïrriteerd is ook vloek en skel en iemand wil moker, reflekteer jy definitief nie Jesus se doen en late nie.
As jy ook kwaadpraat van die persoon wat oor jou kwaadpraat, is jy beslis ook nie besig om soos Jesus op te tree nie.
As jy die persoon wat jou skade berokken ook probeer skade berokken, val jy ook uit die bus.
So sal ek kan aangaan. Is dit maklik? Nee, beslis nie, maar ons hoef dit mos nie alleen te doen nie. Ek plaas hier onder ‘n skakel na ‘n liedjie van Phil Wickham, hy sing dit so mooi. ‘I will do it the Jesus way’ – en dan sit hy dit so mooi uiteen.
https://www.youtube.com/watch?v=4Fhv4arL3yk
Om ons te help, kan ons die dag begin met Jesus. Voor ons by die voordeur uit loop, voor ons die huismense groet wat ons dalk ontstel. Vra Hom om jou te wys, te lei deur Sy Gees. Voor jy ‘n uitspraak maak, tel tot tien, en as jy moet, tot twintig. Woorde dra krag en dit wat jy spreek kom gewoonlik soos ‘n boomerang terug na jouself toe.
Wanneer jy in ‘n situasie kom wat aksie verwag, vir net ‘n stonde, dink gou wat Jesus in jou skoene sou gedoen het.
Ons het vele voorbeelde waar Hy te na gekom was, en hoe Hy opgetree het. Hy was mens, het deur al die versoekings en probleme gegaan waardeur ons gaan, en daarom weet Hy wat ons deurgaan uit persoonlike ondervinding.
Met Jesus se hulp, kom ons kies elke dag die Jesus-manier. Dit is Sy beeld wat ons skade doen as ons dit op ons eie manier aanpak.
© Marsofine Krynauw

Samesyn

 

Wat is daar beter

om die koue te verdryf

as geeltong vlamme van ‘n vuur

en die nektaar van die druif

samesyn

wyl jy die donker rooi vloeistof

in jou mond

volrond

spoel

die koestering van die hitte

oor jou arms en lyf voel

langs jou jou maat

deur goed en deur kwaad

binne in jou

‘n dankbare hart

vir samesyn

met vlamme en wyn

en genade in groot maat

uit ‘n Vader hart

wat net oorvloed ken.

© Marsofine Krynauw

 

Middag Vriende, uit ‘n koue Windhoek. Die weervoorspellers was reg, dit was -1 vanoggend en ek probeer nog ontdooi. Steeds is ons dankbaar dat ons warm is. Lyk nie of die mense regtig wil gesels nie, sekerlik die koue, so kom ons gesels oor die gedagte vir die dag.

 Vanoggend is ek by die laaste hoofstuk van Hosea. Die hele Hosea deur het Israel vir God uitgedaag, keer op keer bly sondig. Keer op keer bly gode maak vir hulself. Steeds het God hul keer op keer vergewe. Die laaste hoofstukke het Israel sonde na ‘n ander vlak toe geneem, selfs die profete het bly sondig, vir God bly kwaad maak.

 In Hosea 14 kom rig God weereens ‘n uitnodiging aan Isreal. Lees bietjie hier:

Oproep tot bekering en belofte van vergifnis.

Hosea 14:1SAMARÍA sal daarvoor boet, omdat hy weerspannig was teen sy God; hulle sal val deur die swaard, hulle kinders sal verpletter en hulle swanger vroue oopgesny word.

2 Bekeer jou, Israel, tot die Here jou God, want jy het gestruikel deur jou ongeregtigheid.

3Neem woorde met julle, en bekeer julle tot die Here; sê aan Hom: Vergeef alle ongeregtigheid, en neem aan wat goed is; dan sal ons as offerdiere ons lippe aanbied.

4 Assur kan ons nie red nie, op perde wil ons nie ry nie en tot die werk van ons hande nie meer sê: Onse God nie! Want by U vind die wees ontferming.

5Ek sal hulle afkerigheid genees, hulle vrywillig liefhê, want my toorn is van hulle afgewend.

6Ek sal vir Israel wees soos die dou, hy sal bloei soos 'n lelie en sy wortels uitslaan soos die Líbanon.

7Sy lote sal uitsprei, en sy prag wees soos dié van 'n olyfboom en sy geur soos die Líbanon.

8 Die wat onder sy skaduwee sit, sal weer koring laat groei; en hulle self sal bloei soos die wingerdstok; die roem daarvan sal wees soos die wyn van die Líbanon.

9Efraim, wat het Ek nog met die afgode te doen? Ek het hom verhoor en hou my oog oor hom. Ek is soos 'n groen sipres; uit My word jou vrug gevind.

