Net een waarborg ... dit is God!

Dagsê Vriende,

Die dag het met my weggehardloop, maar ek is nie bang nie, want ek het die wêreld se tyd. Dit was ook alles vir ‘n baie, baie goeie doel. ‘n Vriend van my wie se getuienis ek die voorreg gehad het om vir hom voor te berei om in boekvorm uit te kom, was hier.

Hy het die gewoonte om net op te daag en van my hek te bel en te sê: Ouma maak oop, ek is lus vir koffie. Hierdie keer moes ek hom eintlik verwag het, want net gister het ek vir die Vader gevra om hom na my toe te stuur dat ek bevestiging kan kry oor iets waaroor ek twyfel.

Getrou soos ons Vader is, sonder dat ek Christo gebel het, kom hy vanoggend hier aan vir koffie. Dit is hoe getrou ons Vader is as ons Hom vra.

Op hierdie trant wil ek dit wat ons Vader op my hart gelê het met julle deel vandag. Die skrif kom uit Habakuk 3 en ons ken dit sekerlik almal.

Habakuk 3:17Al sou die vyeboom nie bot nie
en daar geen druiwe aan die wingerde wees nie,
al sou die olyfoes misluk
en die lande geen oes lewer nie,
al sou daar geen kleinvee in die kampe meer wees nie
en die beeskrale sonder beeste wees,
18nogtans sal ek in die Here jubel,
sal ek juig in God, my Redder.
19Die Here my God gee vir my krag.
Hy maak my voete soos dié van 'n ribbok,
op hoë plekke laat Hy my veilig loop.

Die naweek gesels ek met ‘n vriendin van my daar teen die Olifantsrivier. Haar man is ‘n druiwe boer soos so baie van die mense daar wat ek ken en ook my eie broer.

Ek hoef nie vir julle te vertel dat die rivier hierdie jaar twee maal hewig oorstroom het nie. Dat die boere wat teen die rivier grond het, se grond twee maal vir lang periodes onder water was nie. Ook nie dat een van daardie kere juis was toe die druiwe moes bod nie.

Sy vertel my hoe hulle die druiwe omgery het, en sy so van ver af sien hoe pragtig die bome bod, dit is net groen loof waar jy kyk. Toe hou haar man stil en hulle klim uit en gaan na die bome – verstom was sy toe sy sien dat daar aan die mooi groen bome geen vrugte was nie.

Dadelik het dit my aan Habakuk laat dink. Hoeveel van ons is daar waar ons nie ‘n oes het of gaan hê nie. Tog leer Habakuk ons, dit is juis dan wat ons ten volle op ons Vader moet vertrou.

Dit sluit toe so mooi aan by die gesprek wat my vriende en ek vanoggend gehad het. My vraag aan hom was, moet ek nou die versekering en polisse stop? Die oes is oral swak. Sê ek nie deur dit te stop dat ek nie op ons Vader vertrou nie?

Sy antwoord: “Jy moet dit stop, want in die eerste plek in die versekering en polisse net jou eie planne om te probeer sorg vir die toekoms. Jy met God ten volle vertrou vir vandag en die toekoms, en nie jou eie agterdeure probeer oop hou nie.”

Dit laat my dadelik aan hierdie selfde man se getuienis dink – hoe hy toe en tot vandag toe God onvoorwaardelik vertrou. Hoe hy elke dag in alles die vraag wat God Hom bly vra: “Hoeveel is jy bereid om My te vertrou?” bly antwoord deur sy doen en later met ‘n ‘ten volle Vader, altyd ten volle’.
Ek het gevra dat hy met kom koffie drink, God het hom gestuur. God het hom die antwoord gegee wat ek moes hoor – steeds is die finale handeling in my hande. Gaan ek God vertrou en hierdie polisse en versekering kanselleer?

Vriende, so baie kry ons die antwoorde wat ons soek, maar die besluit bly in ons hande. God sal voorsien, vir die boer aan wie se wingerde daar byna geen oes is nie, en ook vir my en jou – ons moet net gehoorsaam wees en Hom ten volle vertrou.

Vra jy vir die antwoord en weier dan om te doen wat God jou vra? Gee oor, onvoorwaardelik, Hy belowe om jou te dra, dat Hy jou belange op sy hart dra en glo my Hy doen.

My huisie teen die water

Hier in my huisie teen die water
waar ek daglank woorde vind
om mense te laat wonder
wat hul in die volgende hoofstuk vind


hier in my huisie teen die water
waar ek vriendinne laat skater
oor die dinge wat ek sê
wat my soms so na aan die hart lê


hier in my huisie teen die water
goed in die boom geanker
met wortels tevrede en gevoed
deur die meer se water


hier in my huisie teen die water
waar ek daglank woorde vind
oor liefde, die leed van ander
en vele vele meer
my gedagtes kan vry laat sweef
saam en vry soos die voëls
wat hier gaan
maar saans weer 'n nes vind
net hier bo my boomhuisie
saam met my droom
oor môre se mooi
as ek weer saam met hul
in my gedagtes vlieg
na vere lande
mooi wit strande
of
ander plekke waar die seer
van geliefdes mekaar se harte verteer
om terug te keer
na my huisie
geanker in die boom
waar ek my eie drome droom.
(c) Marsofine Krynauw

Waar lê jou lojaliteit?

Goeiedag Vriende,

Nouja, vanoggend behoort ‘n besonderse goeie oggend vir die meeste van julle te wees, want die Bokke het gewen. Hoekom verbeel ek my dan ek hoor ‘n gebrom wat klink soos ‘wat sal die Bokke se wen nou aan ons uitdagings verander?’ As ek reg is, is ek bly.
Hoekom is ek bly as julle so presies dit brom?

Voor en na die rugby, het ek baie gewonder, en het die Heilige Gees gedurig die vraag op my hart gelê. Hoe is dit dat mense so mense kan aanbid? So kan aangaan oor mense, so kan toelaat dat mense hulle hele lewe en gemoedstoestand oorheers.

Hierdie rugby het vir ‘n baie lang tyd die aandag en tyd van miljoene mense in beslag geneem. En glo my ek weet dat hierdie boodskap op baie tone gaan trap, maar ek is die boodskapper wat graag hierdie boodskap uitstuur.

Mense het laat wakker gebly, hulle dood gestres, kwaad geraak, geskree en gegil op vyftien mense oor wie se doen en later hulle geen beheer het nie. Steeds het hulle vas bly staan agter hierdie mense, hulle vertrou om die Wêreldbeker vir Suid-Afrika huis toe te bring.

Die vraag is, doen ons soveel moeite vir ons Vader? Spandeer ons soveel tyd in Sy woord om vas te stel wat sy wil en sy wense vir ons is? Spandeer ons soveel tyd in gebed vir ons land, vir ons mens, vir ons siele?

Dit was baie opmerklik dat die kerk gister weereens baie leeg was, want sien almal het mos Wêreldbeker gekyk en seker daarna gevier. Dus is hulle moeg.

God moet eers wag tot ons weer reg is en weer Hom nodig het. Waarmee is ons besig? Is ons besig om die mens en sy dinge so te aanbid, dat ons nie by God uitkom nie? Dat ons net na Hom gryp as ons hom nodig het?

Vandag moet jy met jouself eerlik wees, want sien jou antwoord gaan my nie beïnvloed nie, net my eie antwoord kan en daaraan moet ek self werk. Die Vader ken reeds jou antwoord.

1 KONINGS 8:27 AFR83
“Sou God werklik op die aarde woon? Die hemel, selfs die hoogste hemel, kan U nie bevat nie, hoe dan nog hierdie tempel wat ek gebou het!

Hierdie vers het vanoggend my asem weg geslaan. Dit is die beste beskrywing van ons Almagtige Drie-Enige God wat ek nog gelees het in Sy Woord.

Tog is dit dieselfde Vader, vol van liefde, vol van genade, vol van barmhartigheid, vol van voorsiening, wat ons so maklik eenkant toe stoot vir die mense en dinge van hierdie wêreld.

Vanoggend is die Wêreldbeker gewen, die opwinding is verby … lyk dinge anders in jou lewe? Nee, want dit is nie die ding wat jou voortbestaan en vreugde kan waarborg nie. Dit is net ons Vader wat dit kan doen.

Vriende, hoekom is dit so moeilik vir ons om tyd te spandeer met die Een wat ons lewe in Sy hand hou? Ons al vir soveel jare dra. Ons liefhet, ons belange op die hart dra. Hoekom wil ons Hom nie beter leer ken nie?

Het dit nie tyd geword om voorraadopname te hou van jou lewe nie, en daarna met die Een te begin ‘n verhouding bou wat so lank al wag, steeds getrou was al was die verhouding net so eensydig van Sy kant af.

Mag ons eerlik met onsself wees, en ons tyd so begin spandeer met die Een wat dit ewigheidswaarde kan gee.

Blywende vreugde ...

 Goeiemôre Vriende

Nog ‘n week se uurglas het uitgeloop en vanoggend is dit koeler, want die windjie roer so bietjie. Hierdie naweek is een waaroor baie ontsettend opgewonde is – die Bokke speel eindstryd. Julle moet dit geniet en mag die beste span wen.

