Loof en prys ons getroue Vader.

Goeiemôre Vriende, uit ‘n bibberende koue Windhoek met minus 6 grade op die termometer. Dit is nou nie die soort temperature waaraan ek gewoond is nie, maar hoe dankbaar is ek nie vir ‘n huis, warm klere en warm koffie nie. Ek hoop julle het ‘n heerlike snoesige naweek gehad.
Vanoggend so met die intrap van die nuwe week wil ek praat oor die getrouheid van ons Vader teenoor Sy kinders.
Ja, ons gaan deur beproewings, maar die verskil is ons Vader is altyd daar saam met ons. Soms glo ons ons is alleen, maar dit is nie waar nie.
Ek is nou al vir 3 maande besig met my Kanadese visa aansoek net om vir my vriendin te gaan kuier. By tye het ek al gedink, hierdie is net ‘n mos van tyd, want niks gebeur nie. Net toe ek besluit nee wat dit is alles ‘n gemors, laat weet hulle my ek moet Pretoria toe vir die visa onderhoud. Kom terug, dit is toe die wag begin dat hulle my moet laat weet hulle soek my paspoort om die visa in te sit.
Wel gelukkig is ek besig, en het my kleindogter gekuier. Nou en dan het ek daaraan gedink en dan net weer besluit dit is belaglik, hierdie gaan nooit gebeur nie. Die dag nadat ons my kleindogter terug geneem het, kry ek die e-pos hulle soek my paspoort. Hoe wonderlik is ons Vader se werke nie.
Vanoggend het ek my paspoort gaan koerier Pretoria toe. Hierdie keer mag ek nie anders as opgewonde en vir seker wees dat dit alles in my Vader se hand is nie.
Psalm 34 kan ek nie anders as heel hier plaas nie, daarin vertel Dawid van die goedheid en getrouheid van God teenoor sy kinders. Hy het hierdie psalm geskryf toe hy in baie groot nood was.
PSALMS 34
Die Here beskerm die gelowige.
1 'n PSALM van Dawid, toe hy hom kranksinnig gehou het voor Abiméleg en dié hom weggejaag het, sodat hy heengegaan het.
2 Alef. Ek wil die Here altyd loof; sy lof sal altyddeur in my mond wees.
3 Bet. My siel sal hom beroem in die Here; die ootmoediges sal dit hoor en bly wees.
4 Gimel. Maak die Here saam met my groot, en laat ons saam sy Naam verhef!
5 Dalet. Ek het die Here gesoek, en Hy het my geantwoord en my uit al my vrees gered.
6 He. Hulle het Hom aangesien en gestraal van vreugde, en hulle aangesig hoef nie rooi van skaamte te word nie.
7 Sajin. Hierdie ellendige het geroep, en die Here het gehoor, en Hy het hom uit al sy benoudhede verlos.
8 Get. Die Engel van die Here trek 'n laer rondom die wat Hom vrees, en red hulle uit.
9 Tet. Smaak en sien dat die Here goed is; welgeluksalig is die man wat by Hom skuil!
10 Jod. Vrees die Here, o sy heiliges, want die wat Hom vrees, het geen gebrek nie.
11 Kaf. Die jong leeus ly armoede en het honger; maar die wat die Here soek, het geen gebrek aan enigiets nie.
12 Lamed. Kom, kinders, luister na my; ek wil julle die vrees van die Here leer.
13 Mem. Wie is die man wat lus het in die lewe, wat dae liefhet om die goeie te sien?
14 Noen. Bewaar jou tong vir wat verkeerd is, en jou lippe dat hulle nie bedrog spreek nie.
15 Samek. Wyk af van wat verkeerd is, en doen wat goed is; soek die vrede en jaag dit na.
16 Ajin. Die oë van die Here is op die regverdiges, en sy ore tot hulle hulpgeroep.
17 Pe. Die aangesig van die Here is teen die kwaaddoeners, om hulle gedagtenis van die aarde af uit te roei.
18 Sade. Hulle roep, en die Here hoor, en Hy red hulle uit al hul benoudhede.
19 Kof. Die Here is naby die wat gebroke is van hart, en Hy verlos die wat verslae is van gees.
20 Resj. Menigvuldig is die teëspoede van die regverdige, maar uit dié almal red die Here hom.
21 Sjin. Hy bewaar al sy bene: nie een daarvan word gebreek nie.
22 Tau. Die onheil maak die goddelose dood; en die wat die regverdige haat, moet daarvoor boet.
23Die Here verlos die siel van sy knegte; en almal wat by Hom skuil, hoef nie te boet nie.
Wat my opval van hierdie wonderlike psalm is dat Dawid al is hy so in die nood, sy lewe in gevaar, begin hy deur te verklaar dat hy die Here sal loop, Sy naam sal grootmaak. Doen ons dit as dit moeilik gaan met ons, of kerm en kla ons net?
Verder gaan hy aan om ons te vir seker dat God daar is, dat hy ons smekinge hoor, dat hy ons definitief sal bystaan en beskerm en op die regte tyd die uitkoms sal gee.
Dit laat my ook dink aan Paulus en Silas in die tronk, om middernag begin hulle die Here hardop loof en prys en wat gebeur, die kettings val van alle gevangenis se voete en die deure van die tronk gaan oop. Dit is hoe ‘n groot, almagtige God ons dien.
Daar is ‘n Engelse song waarvan die woorde gaan ‘I will praise Him in the storm’ – laat ons God loof en prys nie net wanneer dit goed gaan nie, maar ook wanneer dit sleg gaan. Laat ons vra Vader wat moet ek uit hierdie situasie leer, want in elke situasie is daar iets wat ons moet leer.
Op hierdie vriesende koue Maandag en die hele week deur, kom ons prys God en maak Sy naam groot, want Hy is waardig in goeie en slegte tye.
© Marsofine Krynauw