10 Wie wys is, laat hom op hierdie dinge let! Wie verstandig is, laat hom dit erken! Want die weë van die Here is reg; en die regverdiges sal daarop wandel, maar die oortreders daarop struikel!

In die voorafgaande, bewys God weereens genade aan Isreal ongeag wat hulle sondes was, kies Hy om hulle te vergewe. Gee Hy hulle sy belofte van troue en voorspoed.

In ons lewens, bedroef ons nie net vir God soms nie, maar ook ‘n vriend of familie lid. Soms besef jy dadelik jou fout en vra om vergifnis. Tog is dit in daardie persoon se hande en hart of hulle jou wil vergewe. Soms kies hulle om jou nie te vergewe nie, ongeag hoe mooi jy vra, hoe jy soebat en smeek.

Wat nou gedoen? Al wat jy kan doen is om voor God om vergifnis te vra, en te weet dat Hy jou dadelik vergewe het omdat jy erken het jy het verkeerd gedoen deur die persoon te na te kom. Verder moet ons dit in God se hande los om daardie persoon se hart sag te maak om te kan vergewe. Om te kan dit agter hulle sit en te weet dat jou bekentenis en jammerte opreg is. Verder kan jy niks doen nie. Net wag totdat God die deurbraak gee en bly bid vir daardie persoon.

Die dinge wat ons hier op aarde aan mekaar doen kan ons glad nie opweeg teen die dinge wat ons aan God se Vaderhart doen nie. Die Drie-enigheid is sondeloos, hoe erg moet die dinge wat ons bly doen nie vir hulle wees nie. Steeds het Jesus daarvoor gesterf, en staan Hy steeds elke dag vir ons in, kies God ons Vader om ons keer op keer te vergewe.

Vandag as jy weet daar is iemand wat jy te na gekom het, doen jou deel, vra om verskoning, maak jou diepe jammerte aan oor wat jy gedoen of gesê het. Daarna bid jy dat God daardie persoon se hart sal oopmaak om jou verskoning te aanvaar.

Ons is die eerste skakel in vergifnis, dit maak nie van jou ‘n slegte mens as jy bereid is om hou foute te erken nie, dit is hoe ons groei en nader aan God begin leef.

©Marsofine Krynauw

Winter se kloue

Heel ongemerk

het winter sterk

sy kloue in kom slaan

herfs wou nou talm

sy blare lui-lui na benede laat warrel

toe winter hom in sy spore stuut

hom nie aan warrelende blare steur

die aarde vashou in sy greep

sy koue asem

hard en ver oor berge en heuwels blaas

soos eter deur elke aar, skeur en oppervlak dring

tot op die been

al die somerson herinneringe verkluim

binne die ure van ‘n enkele dag

tog so met voel of ek in Antartika staan

is daar dankbaarheid in my hart

vir ‘n woning en ‘n warm bed

‘n stomende koppie koffie

wat my van binne af ontdooi

vra ek ons Vader om met die te wees

wat in hierdie gure kloue van winter

vasgevang is sonder huis of haart …

© Marsofine Krynauw

Wat doen jy met geleenthede?

Die foto onder is van een van die juwele van Namibië – Sandwich Harbour, en geleë anderkant Walvisbaai, as jy deur Walvisbaai sou ry en net aanhou see langs sou jy daar uitkom. Maar so maklik is dit nie, want jy kan nie net see-langs ry nie. Hierdie unieke plek waar die duine en die see mekaar ontmoet, kan net bereik word met ‘n 4x4 voertuig want daar moet deur die duine gery word.
Omdat dit so unieke plek is en nie maklik om daar uit te kom nie, wil almal daarnatoe gaan. Dit het my aan die lewe laat dink. Die dinge wat ons maklik bekom, is nie juis vir ons belangrik nie. Tog die dinge wat ‘n uitdaging is, die wil ons bekom. Of dit nou vir ons goed sal wees, dit is debatteerbaar.
Dit laat my weer aan Eva in die tuin dink. Sy mag van alles eet, maar die een boom waarvan sy nie mag eet nie, wil sy van eet en eet sy van!
Dit bring my by die liefde van Jesus wat hy vryelik vir ons gegee het, tog wil ons dit nie hê nie. Ons wil liewer ons besig hou met die wêreld se dinge. Dinge wat ons net ongeluk kan bring.
Verder gekyk word daar vir jou ‘n platform geskep om jou werk te plaas. Daar word dalk ‘n dag gereël vir jou om bemarking van jou boeke te doen. Daar word ‘n blad beskikbaar gestel waar jy elke dag jou bundels en boeke kan bemark. Tog maak byna niemand daarvan gebruik nie.
Liewe vriende, hoekom is ons mense so? Die geleenthede is voor ons, maar ons gebruik hulle nie, ons wil hê ander moet dit vir ons doen… Vandag wil ek vir jou vra, wie kan jou boek, jou bundel beter bemark as jyself? Jy ken jou motivering vir elke woord daarin, jy weet tot watter tipe mense jou werk gaan spreek.
Is dit nie tyd dat ons net soos met die liefde van Jesus wat gratis is vir ons, Sy liefde moet aangryp nie, maar ook die geleenthede wat daar bestaan om ons self te bevorder.
Daar is ‘n gesegde wat lui: ‘You need to be in it to win it!’
Passiwiteit ontlok geen reaksie nie … begin doen iets vir jouself, vir jou droom. Begin neem deel aan geleenthede wat vir jou gebied word. As ek by Sandwich Habour wil uitkom, is dit my verantwoordelikheid om iets daadwerklik daaraan te doen. Dit is presies dieselfde met jou drome.
Jy kan in die woestyn rond ploeter en nooit op die strand van Sandwich Habour uit kom nie. Of jy kan ‘n gids kry, en ure later met jou voet in die see by Sandwich Habour staan.