Vanoggend kom deel die Prediker sy wysheid met ons in Prediker 2:1-10 en wil ek dit graag met julle deel, want ek glo ons was al almal op die plek waar ons soos die Prediker geglo het.

PREDIKER 2

Vreugde en rykdom gee geen geluk nie.

1EK het in my hart gesê: Nou ja, ek sal jou met vreugde op die proef stel; geniet dan die goeie! Maar kyk, ook dit was tevergeefs.

2Van die lag het ek gesê: Dit is onsinnig! en van die vreugde: Wat verskaf dit?

3Ek het in my hart daaroor nagedink om my liggaam met wyn te verkwik — terwyl my hart my met wysheid sou lei — en om aan die dwaasheid vas te hou totdat ek sou sien wat goed is vir die mensekinders, wat hulle moet doen onder die hemel gedurende die getal van hulle lewensdae.

4Ek het groot werke onderneem: ek het vir my huise gebou, ek het vir my wingerde geplant.

5Ek het vir my tuine en parke aangelê en daar allerhande vrugtebome in geplant.

6Ek het vir my damme gemaak om daaruit 'n bos met jong bome te besproei.

7Ek het slawe en slavinne gekoop en ook dié verkry wat in my huis gebore is; ek het ook 'n groot besitting van beeste en kleinvee gehad, meer as almal wat voor my in Jerusalem gewees het.

8Ek het vir my ook silwer en goud versamel, en 'n eiendom van konings en provinsies; ek het vir my sangers en sangeresse verskaf en die genoeëns van die mensekinders: lieflinge in menigte.

9En ek het groot en altyd groter geword bo almal wat voor my in Jerusalem gewees het; ook het my wysheid by my gebly.

10En alles wat my oë begeer het, het ek hulle nie ontsê nie; my hart het ek van geen enkele vreugde teruggehou nie, want my hart het hom verheug vanweë al my moeitevolle arbeid, en dit was my deel van al my moeitevolle arbeid.

11Toe het ek gekyk na al my werke wat my hande tot stand gebring het, en al die moeitevolle arbeid wat ek verrig het — en kyk, dit was alles tevergeefs en 'n gejaag na wind, en daar was geen voordeel onder die son nie.

12Daarna het ek my begewe om wysheid en onverstandigheid en dwaasheid in oënskou te neem, want wat sal die mens kan doen wat ná die koning kom? Wat lankal gedoen is!

13Wel het ek gesien dat die wysheid die voorkeur het bo die dwaasheid soos die lig die voorkeur het bo die duisternis:

14die wyse het sy oë in sy hoof, maar die dwaas wandel in die duisternis. Maar ek het óók ingesien dat een en dieselfde lot hulle almal tref.

15Daarom het ek in my hart gesê: Dieselfde wat die dwaas tref, sal my ook tref; waarvoor was ek dan so buitengewoon wys? En ek het in my hart gespreek dat dit ook tevergeefs is.

16Want daar sal op die duur net so min gedagtenis wees van die wyse as van die dwaas, omdat in die dae wat kom, alles lankal vergeet is; en hoe sterf die wyse net soos die dwaas!

17Daarom het ek die lewe gehaat, want die werk wat onder die son gedoen word, het my mishaag, omdat alles tevergeefs is en 'n gejaag na wind.

18En ek het gehaat al my arbeid wat ek onder die son met moeite verrig het, dat ek dit moet oorlaat aan 'n mens wat ná my sal kom.

19En wie weet of hy 'n wyse sal wees of 'n dwaas? Tog sal hy heers oor al my arbeid wat ek met moeite verrig en met wysheid verwerf het onder die son. Ook dit is dan tevergeefs.

20Daarom het ek my begewe om my hart aan wanhoop oor te gee vanweë al die arbeid wat ek met moeite verrig het onder die son.

21Want daar is 'n mens wat hom met wysheid en kennis en bekwaamheid vermoei het; tog moet hy dit as deel oorgee aan 'n mens wat daaraan geen moeite bestee het nie. Ook dit is tevergeefs en 'n groot euwel.

22Want wat het die mens vir al sy arbeid en vir die strewe van sy hart waarmee hy hom vermoei onder die son?

23Want al sy dae is smarte, en sy bemoeienis is verdriet; selfs snags rus sy hart nie. Dit is dan ook tevergeefs.

24 Dit is nie 'n goed wat in die mens kleef dat hy eet en drink en sy siel die goeie laat geniet by sy moeitevolle arbeid nie. Ek het gesien dat dit ook kom uit die hand van God.

25Want wie kan eet en wie kan geniet sonder Hom?

26Want aan 'n mens wat welgevallig is voor sy aangesig, gee Hy wysheid en kennis en vreugde, maar aan die sondaar lê Hy die taak op om bymekaar te maak en te versamel, om dit dan te gee aan een wat welgevallig is voor die aangesig van God. Ook dit is tevergeefs en 'n gejaag na wind.

Net om soos die Prediker te vind dat alles ‘n gejaag na wind is en ons steeds nie blywende geluk geniet nie.

Dat nie ons rykdom, vriende, besittings, partytjies, ontugtige lewe ons plesier verskaf nie.

Ons hoogste goed en ons enigste blywende vreugde lê in ons Drie-enige Vader, Seun en Heilige Gees.

Ons kan eers gelukkig wees, as ons tevrede is met dit wat God ons elke dag mee seën, of dit baie of min is. Ons geluk lê nie in ons besittings, of bank balans nie, net in ons God.

Wanneer ons die naweek waar ook al met wat ook al besig is, kom ons vra onsself … bring hierdie vir my blywende geluk? Eer dit my Vader, die Een wat my elke oggend wakker maak? Gee ek die tyd aan Hom wat my lewe gee wat ek aan aarde dinge en genietinge gee? En wat bring dit my in die sak?

Kom ons vind ons vreugde in die Here. Hy het my vanoggend wakker gemaak met die ou bekende liedjie – Al die veld is vrolik in my kop. Asof ek dit gister nog gesing het het die woorde deur my gedagtes gedraal en ek het net geweet, my Skepper God is groot en almagtige en net in Hom kan ons vreugde vind.


Al die veld is vrolik; al die voëltjies sing;

al die kriekies kriek daarbuit’; elke sprinkaan spring.

Al die koggelmannetjies kom om fees te vier;

hier galop ‘n goggatjie, daarso dans ‘n mier.



Selfs die vissies spartel teen die kafferskuil;

in die groot ou eikeboom droom ‘n oupa-uil.

Oral in Karooland is ‘n ruik versprei:

boegoeblom en appelkoos–kan jy beter kry?



Bind vir my tesame katjiepiering wit,

bobbejaantjies blou en bont, rose in gelid,

varings van die klippe, oral, ai só mooi,

rooi kalkoentjies uit die vlei–blomme uitgestrooi.



Vrolik is die wêreld, vrolik rant en vlei!

Elke koggelmannetjie het sy maat gekry.

Elke gons’rig’ goggatjie is getroud of vry:

vrolik is die wêreld hier, vrolik veld en vlei!



Nou gaan die kinders draai, nou gaan hul speel!

Kom Sus, gee handjie! Almal moet draai!

Boet gee ook handjie! Nou gaan ons swaai–

dis tog so prettig! Wie dans met my?

Al in die rondte, vrolik en bly!

Kom Sus, gee handjie! Almal moet draai!

Boet gee ook handjie! Nou gaan ons swaai–

dis tog so prettig! Wie dans met my?

Al in die rondte, vrolik en bly!



Woorde: C. LOUIS LEIPOLDT



Mooi loop.

Meel is sleg, maar beskuit is heerlik!

Goeiemôre Vriende,

Laat ons wikkel terwyl die dag nog koeler is, want somer is hier in Windhoek as julle gewonder is waar sy is. Daarby is sy hard aan die werk, maar steeds is ek dankbaar dat ek in Windhoek woon en nie in Vredendal nie. Ek sal daardie drukkende, klam hitte in my hele lewe seker nooit vergeet nie. Tog verkies ek steeds somer ver bo winter.

Vanoggend kom deel ek graag met julle ‘n gebed wat ek ontvang het wat vir ons elkeen ‘n les of twee in het.

‘n Boer se bed ...

Die nuwe dominee op die dorp word uitgenooi na 'n manne-ontbyt saam met 'n groep boere. Hulle vra een van die ouer boere om die seën vir die ete te vra.
"Here" begin hy.
"U weet hoe ek karringmelk haat.
Die dominee is geskok.
Hy loer onderlangs na die boer.
Hy is ongemaklik, hy weet nie wat om te dink nie.
"Here ek haat varkvet"
bid die boer voort.
Die dominee is geskok. Hy loer weer onderlangs na die boer.
Hy is ongemaklik, hy weet nie wat om te dink nie.
"En Here, U weet dat ek rou koekmeel nie kan vat nie", bid die boer voort.
Die dominee loer weer en sien dat van die ander boere ook ongemaklik raak.
Die boer bid voort:
"Maar Here, wanneer ons dit alles saamgooi, dit meng en bak, kry ons die lekkerste beskuit.
So, Here, wanneer dinge gebeur waarvan ons nie hou nie, wanneer die lewe druk en ons sukkel om te verstaan wat U vir ons wil sê, help ons om te ontspan en op U te wag, terwyl U die bestanddele meng en beskuit bak.
Ons kan nie wag vir die beskuit nie.
Daar is baie dinge waarvan ons nie hou nie en die mengproses is nie altyd lekker nie, maar kom ons ontspan en fokus op die eindproduk. Kom ons sien met verwagting uit na dit wat God vir ons wil gee.
My "beskuit" is in die Here se oond!!
Ek kan nie wag nie . . !
Amen ...

