'n Enkel doringboom

Foto geneem deur Solly Levi


‘n Enkel doringboom
met stam al bros
van die verweer
van son en wind en weer
hier op die vloer
van die pan
met wortels diep geanker
in die dorre aarde se kors
‘n enkele weerbarstig tak
wat net nie
regop soos die ander wou wees
maar sydelings wou beur
nou alleen
en kaal gestroop van blare
tog sy besluit berou
die digte loof
se groen hoof
wys die tekens
van veroudering
waar grysvaal om die slape skif
teen die doek van
die stofnag afge-ets
die boom
laat lyk so eensaam
en verlore
maar tog reusagtig
in sy grootsheid
van uithou teen
die velle stryd
van son en wind en weer
nog altyd triomfanklik
met opgehefte hoof
en groen-grys loof
in lofpsalm na sy Heer
want hier het dit
die stormwinde
van die Namib deurstaan
sy oë styf toegeknyp
teen duinsand wat verblindend
teen sy stam en takke slaan
en as die wind gaan rus
met die sak van die Namibson
die stof soos ‘n tentdoek rus
oor berg, duin en gewelf
het hy nog steeds bly staan
om in die môre
wanneer die Namibson fel
neer brand
sy skaduwee te gooi
as beskutting
van die gemsbok
teen hierdie Namibland.
(c) Marsofine Krynauw