Besluite & keuses

Goeiemôre uit ‘n baie fris Windhoek. Die weervoorspelling het vir vanoggend -1 voorspel, gelukkig het ons darem nie daar gaan draai nie, maar daar is ‘n sterk byt in die lug. Dit raak nie winter nie, dit is winter en oor twee dae is dit reeds die eerste dag van die sesde maand. Ek hoop almal het ‘n lekker warm naweek voor die stoof, of kaggel of sommer net ‘n lekker vuur gehad.
Gister praat ons Pastoor, Pastoor Roland Engel oor die besluite wat ons as mense maak en hoe dit ons in die sop laat beland. Vanoggend gaan een van die oordenking presies daaroor. Die besluite wat ons maak, soms keer op keer op keer wat ons elke keer op presies dieselfde plek uitbring. Dit is gewoonlik nie ‘n goeie plek nie.
Besluite in ons finansies, in ons verhoudings, in ons liefdeslewe, in wat ook al. Elke keer maak ons dieselfde besluit, die selfde fout, kom ons op die selfde doodloop straat uit waar ons in sak en as sit.
Dan is ons eerste reaksie gewoonlik: ‘hoekom het God my hier uit gebring’. Dit was nie God se besluit vir jou nie, jy het Hom nie eers daarin geken nie. Maar steeds blameer jy Hom.
Ek glo ons het al baie male vir ons kinders of selfs vriende die volgende woorde gesê as hulle verkeerde besluite geneem het wat hul in die moeilikheid laat beland het: ‘dit is tyd dat jy moet grootword’. Klink dit bekend?
As jy oor en oor dieselfde verkeerde besluit maak, byvoorbeeld in die keuse van ‘n lewensmaat, sal dit elke keer op ‘n gemors en dalk egskeiding uitloop. So ook as jy oor en oor die verkeerde besluite oor jou finansies maak. Soms maan die Gees jou dat jy besig is om ‘n verkeerde besluit te maak, maar ons is hardkoppig soos kleinkinders wat net ons sin altyd wil hê.
Nouja – die Woord van ons Vader is getrou en as ons in 1Korinthiers 13:11 gaan lees is dit wat dit vir ons sê:
11Toe ek 'n kind was, het ek gepraat soos 'n kind, gedink soos 'n kind, geredeneer soos 'n kind; maar nou dat ek 'n man is, het ek die dinge van 'n kind afgelê.
Wat nou? Dit is maklik. Ken God in jou besluite. Bespreek dit met Hom, vra Hom om jou deur Sy Gees te lei. Hy wil net die beste vir jou hê.
In soveel plekke in die Woord verseker God ons dat Hy vir ons die beste wil hê. Gaan lees gerus die hele Psalm 84, hier is net so ‘n deeltjie.
Psalm 84:5Welgeluksalig is hulle wat woon in u huis; hulle prys U gedurig. Sela.
6Welgeluksalig is die mens wie se sterkte in U is, in wie se hart die gebaande weë is.
7As hulle deur die Droë Laagte trek, maak hulle dit 'n fonteinland; ook oordek die vroeë reën dit met seëninge.
8Hulle gaan van krag tot krag; elkeen van hulle sal verskyn voor God in Sion.
As jy die keuse wat jy moet maak, die besluite wat jy moet neem, voor God lê, sal Hy jou rigting gee. Sal jy soos die Psalmdigter in vers 11 kan getuig:
11Want 'n dag in u voorhowe is beter as duisend; ek wil liewer by die drumpel staan in die huis van my God as om te woon in die tente van goddeloosheid.
12Want die Here God is 'n son en skild; die Here sal genade en eer gee; Hy sal die goeie nie onthou aan die wat in opregtheid wandel nie.
13 Here van die leërskare, welgeluksalig is die mens wat op U vertrou!
Ons Vader is getrou, nooit te besig nie, Sy Woord staan vas van ewigheid tot ewigheid. As jy weer ‘n besluit moet maak, bespreek dit met Hom, luister na die stem van die Heilige Gees wat jou rigting gee, bid daaroor en vra ander gelowiges om saam met jou te bid. Jy sal verstom staan om te sien dat God se planne vir jou altyd goed is en reg uitwerk.
By die voete van ons Vader, is die beste plek vir ons – daar is die volmaakte liefde, die volmaakte vrede, die regte rigting wysers en volop genade en wysheid.
© Marsofine Krynauw