Hierdie het my laat besef, hoe dikwels ons vaskyk in die dinge waarvan ons nie hou nie, en die deurbraak mis waarvan dit deel is. Ons fokus op die negatiewe, en sien nie die positiewe wat God besig is om te doen nie.

Dit kom net weer terug daarna dat ons elke dag aan ons Vader moet oorgee – algeheel en Hom ten volle moet vertrou met waarmee Hy besig is in ons lewens.

Ons mag Hom vra om ons deur sy Gees vrede en rustigheid en geduld te gee om te wag op Sy uitkoms wat die beste vir ons is.

Terwyl ons wag moet ons waak daarteen om gedurig dood oor onsself te spreek. Soos bv. ‘ek weet nie hoe ek my rekening gaan betaal nie’ of ‘ek gaan nooit uit hierdie gemors kom nie’ of ‘ek sal nooit gesond word nie’. Ons besef dit nie, maar baie van die dinge wat in ons lewens deurmekaar is, is ons eie woorde wat ons gespreek het.

Gaan sit vandag en dink aan die dinge wat jy oor jouself spreek. Daardie klaagliedere, daardie ontevredenheid. Begin spreek lewe in jou lewe, want dit is wat God vir jou het.

Is jy werklik gesond?

 

Dagsê Vriende

Die dag het ook al aan beweeg, maar soms roep plig mos maar en moet ons toegee. Vanoggend het ek eers my huisie bietjie bederf en alles weer mooi skoon gemaak. Stok flou, rug seer, maar gelukkig.
Vandag wil ek met julle ‘n ware storie deel wat besig is om nou te gebeur. Sowat twintig jaar gelede het ek met ‘n man uitgegaan wat ek in die gimnasium ontmoet het. ‘n Man wat net spiere is en sowat nege jaar ouer as ek maar hy lyk twintig jaar jonger as ek.

Ons was albei fiksheidsmal daardie tyd. Ek het elke dag vyf uur in die oggend vir twee ure gaan oefen, en ek bedoel oefen. Hy was bekend in fiksheidskringe, het al aan wêreldkampioenskappe deel geneem en weet hoe om ysters en baie swaar ysters daarby op te tel.

Dit is nie al nie, hy eet ook net presies kosse wat gesond is. Hy eet nie vet, suiker, stysel, junk food, nie. Hy is vandag al sewentig jaar oud en vir die laaste sewentien jaar het hy sy eie gym by sy huis dat hy ongeveer drie tot vyf ure ‘n dag kan oefen.

Gisteraand kry ek ‘n boodskap van ‘n vriendin wat ons afgerig het jare gelede. ‘Eric kry môre ‘n baie groot hartomleiding. Bid asseblief vir hom.’

Was ek verstom? Ja beslis. Hier is ‘n man wat gemiddeld drie ure ‘n dag oefen en reg eet sy hele lewe lank. Hy drink nie, hy het nie ‘n vrou of kinders wat hom bekommernisse kan gee nie. Ons kyk van buite en is van mening die man moet so goed soos nuut wees.

Ek kontak hom toe en al wat ek kan sê ek was verstom vir hoe God se planne werk.
Al drie sy hoof slagare wat na sy hart gaan is toe … nie vernou nie, toe! Die kardioloog is verstom dat hy nog leef. Dat hy nie eers ‘n hartaanval nog gehad het nie. Vanoggend het hy ‘n driedubbele hartomleiding gekry.

Wat het ek hieruit geleer? Ons kan oefen, ons kan reg eet, maar as God se plan anders lyk, sal dit so gebeur. Ons dink ons kan ons lewens beheer, ons lewenskwaliteit beheer, maar dit is nie so nie, ons Skepper is in beheer. Niks wat ons kan doen, kan ons een uur of een dag of een jaar langer laat leef as ons tyd wat God bepaal het nie.

Ons kan spook en stoei, maar as ons nie ons lewens in God se hand sit nie, sal ons gespook en gestoei niks oplewer nie. Nie jou geld, jou posisie, jou plaas, jou familie agtergrond, of wat ook al beteken vir jou iets as jy nie vir God het nie. Salomo was nie verniet die wysste man op aarde nie – sy woorde is werklik waar, want hy het hulle immers van God self gekry – sonder ons Drie-enige God, is ons niks en is alles ‘n gejaag na wind.

Hierdie man het geld, hy het geglo hy het gesondheid, hy het op sewentig die lyf van ‘n dertigjarige jongman, hy wil nie kinders en ‘n vrou hê nie want hy wil niks nonsens in sy lewe hê nie – maar wat het dit hom gehelp? Niks.

Ek is dankbaar om te kan sê dat hy wel intussen vir Jesus aangeneem het. My woorde aan hom gisteraand was: God het beslis nog ‘n plan vir jou lewe, dit is hoekom jy nog leef met drie toe slagare.
Ons Vader se genade verbyster my elke dag. Al wat ons kan doen is dankbaar wees en elke oggend nuut ons lewens oorgee aan Hom.

Leer van Jesus ... moenie die vyand glo nie!

Goeiedag Vriende,

Pragtige somersdag in Windhoek, wat die vyand baie hard probeer het om vir my om te krap. Tog het ons Vader net weer ingetree en dit omgedraai en gewys hoe getrou Hy is.

Vandag wil ek weer met julle oor twee gedagtes deel. Die eerste een is: Is ons gewillig om van Jesus te leer? Uit sy Woord te leer?

Matteus 4:23Hy het toe in die hele Galilea rondgegaan en die mense in hulle sinagoges geleer, die evangelie van die koninkryk verkondig en elke soort siekte en kwaal onder die volk gesond gemaak.
Van die vroegste tyd af toe Jesus nog op aarde gewandel het, het hy gedurig mense geleer. Hoekom het Hy en wil hy steeds vir ons leer?

Hy wil ons leer om ons toe te rus om die regte besluite te kan maak, besluit wat ons nie sal laat seerkry of skade berokken nie.

Hy wil ons leer om op die regte manier met alle mense om te gaan.

Hy wil ons leer dat ons ‘n gelukkige en oorvloedige lewe kan geniet en nog baie, baie meer.
Hoe leer Hy ons vandag? Hy leer ons deur sy Woord. Al Sy wysheid is daarin opgeteken vir ons, ons moet dit net gaan lees en ons eie maak.

Die tweede gedagte wat ek met julle oor wil gesels is een wat ons al almal in ons lewens ervaar het: Bitterheid, waarmee saam tweedrag en onvergewensgesinheid gaan.

In ons alma se lewens is daar iewers iemand wat ons al te na gekom het. Ons al baie seer gemaak het. Ons al baie skade berokken het.

Wanneer dit gebeur gooi dit ons lewens omver, en vorm daar ‘n wrok of bitterheid in ons harte. As ons aan hierdie persoon dink, voel ons daardie seer, bitter gevoel. Daardie gevoel van as ek net aan jou kan doen wat jy aan my gedoen het.

Tog is dit nie wat Jesus wil hê nie en God ons Vader is baie duidelik in die Woord oor hoe hy daaroor voel.

Efesiers 4:31Moet nooit verbitter of opvlieënd wees of woedend word nie; moenie vloek of skel nie; moet niks doen wat sleg is nie. 32Wees goedgesind en hartlik teenoor mekaar, en vergewe mekaar soos God julle ook in Christus vergewe het.

Soms word ons bitterheid deur vriende of familie aangehits. Hulle ken jou storie, en hulle sorg dat jy gereeld herinner word hoe ‘n groot onreg daardie persoon jou aangedoen het. Hulle gee jou simpatie en die bitterheid bly brand in jou hart. Dit is om tweedrag te saai en glad nie aanvaarbaar vir ons Vader nie. Inteendeel dit word duidelik in Spreuke genoem dat dit een van die dinge is wat God haat.

SPREUKE 6:16-19 NLV
Daar is ses dinge wat die HERE haat, nee, eintlik sewe dinge waarvan Hy ’n afsku het: oë vol hoogmoed, ’n tong wat lieg, hande wat onskuldiges doodmaak, ’n hart wat slegte planne beraam, voete wat agter kwaad aanloop, ’n vals getuie wat leuens verkoop, en iemand wat rusie veroorsaak tussen broers.

