Dagsê Vriende,
Die koue en wind maak ‘n mens traag, veral as daar niks is wat jou jaag nie soos vir my. My dae begin later as ander s’n en eindig ook baie later as ander s’n, want as die woorde loop dan loop hulle oop.
Verder is die winter oral, in Windhoek en elders bibber koud, in Swakop, Hentiesbaai, Sossusvlei en die res van die woestyn is die wind besig om die duine te skuif, die mense kan fisies nie hulle hande voor hulle sien nie, so waai die sand. Tog sit ons almal in ‘n warm huis of voertuig om dit alles te aanskou – dankbaar is al wat ons kan wees.
Vanoggend gesels Pastoor Rynier Nolan oor Psalm 114.
PSALMS 114
Die wonder van die uittog.
1TOE Israel uit Egipte getrek het, die huis van Jakob uit 'n volk met 'n vreemde taal,
2het Juda sy heiligdom geword, Israel sy ryksgebied.
3 Die see het dit gesien en gevlug; die Jordaan het agteruitgewyk.
4 Die berge het rondgespring soos ramme, die heuwels soos lammers.
5 Wat is dit met jou, o see, dat jy vlug? o Jordaan, dat jy agteruitwyk?
6 o Berge, dat julle rondspring soos ramme? o Heuwels, soos lammers?
7Beef, aarde, voor die aangesig van die Here, voor die aangesig van die God van Jakob,
8wat die rots verander het in 'n waterplas, die keisteen in 'n waterfontein!
In hierdie psalm word ons herinner aan God se grootheid en hoe kragtig Hy saam met Isreal uitgetrek het uit Egipte. God het sy belofte gestand gedoen na baie jare, en hierdie belofte het vas gestaan en het Hy uitgevoer. Hy het die see laat ooptrek, die Jordaan laat terug trek, die heuwels en berge laat rondspring om sy belofte aan sy volk te laat waar word.
So ook het God vir ons as sy kinders beloftes gegee. Hierdie moet ons troos wees dat God niks, maar niks in sy pad sal laat staan as Hy sy beloftes aan ons wil waar maak. Hy sal selfs die see laat ooptrek, die rivier laat agteruitloop en berge en heuwels laat rond hop. Hy sal enigiets doen om by jou uit te kom.
Dan lees ek ook Psalm 46 en die wonderlike beloftes van ons Vader daarin. Hier maan ons Vader ons om terwyl alles chaos om ons lyk, en ons wag op Sy beloftes, om stil te raak en te weet dat Hy steeds God is.
PSALMS 46
God is 'n toevlug.
1VIR die musiekleier. Van die kinders van Korag. Met sopraanstemme. 'n Lied.
2God is vir ons 'n toevlug en sterkte; as hulp in benoudhede is Hy in hoë mate beproef.
3Daarom sal ons nie vrees nie, al waggel die aarde en al wankel die berge weg in die hart van die see.
4Laat sy waters bruis, laat hulle skuim; laat die berge bewe deur sy onstuimigheid! Sela.
5Die stroompies van 'n rivier maak die Godstad bly, die heiligste van die woninge van die Allerhoogste.
6God is daar binne-in, dit sal nie wankel nie; God sal dit help as die dag aanbreek.
7 Nasies het gebruis, koninkryke het gewankel; Hy het sy stem verhef; die aarde bewe.
8 Die Here van die leërskare is met ons; die God van Jakob is 'n rotsvesting vir ons. Sela.
9Kom, aanskou die dade van die Here, wat verskriklike dinge oor die aarde bring,
10 wat die oorloë laat ophou tot by die einde van die aarde, die boog verbreek en die spies stukkend slaan, die strydwaens met vuur verbrand.
11Laat staan en weet dat Ek God is; Ek sal hoog wees onder die nasies, hoog op die aarde.
12 Die Here van die leërskare is met ons; die God van Jakob is 'n rotsvesting vir ons. Sela.
Ons Vader en ons God sal nooit sy beloftes aan ons breek nie, en ons nooit alleen laat nie. Wanneer Hy stil is, is Hy besig om te werk. Ons moet ook net stil raak in die wete dat God steeds God die Almagtige is, dat sy beloftes tot in ewigheid staan, en dat Hy alles sal doen om daardie beloftes aan ons te hou.
Wat ‘n wonderlike wete dat ons nie soos afkop hoenders hoef rond te skarrel om te probeer om ons eie saak te veg nie, dat die Almagtige God besig is en alles sal uitwerk as ons ons onvoorwaardelike vertroue in Hom stel.
Bly warm, en veilig.
© Marsofine Krynauw
Geen opmerkings nie:
Plaas 'n opmerking