Die 14 jarige Jade Delport skrik een nag wakker met die man voor haar bed wat sy nog haar lewe lank vrees. Daarna volg byna vier jaar van hel wat sy magteloos en in stilswye moet verduur. Sy sweer wraak en begin op skool al haar meesterplan bedink. Jade kom gou agter haar ma, Clare, lei haar eie geheime lewe waarvan haar magsbehepte man nie bewus is nie. Jade doen haar huiswerk deeglik en besef dat dit juis haar kaartjie na vryheid gaan wees. Na matriek verdwyn sy spoorloos, en word nooit gevind nie.

Royal Diamonds, die groot diamantreus in Namibië, stel ’n vroue diamant-sorteerder aan. Daar is veel meer aan Vonda Wallace, die 26 jarige rooikop-Amerikaner met die verleidelike lyf, as wat enige iemand vermoed of ooit sal besef.

Royal Diamonds se gebou waar die diamante gesorteer word, word skielik deur kragonderbrekings geteister, en kort na die kragonderbrekings word daar telkens van die pakkies met die grootste karate vermis. Die hoof van die Diamant-tak, by wie geen diamantdief nog ooit kon verbykom nie, kry nie die dief vasgetrek, óf die diamante opgespoor nie. Die bordjies word ergter verhang toe die vermiste diamante in sy kluis gevind word. Hoe het die diamante daar beland? En wie is die wulpse Vonda Wallace regtig?

Vir John Opperman is sy miljoene nie die belangrikste ding in sy lewe nie, maar sy familie. Nada, is die liefde van sy lewe. Sy oudste dogter, Minda, getroud met Theo, is in bewaring van wildlewe. Sy jongste dogter, Yozel, is besig om met rasseskrede naam te maak in die eiendomsbedryf. Jonathan sy enigste seun, is nog op skool, maar word vreeslik bederf.

Wat John nie weet nie, is dat sy geliefde vrou ʼn massiewe geraamte in die kas het. As dit op die lappe moet kom, sal dit hul hele familie vernietig. Minda en Yozel is die twee wat eerste van hierdie goedbewaarde geheim te hore kom deur sameloop van omstandighede. Dit skok hul tot in hul diepste wese en verander die manier waarop hul na die lewe kyk onherroeplik. Moet hul stilbly of moet hul praat?

Kort nadat hulle van die geheim te wete gekom het, tref ʼn ramp hul familie. Tog moet die lewe aangaan en Yozel word gedwing om, ten spyte van die grootste krisis wat haar nog in haar lewe getref het, professioneel te bly. Die geleentheid om aan niemand anders nie as Andre Markgraaff, die eiendomsmagnaat, die regte eiendom te gaan wys kan sy beslis nie by haar laat verbygaan nie. Wat is die geheim? Hoe hanteer die familie die ramp wat hul tref? Sal Yozel dit regkry om hierdie gesoute besigheidsman te oortuig om die eiendom te koop?

Vlerke van die wind

 In jare lank vervloë

was hy die son se eerste straal

was hy die maan se sagte kus

op die water as die aand ster wink

vir haar

het sy hom gevolg

oor grondpaaie rof

deur sand en stof

sy drome in vervulling

sien gaan –

 

magteloos toegekyk

hoe hul drome saam

dag vir dag

maand na maand

jare lank

verbrokkel tot stof

gevoel hoe hul

in stilte val...

 

hul nie meer saam

hoog gevlieg of

op wieke van die wind gesweef...

maar

vlerkloos na ʼn sekere dood val

vir lewe en dood

het sy bly klou

maar die swaarte krag was te sterk

helaas

 

moes sy voel

hoe hy die mat met

brute krag pluk

onder haar voete uit haal

haar geen keuse laat

as om te val...