Ons moet ons bitterheid, ons ongelukkigheid, die onreg wat mense ons aandoen, by God se voete gaan neersit. Die oordeel en vergelding kom ons nie toe nie. Ons moet vergewe soos God ons vergewe. Dat dit nie maklik is nie, is so. Dit is presies waar ons leerbare gees inkom. As ons bereid is dat Jesus ons leer, sal ons sien dat Hy geen bitterheid gehad het teen oor die wat hom onregverdig laat kruisig het nie. Geen bitterheid teenoor ons wat die eintlike oorsaak is dat ons Vader sy eie Seun laat sterf het vir ons sondes nie.

As ons ‘n leerbare gees het en uit God se Woord bly leer, sal ons weet dat ons moet vergewe, geen bitterheid mag dra in ons harte nie. Ook sal ons weet dat die God alles sien en weet. Hy weet van die onreg wat jou aangedoen is, daarom as jy Hom vra om dit vir jou te hanteer, sal Hy jou deur Sy Gees bystaan en lei om die pad te loop van vergifnis en jou vrymaak van daardie bitterheid.

Dit gaan ons niks help om bitterheid, tweedrag en onvergewensgesindheid in ons hart toe te laat as ons andersins die Vader voluit dien nie – want daardie drie gaan ons uit die hemel hou. Dit is nie my mening nie, vriende, dit is God se eie Woord en hart.

Kom ons beklaar ons elke dag bereid om deur God se Woord geleer te word deur Jesus se voorbeeld wat Hy self vir ons kom stel het op aarde. Hy het dit nie net uit die hemel dikteer nie, Hy het self op die aarde kom wandel, self die uitdagings beleef, self mense wat hom onreg aan gedoen het beleef, is self deur die vyande versoek.

Hy praat dus nie oor dinge waarvan Hy niks kennis en ondervinding het nie, maar uit eerstehandse ondervinding. Ons kan maar luister en leer en bedag wees dat die vyande elke geleentheid in ons lewens wil gebruik om ons uit die hemel te hou.

Kom ons volg die Een wat Sy liefde aan ons reeds bewys het, en nie die een wat net die leuen aan ons voorhou nie.

Waar is jy?

Goeiemôre Vriende,

Hier in Windhoek is dit ‘n heerlike, mooi nuwe week en mׅôre. My naweek was heerlik en beslis minder bedrywig as van julle s’n. Ek het gehoor van ‘n fees wat daar was, en my ondervinding van hierdie feeste is dat hulle party mense uitgeput laat vir ‘n week, ander ongelukkig en baie min tevrede. Ek hoop egter dat julle almal gelukkig is op hierdie Maandagoggend.

So met die intrap in die nuwe week in wil ek meer as een gedagte met julle deel.

Die eerste vraag is: Het jy geestelik gegroei in hierdie jaar?

Jou antwoord mag dalk ‘n vinnige ja wees. Maar hier is die toets. Jou vriendskappe einde altyd in ‘n onenigheid, jou verhouding met jou familie is suur, en dit is altyd dieselfde patroon hoekom dit suur is. Jy doen dinge nog net soos jy dit gedoen het ‘n jaar gelede.

Dan ongelukkig moet jou antwoord nee wees. Ons kan net geestelik groei as ons bereid is om verantwoordelikheid te vat en dinge anders te doen. Daarmee sê ek nie jy is altyd die skuldige nie, dit beteken net dat omdat ons geestelik groei, ons bereid is om die minste te wees, die vredemaker te wees, anders op te tree.

Daarmee saam wil ek met julle deel wat Past Rynier Nolan vanoggend gedeel het. Die bekende Onse Vader gebed is die gebed wat Jesus self vir sy dissipels gegee het. So dikwels moedig ons ons kinders of selfs vriende aan om die gebed te bid as hulle nie weet wat om te bid nie.

Dit kan baie gevaarlik wees. Hoekom? Die gevaar lê in die vers 12 – ‘12en vergeef ons ons oortredings soos ons ook dié vergewe wat teen ons oortree;’

Matteus 6: 9“So moet julle bid:
“Ons Vader wat in die hemel is, laat u Naam geheilig word;
10laat u koninkryk kom; laat u wil ook op die aarde geskied, net soos in die hemel.
11Gee ons vandag ons daaglikse brood;
12en vergeef ons ons oortredings soos ons ook dié vergewe wat teen ons oortree;
13en laat ons nie in versoeking kom nie maar verlos ons van die Bose.
14“As julle ander mense hulle oortredings vergewe, sal julle hemelse Vader julle ook vergewe. 15Maar as julle ander mense nie vergewe nie, sal julle Vader julle ook nie julle oortredings vergewe nie.”

Watter gevaar praat hy van? Die gevaar wat baie duidelik in vers 14 aan ons verduidelik word. As jy hierdie frase bid, moet jy almal in jou lewe maklik vergewe. Jy verwag mos dat God jou elke dag moet vergewe ongeag wat jy verkeerd doen. Met hierdie frase belowe jy om soos God te vergewe.

Hoe nou?

Ons kan die bogenoemde net regkry as ons volkome aan God oorgee. In Jakobus 4:7, 10 is die belofte duidelik.

Waarskuwing teen wêreldliefde en hoogmoed

Jakobus 4:1Waar kom die stryd vandaan, waar kom die rusies onder julle vandaan? Kom dit nie van julle selfsugtige begeertes wat gedurig binne-in julle woed nie? 2Julle wil dinge hê, maar kry dit nie en wil dan moord pleeg; julle is jaloers op 'n ander man se goed en kan dit nie in die hande kry nie en dan maak julle rusie en baklei julle. Julle kry nie, omdat julle nie bid nie. 3As julle bid, ontvang julle nie, omdat julle verkeerd bid: julle wil net julle selfsugtige begeertes bevredig. 4Weet julle nie, julle ontroues, dat vriendskap met die wêreld vyandskap teen God is nie? Wie 'n vriend van die wêreld wil wees, wys daarmee dat hy 'n vyand van God is. 5Of dink julle dat die Skrif sonder rede sê dat God die gees wat Hy in ons laat woon, heeltemal vir Homself wil hê? 6Maar die genade wat Hy gee, is nog groter. Daarom sê Hy:
“God weerstaan hoogmoediges,
maar aan nederiges gee Hy genade.”
7Onderwerp julle dan aan God. Staan die duiwel teë en hy sal van julle af wegvlug.8Nader tot God en Hy sal tot julle nader. Was julle hande, sondaars, en reinig julle harte, huigelaars. 9Bekla julle ellende, treur en huil! Laat julle vrolikheid in rou verander en julle blydskap in droefheid. 10Onderwerp julle in nederigheid voor die Here, en Hy sal julle verhoog.

In hierdie gedeelte maan Jakobus ons oor ons selfsug, one eie ek, ons hoogmoed. Hy stel dit baie duidelik dat ons net deur dit af te lê en naby God en in God se wil te probeer lewe die uitdagings in ons lewens sal kan oorbrug. Dit is wanneer ons aan die wêreld met sy dinge bly vasklou wat ons nie kan vergewe nie, wat ons eie ek nie wil sterf en ons God die eerste plek in ons lewens wil gee nie.

Ons Vader se beloftes staan van ewigheid tot ewigheid. Ons moet dit net aanvaar en elke dag vir Sy leiding deur die Gees vra om dit te leef soos reeds vir ons voorgeskryf is in sy woord.

Mag ons almal ‘n begeerte hê om te groei in Christus, om nader en nader aan ons Vader te leef elke dag. Dan sal ons Sy vrede ervaar, al is ons omstandighede ook al wat omdat ons weet ons hoef niks alleen aan te pak nie.

Hou aan ... moenie opgee nie.

 Goeiemôre Vriende,

Vanoggend groet ek julle met ‘n nog meer dankbare hart en heeltemal in verwondering oor ons Vader se guns, seën en liefde op my woorde. Gisteraand is twee van my boeke as boekpryse tydens die Prysuitdeling van Lutzville Hoërskool aan die matriekleerling gegee wat die beste punte in Afrikaans behaal het. Ek is nederig dankbaar vir hierdie voorreg om terug te ploeg in my alma mater waar ek my liefde vir Afrikaans ontwikkel het.

Vanoggend luister ek na die oordenkings, en dit val my weereens op dat die boodskap van twee pastore dieselfde is.

Albei moedig aan om te volhard. Om soos Matteus 7:7 ons ook vertel om te doen, aan te hou vra, aan te hou soek, aan te hou klop en ons Vader sal jou verhoor.

Matteus 7: 7“Vra, en vir julle sal gegee word; soek, en julle sal kry; klop, en vir julle sal oopgemaak word, 8want elkeen wat vra, ontvang; en elkeen wat soek, kry; en vir elkeen wat klop, sal oopgemaak word.

As jou kind weg raak, gaan jy net by jou bure soek? Nee, jy gaan beslis die hele wêreld omkeer en soek en aanhou soek totdat jy jou kind kry. So vasberade moet ons ook vir God en sy seëning soek.

Opgee is nie ‘n opsie nie. Daardie saak wat jy al so lank oor bid, moenie opgee nie. Die vyand wil hê ons moet opgee. Maar jou deurbraak is op pad. Ons Vader is groter as die uitdagings van die wêreld.

