Jy is veilig ...

Goeiemôre vriende,

Hoop almal van julle is veilig en warm. Laat ons elke dag in dankbaarheid uitstap, of dit warm of koud is. Ons moet mos die minder goeie saam met die goeie kan vat, hoe anders as Jesus alleen die kruistog moes doen om vir ons versoening te bewerk.
Terwyl dit so koud, en nat is. Terwyl dit moeilik is om jou dagtaak te verrig as die yswinde jou wil weg waai hier in die winter, is dit maklik om swaarmoedig te word.
Nie net in die winter is dit egter moontlik om swaar moedig en moedeloos te word nie, want ons leef in ‘n tyd waar mense daagliks geliefdes aan die dood afstaan, moet toekyk hoe ‘n geliefde aan kanker weg kwyn voor hul oë, en nog baie, baie ander struikelblokke en uitdagings op ons pad.
Dit was nie anders in koning Dawid se tyd nie, al was hy ‘n man na God se hart. Al het God hom al as jong seun guns gegee om die grootste reus, Goliat, te verslaan. Terwyl hy deur die Filistyne gevange geneem is in Gat skryf hy Psalm 56.
Nêrens in die Woord van God wat hy vir ons as handleiding agter gelaat het, is daar ‘n belofte dat dit altyd goed sal gaan met ons nie. Nie met een van die groot godsmanne het dit net goed gegaan nie. Geen plek is ook aangeteken dat hierdie manne net altyd die regte ding gedoen het, of die regte besluite gemaak het nie.
Wat wel baie duidelik vir ons opgeteken is, is dat hulle altyd nadat hulle gesondig het, dadelik besef het hulle het droog gemaak, en onmiddellik na ons Vader gegaan het om dit te bely en Hom te vra vir hulp. Te besef dat hulle algeheel afhanklik is van sy liefde, genade en trou.
Wat ook al vandag jou ‘winter’ is, jou ‘yswind’ is wat jou vel en lewe probeer verniel, kom ons staan vas soos Dawid en weet en bely:
Psalm 56:4 Die dag as ek vrees, sal ék op U vertrou.
5Deur God sal ek sy woord prys; ek vertrou op God, ek vrees nie; wat kan vlees my doen?
Ja, ons vrees soms, want ons is nie volmaakte wesens nie, solank ons net weet dat die enigste Een wat ons na toe kan gaan en moet gaan in hierdie tyd en altyd ons Vader is.
Beveg vandag die reuse in jou lewe, en op jou lewenspad met algehele oorgawe aan ons Vader. Hy het al die antwoorde en hy het die hele arsenaal om jou oorlog vir jou te wen.
Ek deel graag die liedjie onder met julle, want dit verwoord dit net so wonderlik.
© Marsofine Krynauw
https://www.youtube.com/watch?v=w_FeUu_FSA0