 

tog het sy biddend

hoopvol

hul in haar drome sien dans

vergeefs

donderend neer gestort

soos ʼn af vlek swael

 

nooit weer sou hul saam

drome droom

op lugstrome saam baljaar

in ʼn liefdes dans

 

sy kon hom nie meer volg

oor grondpaaie rof

deur sand en stof

selfs sy drome het

begin taan

 

daar het sy gestaan

alleen

sonder vlerke

oë betraan

met net die fluistering

van die wind om haar heen...

 

nooit sal sy weer sweef

op die deuntjie van die wind

tog het sy haar voete gevind

die het vlerke gekry

hul neem haar

oor vere strande heen

waar sy op die deuntjie

van die branders dans

gee die lewe haar

nog ʼn tweede kans

kan niks haar stuit

of laat val...

©Marsofine Krynauw

Erkenning aan Tina Turner – On silent wings

Gaan luister gerus na hierdie pragtige lied

https://www.google.com/search?q=on+silent+wings&sxsrf=APwXEde32MIR7omJL5HTV0GUupYoFxFRfw%3A1685188894184&ei=HvFxZLXyCs26gQb6kqTIDQ&oq=on+silent+wings&gs_lcp=Cgxnd3Mtd2l6LXNlcnAQARgAMgwIIxCKBRATEIAEECcyBQgAEMsBMgUIABDLATIFCAAQywEyBggAEBYQHjIGCAAQFhAeMgYIABAWEB4yBggAEBYQHjIGCAAQFhAeMgYIABAWEB46BwgjELADECc6CggAEEcQ1gQQsAM6CggAEIoFELADEEM6BwgjEIoFECc6BAgjECc6BwgjEOoCECc6DwgAEIoFEOoCELQCEEMYAToFCAAQgAQ6BwgAEIoFEEM6CAgAEBYQHhAPSgQIQRgAULkaWJk-YIpUaANwAXgFgAHPBYgBk0mSAQozLTcuMTAuMy4xmAEAoAEBsAEUwAEByAEK2gEGCAEQARgB&sclient=gws-wiz-serp#fpstate=ive&vld=cid:146981e8,vid:64ZqNno_Bsk

Bewaar jou hart...

Middag vriende,

So bietjie triestig met rugpyn. Bid asseblief.
Hoe wonderlik is dit nie ... of ons goed of sleg voel ... ons Vader bly dieselfde. Hy is steeds goed.
Die geheim is om ons hart te bewaar. Waarvan? Negatiewe gedagtes, ons eie ek, mense wat ons seer maak. Dit kan ons net doen as ons in Christus geanker is.

Spreuke 4:23-27 AFR53

Bewaak jou hart meer as alles wat bewaar moet word, want daaruit is die oorspronge van die lewe. Verwyder van jou die valsheid van mond, en hou ver van jou af die verkeerdheid van lippe. Laat jou oë reguit kyk en jou ooglede hulle reg voor jou uit hou. Maak die pad van jou voet gelyk, en laat al jou weë vas wees, wyk nie regs of links af nie, hou jou voet ver van boosheid.

Soos Mattheus gesê het sy liggaam kan maar vergaan, maar sy siel sal hy beskerm.

Matteus 10:28

“Julle moenie bang wees vir mense nie. As hulle julle doodmaak, dan sal dit net julle liggame wees wat dood is. Nee, julle moet net vir God bang wees. As Hy julle in die hel laat brand, dan sal julle waarlik dood wees.
Kyk objektief na mense en hoe hul jou hanteer. Laat lei jou deur die wete dat Jesus self ook sleg behandel was en steeds in liefde opgetree het.
Wees bedag oor hoe jy ander hanteer. Met 'n sagte gees sal jy ver kom.
Mooi naweek.