Dit is tyd dat jy die werke van die vyand bind. Sonder jouself af en bid tot ons Vader.

Daar is vandag mense wat nie weet hoe om die rekeninge te betaal nie, wat nie weet hoe oor hul huwelik nie, nie weet hoe oor hul kinders nie. Roep uit tot ons Vader, Hy hoor jou.

Wat ook al jou berg, weet dat God jou nooit sal begewe en verlaat nie. God sal jou deur jou verlies dra. Hy sal jou deur jou matriek eksamen dra. Hy sal jou deur jou finansiële uitdaging dra. Hy sal jou deur wat ook al dit is wat jou hopeloos maak, dra.

Matteus 11: 28Kom na My toe, almal wat vermoeid en belas is, en Ek sal julle rus gee.

Bid, en weet dat God nog nie klaar is met jou nie. Hy het jou lief, Hy sal jou nooit los nie.

Gaan hierdie naweek in met die wete wat ook al jou situasie, God weet. Opgee is nie ‘n opsie nie, bid geduring!

Vat jy raad?

Vriende,

Hoop by julle is alles wel. By my is dit presies soos ek daarvan hou, somer en oorgenoeg om my mee besig te hou.

Vanoggend wil ek kyk na iets wat ek glo baie mense sal raak. Ons is almal vreeslik gewillig om raad uit te deel aan ander, maar neem jy ook raad van ander?

As ons na ons vriende en familie en soms net kennisse luister, en ons hoor hulle sukkel met iets, dan is ons soms vinnig om raad te gee. Daarbenewens voel ons hulle moet ons raad neem, anders is hulle dwaas.

Is jy net so ontvanklik vir die raad van ander as wat jy is om dit uit te deel? Luister jy na jou vriende, jou vrou, jou man, selfs jou kind se raad? Of maak jy dit net af as nonsens?

Selfs die groot manne van God in die Woord soos Paulus, Dawid, Moses wat wys was en naby aan God geleef het, moes raad neem van vriende by tye.

Spreuke 19: 20Luister na raad en neem tug aan, sodat jy in die vervolg wys kan wees.
21 Baie planne is in 'n man se hart, maar die raad van die Here, dié sal bestaan.

Soms is ons so in die situasie dat ons nie kan sien wat om te doen nie, maar die mense daar buite sien. Dit is wanneer hulle jou kan bedien met raad omdat hulle dalk nie emosioneel betrokke is nie. Self Salomo, die wysste man op aarde het gevoel dat ons moet weet dit is wys om raad aan te neem.

Natuurlik moet ons daaroor bid en hoor of dit God se goedkeuring wegdra. Dit kan ons eers doen as ons geluister het, en dit oorweeg om daardie raad te gebruik.

Hierdie begrip kan ook deurgetrek word na ander dinge in ons lewens. Is jy die een wat altyd met almal besig is om te terg, ‘n grap te maak, ‘n poets te bak? Hoe tree jy op as hulle dit met jou doen?

Die begrip – as jy dit uitdeel, moet jy ook bereid wees om dit te vat kom na my. Dikwels dink ons nie wat ons uitdeel aan ander nie, maar as een van hulle dieselfde aan jou doen, is jy ontsteld.

Laat ons vandag bedag wees daarop om nie ander te wil dwing om ons raad te neem, om okei te wees met die grap, om die poets te moet aanvaar, terwyl onsself dit dalk nie sal kan hanteer as hulle dit doen nie. Kom ons vra onsself voor ons optree, voor ons praat, as die situasie omgedraai was, sou ek dit geniet het?

Baie mense kan nou aanvoer dit is hulle geaardhede – jy bepaal hoe jy optree – onthou asseblief vandag en elke dag dat elke mens waarmee jy in aanraking kom deur God na sy beeld geskape is, dan hulle so kosbaar vir Hom is dat Jesus, ons Koning vir hulle aan ‘n kruis moes sterf. Mense is almal kosbaar vir God, ongeag wat jou mening oor daardie mense is. Daarom moet ons baie sagkuns met ons medemens omgaan.

Laat ons nie die selfsugtige, impulsiewe, ongevoelige mense wees wat onsself daarop roem dat dit van ons gesê kan word: "fools rush in where angels fear to tread".

Ek laat julle vir die dag met die baie bekende Matteus 11:25 - “Kom na My toe, almal wat uitgeput en oorlaai is, en Ek sal julle rus gee. 29Neem my juk op julle en leer van My, want Ek is sagmoedig en nederig van hart, en julle sal rus kry vir julle gemoed. 30My juk is sag en my las is lig.”
As Jesus ons Verlosser se juk sag en las lig is, wie is ons dan om sy mense anders as met respek te behandel?

Nuus - soos 'n veldbrand ...

 Goeiedag Vriende,

‘n Lekker somersdag hier in Windhoek en die temperatuur gaan draai vandag by 34 grade. Dit mag dalk warm klink, maar as ek so na my vriendin in Hamburg, Duitsland luister en sy vertel hoe vriesend koud dit daar is, dan voel ek dankbaar.

Vanoggend luister ek na ‘n nuwe pastoor se oordenking wat een van my dierbare vriendinne aangestuur het en dit is so waar en treffend.

Hy kwoteer die alombekende gesegde: Die nuus het soos ‘n veldbrand versprei.

Daarna kom die uitklop hou. Ons ken almal sulke nuus wat so versprei. Ons weet almal dat dit gewoonlik ‘n skinderstorie oor iemand of die verval van die wêreld of een of ander slegte nuus is wat so versprei. Mense kan nie wag om dit te versprei nie.

Die vraag is, hoekom kan dit nie goeie nuus wees wat ons so versprei nie? Hoekom kan ons nie die evangelie so versprei nie. Evangelie beteken goeie nuus.

Die goeie nuus dat Jesus mens geword het, vir ons gesterf het dat ons die ewige lewe kan hê, ‘n verhouding met ons wil hê elke dag, nog steeds elke sekonde van die dag vir ons intree my Vader God.
Ken jy iemand anders wat bereid sal wees om in jou plek te sterf?

Ek ken nie ...

Ken jy iemand anders wat jou sal bly liefhê en seën al ken hulle jou diepste donkerste geheime?

Ek twyfel sterk.

In Romeine 1 groet Paulus ons deur te vertel dat hy geroep en afgesonder is om die Evangelie van God te verkondig. Hy herinner ons daaraan dat ons net soos hy geroep is, nie noodwendig om ‘n apostel te wees nie, maar om as kind van God die Evangelie soos ‘n veldbrand te versprei aan mense wat ons op ons lewenspad teë kom.

Romeine 1
Opskrif en seëngroet.
1PAULUS, 'n dienskneg van Jesus Christus, 'n geroepe apostel, afgesonder tot die evangelie van God —
2wat Hy tevore beloof het deur sy profete in die heilige Skrifte,
3aangaande sy Seun wat gebore is na die vlees uit die geslag van Dawid
4en na die Gees van heiligheid met krag verklaar is as die Seun van God deur die opstanding uit die dode, Jesus Christus, onse Here,
5deur wie ons genade en die apostelskap ontvang het om geloofsgehoorsaamheid te verkry onder al die heidene ter wille van sy Naam,
6onder wie julle ook is, geroepenes van Jesus Christus —
7aan al die geliefdes van God, geroepe heiliges wat in Rome is: Genade vir julle en vrede van God onse Vader en die Here Jesus Christus!

Kom ons leef uit wie ons in Christus is, kom ons wees Sy ambassadeurs, wat bemagtig word deur Sy bloed. Kom ons kweek ‘n leefwyse waar ons die goeie nuus soos ‘n veldbrand gaan laat versprei tot God se eer.

Is jy in die Geheimediens?

Dagsê Vriende,

Ek dink julle moet baie, baie besige mense wees. Hoekom dink ek so? Omdat daar ‘n paar duisend mense op die blad is waarvan net twee of drie ooit groet of deelneem. Het dit miskien daarmee te doen dat ons groot gemaak is dat mens nie oor die Woord van God praat nie? Ek hoop werklik nie so nie, want dan is ons almal in die moeilikheid.

‘n Pastoor het eendag gevra: Is julle ook van die Geheime Diens? Wat het hy daarmee bedoel? Of ek en jy ook van die is wat glo ons moet ons geloof geheim hou. Niemand mag daarvan weet nie. Ons mag nie daaroor praat nie. Net soos die agente van die Geheime diens.

Vriende, dit tyd is hier dat ons elke geleentheid moet gebruik waar ons kennisse, vriende, familie, wie ook al van Jesus se goeie nuus moet vertel. Anders hoe gaan ons Sy opdrag uitvoer dat almal kan weet wie Hy is, wat Hy vir ons gedoen het en wat dit vir ons beteken.

Daar is baie sulke onderwerpe wat taboe was toe ek opgegroei het, soos byvoorbeeld seks. Maar niemand is vandag meer bang om daaroor te praat nie. Hoekom kan hulle daaroor praat, daaroor hulle mening gee, maar nie oor die blye boodskap van Jesus nie?