Volmaakte misterie

Die nag se swart

het jou blou ge-ink

jou blos van pienk

net sigbaar

op die rug

van jou kabbelduine

git swart hang die hemel bo

met ‘n maan soos wit soos sneeu

en sterre wat soos sneeuvlokkies

aan die swart gewelf skitter

oorkant in die bossieveld

staan die springbok

onbewus van die grootsheid

van die skildery

geskilder deur die Meester

gekwas in indigo, koraal en swart

en in die duinstrate

speel die maan silver

deur die waaigras

en ek bly staar

na die volmaakte misterie

van die nag

vasgelê deur Meesterhand …

© Marsofine Krynauw

Witgatboom

Op die rotswand se rant

het ‘n Witgatboom sy weg
oop geveg
sy saadjie ontkiem
in ‘n paar korrels sand
vasgevang in ‘n skeur
in die rots se wand
deur son, wind en weer
het dit hier gedy
die elemente se
storm en drang
deurleef
teen die natuur se wet
dit self verset
bly staan as die storms
se donder en blits
blou vonk uit vuurklip slaan
gedrink van die
druppels van reën se seën
dit diep in sy wortels gaan berg
en saans as die son
die horison in karmosyn inkleur
sug hy tevree
want dit is alles die moeite werd
elke keer as son
vir dag afgee
aan nag
en maan sag oor
sy boomlyfie streel
sing hy dankbaar
saam met die aandwind
ego sy liedjie teen die kranse
en gee die ander moed
wie se wortels nog
diep in die rotsskeur
hul weg moet baan.
© Marsofine Krynauw

'n Legende sterf ... Tina Turner, koningin van Rock!

Tina Turner gebore Annie Anna Bullock in Tennessee in November 1939, is vandag in die ouderdom van 83 oorlede in Zürich, Switserland.

Sy was 'n legende, sy was soos sy in haar liedjie 'The Best' gesing het, die beste en het tot op die ouderdom van 73. Haar laaste toer het op 5 Mei, 2009 in Engeland geëindig.

'n Maklike lewe het sy beslis nie gehad nie. Sy kom uit 'n arm familie en is deur Ike Turner haar eerste man ontdek. Tog is dit ook hy wat haar gedurende hul huwelik mishandel, verkrag en sielkundig afgebreek het. Een aand in 1976, nadat Ike in Dallas aangekom het om hulle toer te begin, het hy haar verskriklik aangerand in die limo op pad na hul hotel. Sy het gewag totdat hy slaap, haar donkerbril opgesit om haar gekneusde gesig te verberg, en met net 36 sent in haar sak ontsnap van Ike Turner. Sy is in 1978 van hom geskei.

'n Prokureurs vriend van haar het vir haar 'n vliegtuigkaartjie gekoop om terug te gaan na Los Angeles. Daar het sy as skoonmaakster gewerk om haar huur te kan betaal en aan die lewe te bly.

Daarna het sy begin om aan haar solo loopbaan te werk deur kabaret vertonings te lewer in Las Vegas. In 1984 maak sy die grootste terugkeer ooit in Pop geskiedenis, met haar Private Dancer-album en word sy een van die wêreld se grootste sterre.

Daarna was daar geen keer aan Tina Turner nie. Sy was bekend nie net vir haar stem nie, maar ook vir haar mooi bene en pragtige lyf. Sy het haar gehore vermaak met haar lewendige danspassies.

Van haar grootste treffers is River Deep and Mountain High, The Best, Proud Mary, Steamy windows, What's love got to do with it, Private Dancer, On Silent Wings en vele ander.

Sy en Erwin Bach, haar man was vanaf 1986 saam en is in 2013 getroud. Hulle samesyn was een van die langdurigste romanse in die geskiedenis van Rock musiek.

Ek is 'n baie groot aanhanger van haar musiek en het die voorreg gehad om haar konsent op Ellis Park jare gelede te kon gaan sien. Die groot Tina Turner was letterlik drie meter van waar ek gestaan het op die loopplank. Die volgende oggend was my stem weg soos ek saam gesing het. Wat 'n wonderlike herinnering.

Sy was voorwaar 'n vrou wat nie toegelaat het dat terugslae haar onderkry nie, maar het opgestaan en net harde terug geveg. Een van die min sangeresse wie baie mense so lank hul leef sal onthou.

Rus in vrede, Tina.

(c) Marsofine Krynauw

Bronne: https://hollywoodlife.com/

              https://www.google.com/search?q=tina+turner+the+queen+of+rock 

Wat kom by jou mond uit?

 

Môre vriende,

‘n Wonderlike, mooi sonskyn dag in Windhoek. Die week is hier by ons vir baie aan sy einde vandag, omdat dit môre ‘n vakansiedag is en baie vir Vrydag verlof neem. Ek natuurlik is permanent met vakansie, so waaroor sal ek kla.

Vanoggend praat Pastoor Nolan oor Psalm 81:11b.

 Die vraag is – wat kom by jou mond uit?

 Woorde dra krag. Soos die ou spreekwoord lui: ‘Waar die hart van vol is loop die mond van oor.’

 Psalm 81:11 Ek is die Here jou God wat jou laat optrek het uit Egipteland; maak jou mond wyd oop, dat Ek dit kan vul.

 Hierdie word die beste bewys wanneer twee mense verlief is op mekaar. Hulle hele geselskap gaan oor die ander persoon se deugde.

 As jy elke dag heel dag net negatiewe dinge praat, net swartgallig is, is dit voorwaar wat in jou hart is. Jou lewe sal ook so donker en negatief wees want dit is wat jy spreek. As jy ongeluk, swaarkry, seer, of wat ook al die hele tyd bekla en dit is wat uit jou mond kom, is dit wat jy bepaal jou lewe sal wees.

 Daarenteen as jy jou hart met dankbaarheid vul, sal dankbaarheid, vreugde en vrede wees waaroor jy praat. As jy oorwinning en lewe spreek, sal dit wees wat jou lewe sal wees. Dit is daardie konsep van nieteenstaande alles, kies ek om prositief te wees, om God te vertrou, om Hom te dank vir elke klein dingetjie. Want Sy beloftes staan vas. Soos in Psalm 81:17.

 17Ja, Hy sou hulle voed met die beste van die koring; en met heuning uit die rots sou Ek jou versadig.

 Hy wil ons mond vul met die goeie, en so ons harte ook. Hy wil hê dat ons mond en harte met lofprysing gevul sal wees wat oorborrel om aan ander Sy goedheid en liefde te wys.

 Wanneer jy vir ander begin bid, hulle saam met jou vir nog ander bid, raak dit ‘n kring van opheffing, van deurbraak, van God se vrede en geluk. Voor jy jou kom kry, is jou mond gevul met al die mooi, die positiewe, die wonder van lewe soos deur God vir ons gegee.

 Tel jou woorde, soos die oumense gemaan het. Kyk wat jy praat, kyk wat in jou hart is. Die keuse is in jou hande, wil jy dood oor jouself spreek of lewe. Want God vul jou mond met lewe …

© Marsofine Krynauw

Winter asem

 As die winter sy asem

in die vallei af blaas

sy wit mus op die berg toppe plaas

is dit net die reuse

van die natuur wat bly staan

soos die doringboom

en die grootvoet

wat daar langs gaan

vlug die swakkes na beskutting

want hulle is nie geskape

om die elemente te deurstaan

maar tog skiet hul nie tekort

die Vader het hul ‘n verstand gegee

om vir hul ‘n huis te bou

om hul daarin warm te hou

dus blaas jou koue asem

in die vallei af – winter

sit vir die berg sy wit mus op

geniet die stilte van oorwinter

om weer jou kragte op te bou

vir wanneer jagter en toeris

jou paaie poeier trap

vir die grootvoet wat hier hou

jou vrede kom versteur

dan is ek seker

dat jy somtyds wens

dat die vallei vol winter wasem

moet bly hang

die berg nooit sy wit hoed

af moet haal

die mens sal bly bibber en beef

die koue aan hom moet bly kleef …

© Marsofine Krynauw

 Vriende,

Al wat ek het is dankbaarheid. Dankbaarheid teenoor my Vader vir my woorde en dankbaarheid vir mense soos Leonita Coutts wat vir ons 'n plekkie in haar e-tydskrif Kaleidoskoop gee. Gaan ondersteun haar gerus. Daar is allerhande wonderlike artikels in.