Die blote waarheid is, dit gaan jou dalk uit die hemel hou. Die Woord is duidelik dat die begeertes van die vlees die dinge is wat tussen ons en ons Vader staan. Die eie wil, die eie begeerte.
Die waarheid is baie duidelik in die Woord:

LUKAS 9:26 AFR53
Want elkeen wat hom skaam vir My en my woorde, vir hom sal die Seun van die mens Hom skaam wanneer Hy kom in sy heerlikheid en dié van die Vader en van die heilige engele.

Dit is en bly ons opdrag tot die dag dat ons Koning Jesus kom om ons te kom haal. Moenie jouself flous met die gedagte dat ‘n ander mens se saligheid jou nie aangaan nie. Dit is ‘n leuen, want die Woord gee ons in meer as een plek die opdrag om soveel mense as wat ons moontlik kan na God te lei.

Net so min as wat jy jou kind kan sien steel en hom of haar nie daaroor aanpraat nie, net so min kan jy iemand anders sien in die verderf beland as jy iets daaraan kon doen deur hom na Jesus te lei.

Weereens hoef ons nie nou in vrees en bewing te staan omdat ons mense moet nader en hulle van Jesus vertel nie, maar ons kan rus in die wete dat Hy ons sal lei deur Sy Gees, Hy sal jou wys, jou die woorde en die ‘boldness’ gee. Jy moet net jouself gewillig verklaar. Daardie stemmetjie wat so in jou oor fluister: doen goed aan die persoon wat jy daar voor jou sien loop in die dorp – dieselfde stemmetjie sal jy ook lei.

Kom laat ons vissers van mense word, dit is immers ons opdrag van ons Vader.

Is jy gereed?

 Goeiemôre Vriende,

Dit voel my julle het julle koelte vir ons gestuur. Hier in Windhoek is dit van gisteroggend af koel en daar is ‘n windjie wat so speel-speel jou vertel dit is nie somer nie. Gelukkig kan ek nog binneshuis met somersklere oor die weg kom. Ek hoop julle het lekker gerus die naweek.

Aan die begin van hierdie week wil ek graag gesels oor iets wat ons al hoe meer hoor, beleef en weet dat dit voorwaar so is.

Ons leef in die laaste dae … Nou dit is nie net my mening nie, dit is die mening van byna elke pastoor waarna ek luister elke dag. Dit is die Woord wat God ons gegee het as ons na al die dinge wat in die wêreld besig is om te gebeur kyk.

Gister tydens ‘n diens, sê een van die pastore: Ons leef nie meer in die tyd toe ons gehoor het dinge gaan gebeur nie. Ons leef in die tyd wat die dinge besig is om te gebeur.

Jesus self het hierdie dinge reeds der duisende jare van te vore voorspel in Matteus 24.

Matteus 24: 6En julle sal hoor van oorloë en gerugte van oorloë. Pas op, moenie verskrik word nie, want alles moet plaasvind, maar dit is nog nie die einde nie.

7Want die een nasie sal teen die ander opstaan en die een koninkryk teen die ander; en daar sal hongersnode wees en pessiektes en aardbewings op verskillende plekke.

Ek is nie iemand wat nuus kyk, of luister nie. Steeds hoor selfs ek van persies hierdie dinge wat Jesus hierbo genoem het wat in die hele wêreld aangaan. Die grootste teken is die oorlog wat huidiglik in Israel begin het.

Tog het Jesus reeds toe gewaarsku dat dit nog nie die einde is nie.

Hoekom praat ons dan hieroor? Hoekom is dit so belangrik dat jy as christen dit weet en dit aan ander wat nog nie ‘n verhouding met die lewende God het moet vertel?

Pastoor Rynier het vanoggend gepraat van die keuse wat ons almal het om te maak. Dat daar nie meer vir ewig is om hierdie keuse te maak nie. Soos hy ook genoem het, is dit nie om mense vreesbevange te maak nie, maar eerder om ons Vader se wens dat nie een siel verlore moet gaan nie te bewerk.

Matteus 7:13 Gaan in deur die nou poort, want breed is die poort en wyd is die pad wat na die verderf lei, en daar is baie wat daardeur ingaan.

14Want die poort is nou en die pad is smal wat na die lewe lei, en daar is min wat dit vind.



Dit is moeilik om die nou pad te kies en te bewandel – dink jy nie dit was ook moeilik vir Jesus om die beker te kies en te drink nie?



Daar is ‘n prys om te betaal – vriende of selfs familie gaan jou dalk eenkant toe smyt. Jy sal dalk self moet besluit om nie meer saam met seker mense te stap nie, omdat hulle jou bly weg trek van Jesus af. Dink jy nie dat die prys wat Jesus moes betaal aan die kruis veel groter was as enige prys wat ek en jy moet betaal nie?

Kom ons gebruik hier ‘n beeld wat julle maklik sal verstaan. Om vir ‘n mediese dokter te leer, neem sewe jaar, daarna moet hy/sy nog ‘n hospitaal jaar doen en nog ek weet nie hoe lank voor jy as volwaardige dokter tot die medieseraad toegelaat kan word. Dit eindig egter nie hier nie. Hierdie persoon moet op ‘n gereelde basis seminare en kongresse bywoon om op datum te bly met die groeiende veld van die medies. Nuwe siektes, nuwe medisyne, nuwe metodes van behandeling.

Net so moet ons ook aanhoudend bly leer, bly sorg dat ons elke dag opnuut vir Jesus kies. Elke dag met nuwe ywer die nou weg stap. Deur ons eie krag sal ons dit nie reg kry nie, maar ons Vader is ‘n liefdevolle en genadige Vader. Daarom het Hy ons ‘n Helper gegee in die Heilige Gees.

Laat ons nie talm en rond speel met iets so belangrik soos ons saligheid en ‘n ewige lewe by ons Vader nie. Laat ons die erns daarvan insien en sorg dat onsself en die mense wat vir ons belangrik is en almal wat ons pad kruis weet en gereed is as Jesus ons kom haal.

As jy praat, laat jou woorde tel.

As jy doen, laat jou dade spreek.

As jy net is, laat almal om jou steeds weet dat jy ‘n kind van die lewende God is.

Geen kwalifikasie nodig ...

Goeiedag Vriende,

Heerlike dag en dankbaar dat die week ‘n baie goeie skryf week was. Ek hoop dat dit met julle goed gaan en dat julle ook so ‘n produktiewe week en baie deurbrake soos ek hierdie week gehad het. So voor ons die naweek instap en die pas bietjie stadiger maak, wil ek graag met julle nog ‘n stukkie Woord deel.

Vanoggend lees ek die verhaal van Saulus wat Paulus geword het, die bekering van ‘n man wat God se kinders vervolg en vermoor het. ‘n Man wat ek en jy nie mee sou wou praat, of hom eers in ons huise toelaat nie.

Ons lees daagliks van sulke mense in koerante, op sosiale media, op televisie. En dit vul ons met afgrys om te sien hoe christene deur hierdie mense vervolg en vermoor word omdat hulle in die Enige God glo.

Kom ons lees die gedeelte wat ek seker is ons almal ken en al baie gelees het.

HANDELINGE 9

Saulus se bekering

1Intussen het Saulus soos 'n besetene voortgegaan om die volgelinge van die Here met die dood te dreig. Hy het na die hoëpriester toe gegaan 2en van hom bekendstellingsbriewe aan die sinagoges in Damaskus gevra. Sy doel was om al die aanhangers van die leer van die Here wat hy daar kry, mans sowel as vrouens, gevange te neem en na Jerusalem toe te bring.

3Toe hy op reis naby Damaskus kom, het daar skielik 'n lig uit die hemel op hom gestraal. 4Hy het op die grond neergeval en 'n stem vir hom hoor sê: “Saul, Saul, waarom vervolg jy My?”

5“Wie is U, Here?” vra hy toe.

“Ek is Jesus,” antwoord Hy. “Dit is vir My wat jy vervolg. 6Maar staan op en gaan na die stad toe. Daar sal vir jou gesê word wat jy moet doen.”

7Die mense wat saam met hom op pad was, het sprakeloos gestaan. Hulle het die stem gehoor maar niemand gesien nie. 8Toe Saulus van die grond af opstaan en sy oë oopmaak, kon hy nie sien nie. Hulle het sy hand gevat en hom na Damaskus toe gelei. 9Drie dae lank kon hy nie sien nie en het hy niks geëet of gedrink nie.

10In Damaskus was daar 'n sekere volgeling van Jesus met die naam Ananias. Die Here het hom in 'n gesig geroep: “Ananias!”

“Hier is ek, Here,” het hy geantwoord.

11En die Here sê vir hom: “Gaan dadelik na Reguitstraat toe en vra by Judas se huis na 'n man van Tarsus met die naam Saulus. Hy is besig om te bid 12en hy het in 'n gesig 'n man met die naam Ananias sien inkom wat hom die hande oplê sodat hy weer kan sien.”

13Maar Ananias sê: “Here, ek het al by baie mense van hierdie man gehoor en van al die kwaad wat hy die mense wat in U glo, in Jerusalem aangedoen het. 14En nou is hy hier met volmag van die priesterhoofde om almal gevange te neem wat u Naam aanroep.”