Net God kan jou herstel

Goeiemôre Vriende,


Hier by my is alles vredig en stil, ek hoor die voëltjies in my tuin gesels, en sien deur my venster hoe die bure se katjie in my groentetuin speel. Hulle het nie bome en tuin nie, so hy kom kuier elke dag in my tuin om die skoenlappers te jaag en boom te klim en net homself te geniet. Dit is nou totdat my twee katte agterkom dat daar ‘n vreemdeling in hulle tuin kuier. Dan sien jy net ‘n swart en wit streep soos hy teen die boom op hardloop en oor die muur spring.
Vanoggend wil ek oor herstel gesels. Herstelwerk is iets wat ons boere goed ken en meeste van die tyd self doen. As die trekker stukkende is, sal jy dit self probeer reg maak. Ek het al telkens gehoor hoe my eie broer wat daar in Lutzville boer, vertel hy het een of ander part gemaak wat nou weer gebreek het op die ploeg of eg of waar ook al. Net die onderdele wat hy werklik nie kan self maak nie word aangekoop. Want ons weet almal dat met ‘n boerdery moet jy jou sente omdraai.
In ons lewens breek daar baie male baie belangrike onderdele in ons. Ons is mense met emosies, gevoelens. Soms word ons vertroue gebreek, soms ons harte, soms ons word ons hele lewe uitmekaar gebreek deur die verlies van ‘n geliefde of selfs deur die manier wat iemand wat ons liefhet optree.
Meeste van die tyd probeer ons ook soos die boere, hierdie breek self herstel. Ons dink alles is weer heel en reg. Dan een dag wanneer jy dit die minste verwag kom al die wiele af en alles val uitmekaar – een groot gemors.
Vir ons as kinders van God is daar net Een wie ons kan herstel. Werklik kan heelmaak, werklik weer aanmekaar kan sit met Sy liefde en genade. Hy is die enigste een wat weet hoe, Hy het ons geskape. Hy weet wat ons dink, hoe ons voel, wat stukkend is.
Koning Asaf het in Psalm 80 ook dit besef. Nadat alles so verkeerd gegaan het, pleit hy by God:
Psalm 80:4 o God, herstel ons, en laat u aangesig skyn, sodat ons verlos kan word!
8 o God van die leërskare, herstel ons, en laat u aangesig skyn, sodat ons verlos kan word!
20 o Here, God van die leërskare, herstel ons; laat u aangesig skyn, sodat ons verlos kan word!
Ons is soms baie onverskillig met ons eie lewens en laat dit so uitmekaar breek omdat ons nie in ons Vader se wee wandel nie. Omdat ons Hom nie ken as ons ‘n lewensmaat soek nie. Omdat ons Hom nie ken in ons vriendskappe nie. Omdat ons Hom nie ken as ons ons kinders opvoed nie. Hy is net altyd daar en Sy uitnodiging staan elke dag. Kom na My toe …
In Hosea se tyd het Israel ook so voortdurend hulle eie kop gevolg. Gesondig meer sonder ophou. God se hart so bedroef. Hy het bly pleit by hulle om terug te kom na Hom. Soms het Hy vir hulle kwaad geword en hulle gestaf. Keer op keer het hulle net weer Sy liefde en guns verwerp. Tog kyk net hoe lyk ons God se Vader hart.
HOSEA 11
My liefde brand te sterk
1Toe Israel nog 'n kind was, het Ek hom al liefgehad, en Ek het hom, my seun, uit Egipte geroep.
2Maar toe die Baäls hulle roep, het Israel My verlaat en vir die Baäls gaan offer, vir afgodsbeelde offers gebring.
3Ek self het Efraim leer loop, Ek het hulle op my arms gedra, maar hulle wou nie erken dat dit Ek is wat vir hulle sorg nie.
4Ek het hulle met sorg en liefde gelei, Ek was vir hulle soos iemand wat die juk oplig as dit sy trekdier skaaf. Ek het na Efraim toe afgebuk en hom gereeld kos gegee, 5want Ek wou nie hê dat hy weer na Egipte toe moet teruggaan nie of dat Assirië oor hom moet heers nie. Maar Efraim het geweier om hom te bekeer.
6Daarom sal sy stede deur oorlog verwoes word en sy waarsêers uitgeroei word. Hulle sal deur die oorlog verteer word oor die raad wat hulle gegee het. 7Omdat my volk My verlaat het, sal party van hulle opgehang word en die ander sal die slawejuk moet dra, 'n juk wat nie afgegooi sal word nie!
8Maar hoe kan Ek jou prysgee, Efraim? Hoe kan Ek jou laat vaar, Israel? Hoe kan Ek jou vernietig soos Adma, met jou maak soos met Sebojim? Ek kan dit nie oor my hart kry nie. My liefde brand te sterk. 9Ek sal my gloeiende toorn bedwing, Ek sal nie so ver gaan en Efraim uitwis nie, want Ek is God, nie 'n mens nie. Ek is die Heilige wat by jou is, Ek sal nie met woede ingryp nie.
10Hulle sal die Here volg! Hy sal brul soos 'n leeu en wanneer Hy brul, sal sy kinders vol ontsag uit die weste kom. 11Vol ontsag sal hulle soos voëls uit Egipte vlieg en soos duiwe uit Assirië.
Ek sal hulle na hulle neste toe terugbring, sê die Here.
Al probeer ons om ons self te herstel, daar is net herstel by ons God. Hy sal jou nie wegstuur nie, al is jy so halsstarrig soos Israel. Sy liefde is ‘n liefde wat ons as mens nooit sal kan begryp nie.
Kies vandag om jou herstel te kry by die Een wat jou saam geweef het in jou moederskoot, wat elke sel, elke gedagte van jou ken. Wat jou so ontsettend liefhet, dat Hy jou nie ongelukkig kan sien nie. Soos 'n liefdevolle vader sy seuntjie of dogtertjie sal ophelp as hulle val, en alles sal doen om hulle weer heel te kry, nog meer sal ons Vader ons altyd ophelp en genees.
Net as ons heel is in Christus, kan ons ander help om heel te word.
© Marsofine Krynauw