15Toe sê die Here vir hom: “Gaan daarheen, want Ek het hom gekies as my werktuig om my Naam uit te dra onder die heidennasies en hulle konings en ook onder Israel. 16Ek self sal vir hom wys hoeveel hy vir my Naam moet ly.”

17Ananias het toe gegaan en in daardie huis gekom. Hy het Saulus die hande opgelê en gesê: “Saul, broer, die Here Jesus wat aan jou verskyn het toe jy op pad hierheen was, het my na jou toe gestuur sodat jy weer kan sien en met die Heilige Gees vervul kan word.”

18Onmiddellik het daar iets soos skille van Saulus se oë afgeval en kon hy weer sien. Toe het hy opgestaan en hy is gedoop; 19en hy het geëet en sy kragte herwin.


So goed soos ek net soos julle die verhaal ken, het dit my vanoggend baie diep getref.

Hierdie man waarmee ons nie eers sou wou praat of waarvan ons net sou wou wegkruip, en hom sekerlik sou verag vir wat hy besig was mee kom Jesus self na toe.

Die manier waarop Jesus hom nader – nie met ‘n geskree en veroordeling nie, maar met ‘n eenvoudige vraag. Nie met woede oor al Sy kinders wat al deur Saulus vervolg en vermoor is nie, maar met ‘n groter plan.

“Saul, Saul, waarom vervolg jy My?”

5“Wie is U, Here?” vra hy toe.

“Ek is Jesus,” antwoord Hy. “Dit is vir My wat jy vervolg.”

Jesus slaan hom met blindheid, om hom te wys dat Hy is wie Hy sê Hy is. Daarna stuur hy hom na Ananias.

Ananias se reaksie toe Jesus hom die opdrag gee, is sekerlik presies die antwoord wat ons aan Jesus sou gee as hy een van ons oor Saulus be-opdrag het.

13Maar Ananias sê: “Here, ek het al by baie mense van hierdie man gehoor en van al die kwaad wat hy die mense wat in U glo, in Jerusalem aangedoen het. 14En nou is hy hier met volmag van die priesterhoofde om almal gevange te neem wat u Naam aanroep.”

Dit is asof Ananias vir Jesus wil vra: Weet u nie hoe ‘n gevaarlike en bose man hierdie is nie? Dit is hier waar Jesus Ananias so ‘n klein kykie gee in Sy plan met Saulus se lewe verder.

“15Toe sê die Here vir hom: “Gaan daarheen, want Ek het hom gekies as my werktuig om my Naam uit te dra onder die heidennasies en hulle konings en ook onder Israel. 16Ek self sal vir hom wys hoeveel hy vir my Naam moet ly.”

Ons almal weet hoeveel Paulus vir die Woord en die Koninkryk gely het. Dat hy niks ontsien het nie. Dat niks hom ooit weer kon keer nie. Dat hy bely het dat alles wat voorheen vir hom van waarde niks vir hom geword het en God sy enigste wins.

Hierdie man wat die vyand aanbid het, se lewe kom draai Jesus om en kies juis hom om die grootste deel van die Woord vas te lê vir geslagte wat kom.

Hier val Jesus se liefde, se teerheid, se genade my net so verskriklik op. Dit is die voorbeeld wat Hy vir ons gelos het deur sy Woord. Dit is wat Hy van my en jou verwag, om so met mense in die wêreld om te gaan dat ons hulle deur liefde vir die Koninkryk kan wen.

Ons moet deur Jesus-oë na mense kyk. Daardie persoon wat ons sien as boos, sien Jesus as die persoon wat die grootste inpak in Sy Koninkryk gaan maak. Hoekom? Omdat dit nie ons is nie, maar Hy deur ons.

Gee oor, wag, vertrou!

 Vriende,

Die week lê op sy rug, tog is dit nog ‘n mooi dag uit ons Vader se hand. Vir my om ‘n mooi dag te hê beteken dat daar net een nuwe blommetjie in my tuin moet oopgaan en my hart sing vir die res van die dag. Vir iemand anders is dit dalk baie meer …

Ek gesels gister met een van my vriendinne wat in Suid-Afrika bly. Die gesprek gaan oor dat sy haar bekommer oor dit en oor dat en nog wat en dat dit haar vermoei. Dit neem haar tyd op omdat sy besig is om planne te maak. Die verhoed haar om haar God gegewe talent uit te leef, want sy is geseënd met ‘n groot kreatiewe talent.

Julle wat my nou al leer ken het hier, sal dadelik weet wat my antwoord aan haar was, maar kom ek noem dit weer.

My reaksie: “Vriendin, dit is nie jou stryd nie, dit is ons Vader se stryd. Hy het reeds ‘n plan. Gee alles oor. Hou op om jou eie plannetjies te maak wat jou besighou en tot niks kom nie. Jy moet algeheel oorgee en op God vertrou.”

“Ek weet, ek weet, maar dit is soms so moeilik. Ek gee dit vir God, maar as ek weer sien het ek dit teruggeneem.”

Is dit nie wat ons almal doen nie? Is ons nie almal so ongeduldig soos my dierbare vriendin nie?

As iemand ons te na gekom het, wil ons dadelik dit regstel, maar Salomo gee ons die regte raad:

Spreuke 20:22 Moenie sê: Ek wil die kwaad vergelde nie! Wag op die Here, dat Hy jou help.

Vir seker kan jy weet dat Hy dit op die regte manier sal uitsorteer. Nie in ‘n vlaag van emosies waar daar meer skade as goed gedoen word nie.

Dan kom ons by die dinge waaroor ons bid, bekommer, nie raad voor het nie. Stoei en spook met planne. David het vir ons raad in Psalm 27.

Psalm 27: 14Vertrou op die Here!

Wees sterk en hou goeie moed!

Ja, vertrou op die Here!

Gee dit oor, al moet jy dit honderd maal op ‘n dag oorgee. Bly dit oorgee, glo en vertrou. Gaan aan met jou dag en jou dinge en vergeet daarvan. God, die Almagtige het dit!

Jesaja het vir ons wat oorgee, ons gehoorsaam is aan God se opdragte en op Hom alleen vertrou – wat ons almal moet wees – ‘n wonderlike belofte.

Jesaja 40: 31

Maar die wat op die Here wag

Sal hulle krag vernuwe;

Hulle sal opstyg met vlerke soos arende,

Hulle sal hardloop en nie moeg word nie,

Hulle sal loop en nie verslap nie.


Maar dit is nie al belofte wat daar in die Woord is vir ons hieroor nie.

Klaagliedere 3: 25

Die Here is goed vir die wat op Hom wag,

Aan die siel wat Hom soek.


Spreuke 3: 5-6

5 Vertrou op die Here met jou hele hart,

En steun nie op jou eie insig nie;

6Ken Hom in al jou weë,

En Hy sal jou paaie gelyk maak.


Hierdie belofte in Spreuke is ook die vers wat ek jare gelede gekry het, in Lutzville se kerk van Dominee Van den Heever toe ek voorgestel en aangeneem is.

Hier maan Salomo ons om nie op ons eie krag en eie insig te steun nie. Hoeveel kere het jy al gevind dat dit nie werk nie? Daarna gee hy ons die belofte dat as ons op God vertrou, hy ons paaie sal gelyk maak.

Dink julle nie dat ons almal niks het om te verloor deur te wag nie? Daar is nog vele meer beloftes in die Woord, en een ding is vir seker – God is nie ‘n mens wat leë beloftes maak nie – sy beloftes kom Hy na op sy tyd.

Kom vriende, dat ons ophou om ons moeg te stoei, soos ‘n vis aan ‘n lyn. Dit terwyl ons ‘n goeie, genadige, liefdevolle Vader het wat wag dat ons dit vir Hom moet gee en hom moet vertrou en geduldig op Hom moet wag en Hy sal dit vir ons oplos.


Gee oor, raak besig met jou dagtaak, en vergeet van jou sorge – ons Vader het dit!

Net hoor kan ons nie red nie!

Goeiemôre Vriende,

Weereens ‘n heerlike koel oggend, met nuwe beloftes uit ons Vader se hand. Hier by my loop die woorde en ek is in my element.

Vandag kom daar ‘n vermaning uit die Woord na ons. Ons vind dit in Handeling 12. Ek dink ons sal almal wat die Woord lees, en ons Vader ken daarmee saamstem dat ons in die laaste dae leef.

Nou dit is ‘n begrip wat verskillende mense verskillend interpreteer. Ons weet almal dat God se begrip van tyd en ons s’n nie dieselfde is nie. So die term ‘in die laaste dae’ interpreteer ons dalk verkeerdelik as in die volgende maand of jaar. In ons Vader se tyd kan dit in die volgende tien jaar dalk wees. Die Woord is baie duidelik dat niemand sal weet nie. Ons kan dit net aan die tekens in die wêreld sien wat in die Woord opgeteken is vir ons.

Dit gesê, beteken dit vir ons as kinders van God dat ons altyd gereed moet wees. Dit is waar die vermaning in Handeling vandag inkom.

Petrus is in die tronk, Herodes is van plan om hom te laat dood maak die volgende dag en hy word swaar bewaak.

Handeling 12:
6En toe Herodes hom wou voorbring, het Petrus in daardie nag tussen twee soldate geslaap, met twee kettings geboei, en wagte voor die deur het die gevangenis bewaak.
7En meteens staan daar 'n engel van die Here by hom, en 'n lig skyn in die gevangenis. Toe slaan hy Petrus op die sy, maak hom wakker en sê: Staan gou op! En die boeie het van sy hande afgeval.
8En die engel sê vir hom: Omgord jou en trek jou skoene aan! En hy het dit gedoen. Verder sê hy vir hom: Gooi jou bo-kleed om en volg my!

God is getrou en doen ‘n wonderwerk vir sy profeet. Tog as Petrus nie die Engel gehoorsaam het nie, nie opgestaan het en gedoen het presies soos hy beveel was nie, sou dit alles niks gehelp het nie. Hy sou steeds daar in die tronk gesit het al was die kettings los. Herodes sou hom steeds doodgemaak het.

Wat is die les wat ons hieruit moet leer?

Baie, baie belangrik. God kan vir ons hoeveel wonderwerke stuur, hoeveel deure oopmaak, maar as ons nie gehoorsaam is en tot aksie oorgaan nie, sal ons steeds in die tronk bly.

Ons kan na hoeveel lewensveranderende preke luister, hoeveel ervarings met die Heilige Gees beleef, maar as ons nie opstaan en dit gaan doen wat die Woord ons beveel nie, sal ons nooit die hemel sien nie. God verwag van ons om gehoorsaam te wees, om nie net hoorders van die Woord te wees nie, maar daders soos Sy opdrag in die Woord ook uitdruklik is.

As jy vandag hoor dat jy ‘n miljoen rand gewen het, en dit jou lewe kan verander, maar jy bly net daar waar jy is en doen niks om daardie geld in die hande te kry nie, sal jou omstandighede ook nie verander nie. Net deur te hoor dat jy dit gewen het, gaan niks aan jou omstandighede verander nie.

Jesus was nooit lank op een plek nie, hy was gedurig besig om dit wat Sy Vader, ons Vader vir hom gevra het om te doen te gaan doen. Hy was besig om te bid, besig om mense te leer uit die woord, besig om aan mense liefde, barmhartigheid en vrede te leer, besig om mense te genees, besig om ons gehoorsaamheid tot die dood te leer.

As die Koning van die wêreld, die Een wat daar was aan die begin, die Een wat ons Verlosser is, wat self God is nie net gehoor het nie, maar gedoen het – het ons dan nie die perfekte voorbeeld nie? Moet ons dan nie net in Sy spore volg en doen soos Hy gedoen het nie?

Kom ons luister nie net nie, maar leef Jesus.

 

Glo!

Môre, môre Vriende,

Vanoggend in Windhoek is dit die tipe weer wat ons as Namakwalanders baie opgewonde maak, want daar is ‘n belofte van reën in die lug. Hier by ons is dit bietjie anders as daar in ons Namakwaland, hier is dit heerlik warm, maar betrokke en die bome se takke wieg so saggies in die windjie.

Ek het ‘n goeie vriende, wie se getuienis ek die voorreg gehad het om te skryf. Hy het jare gelede ‘n ongeluk gehad in sy werkswinkel waar ‘n staal petroltenk in sy gesig ontplof het. Hy moes dood gewees het, maar God het ‘n plan met sy lewe. Sy hele gesig se bene was vergruis, daar is ‘n kraak in sy oogholte, deel van sy brein is beskadig. Met dit alles moes hy dan as hy sou oorleef, ‘n ‘vegetable’ gewees het wat niks vir homself kan doen nie, nie weet wat om hom aangaan nie.

Hierdie man het binne ‘n week vandat die ontploffing gebeur het, en die dokters ‘n sewe ure operasie op hom gedoen het, uit die hospitaal gekom. Hy is 100% normaal, al wat hy van hierdie verskriklike ongeluk oorgehou het, is dat hy geen reuk het nie. Die dokters en chirurge is vandag 15 jaar later nog steeds geskok dat hy lewe, wat nog te sê dat hy normaal is en mens glad nie kan sien dat sy gesig in ‘n ontploffing was nie en dit sonder enige plastiese chirurgie.

Hierdie man het ‘n vraag wat hy my geleer het om elke dag te vra: Hoeveel is ek bereid om God te vertrou met my lewe?

Kom ons gesels vandag bietjie weer oor geloof.

In Konings sukkel Elia met die volk wat baäl aanbid. Hy vra vir God om wondertekens te doen om hulle te oortuig. Ons Vader so getrou soos hy is, doen dit. Die volk erken dat Hy God is, maar tog is daar die wat nog altyd twyfel.

Elia, besluit om vir ‘n laaste maal hulle God se krag en getrouheid te wys, maar hier lees ons ‘n situasie wat ons baie goed ken.

Soms bid jy ook vir uitkoms, en glo as die nuwe dag aanbreek sal alles anders wees. Die nuwe dag breek dan aan en alles is dieselfde. Jy hou aan bid en glo, maar teen die vierde of vyfde dag begin jy twyfel. Hoor God my dan nie? Wat gaan aan? Dit is presies waarvoor die vyand gewag het. Nou kan hy jou met leuens begin voer, leuens wat jy so gemoedelik glo.

Lees wat het hier gebeur, en weet dat dit nie net met my en jou is wat dit so gebeur nie.

1 Konings 18:43 Elia het na die top van Karmelberg toe opgeklim en terwyl hy daar na die aarde toe buig met sy kop tussen sy knieë, 43sê hy vir sy slaaf: “Gaan kyk in die rigting van die see!” Hy gaan kyk toe, en kom sê: “Daar is niks.”
Elia het vir hom gesê: “Gaan kyk weer.”
Dit het sewe keer gebeur. 44Na die sewende keer het hy kom sê: “'n Wolkie so groot soos 'n man se hand kom uit die see uit op.”
Elia sê toe: “Gaan sê gou vir Agab: Span in en gaan van die berg af, anders sal die reën jou vaskeer.”
45Toe hulle nog praat, het die lug donker geword van die onweerswolke; die wind het opgekom en groot reëns het uitgesak.

Die man moes sewe maal gaan kyk vir die reën en toe was hy steeds nie oortuig dat dit gaan reën nie, want die wolkie was maar baie klein wat hy gemerk het.

Tog het Elia opgetree in geloof, want hy weet dat die God wat ons dien, getrou is en dat Sy tyd nie altyd ons tyd is nie. En hy was reg.

Ons moet ophou om ongeduldig te wees met God. Ophou om te dink dat ons as mense beter weet as Hy, en begin vertrou soos Elia.

Dan kry ons vir Abraham, en ons ken almal die storie hoe God hom gevra het om sy enigste seun waarvoor hy so lank moes wag te gaan offer.

Ons sou summier in opstand gekom het. Hoe kan God so iets van ons verwag? Abraham daar in teen, het op God vertrou om te voorsien en God het. Hy was gehoorsaam, nie teen staande die feit dat die opdrag eintlik onmoontlik gelyk het.

Ek kom vandag vir jou vra: Hoeveel is jy bereid om God vandag, en elke dag met jou lewe te vertrou?
Al word jou gebed nie dadelik beantwoord nie, God is steeds dieselfde as wat Hy in Abraham se tyd was en sal altyd dieselfde bly. Hy het nog nooit Sy beloftes verbreek nie, op grond waarvan wil ons Hom dan nie onvoorwaardelik vertrou nie?

Begin elke dag hierdie vraag vir jouself vra. Begin om in Sy woord te lees wat sy beloftes is. Begin om te leer deur die leiding van die Heilige Gees om die Almagtige God wat Homself jou en my Vader noem onvoorwaardelik te vertrou met jou HELE lewe.

Gee Hom die eer vir alles wat jy het. Gee Hom die eer vir alles wat jy vermag met die gawes wat Hy jou gegee het.

Ek en jy is net hier deur ons Vader se liefde en genade en alle eer in die hemel en op aarde kom Hom elke dag heel dag toe.

Kyk na die roos hieronder en vra vir jouself - is daar iets wat die Skepper van hierdie wonder skone perfeksie nie kan doen nie?

Ons Vader ons lewenslaar

Goeiemôre Vriende,

Hier in Windhoek het dit vroeër na reën gelyk, maar intussen het die sonnetjie uitgekom. Ons weet egter dat ons Vader die genadewater op Sy tyd sal stuur. Nouja ek het verneem daar was die naweek ‘n fees in ons Namakwaland, maar ek het ook verneem dat dit deur ongewenste elemente versuur is met swak gedrag en kru taal. Dit is ‘n jammerte. Ek haal egter my hoed af vir die van my vriende wat omgedraai en liewer huis toe gegaan het omdat dit vir hulle nie aanvaarbaar was nie – dit is wat ons ‘n stand vir Christus noem.

Dit sluit aan by wat die wyse Salomo, nadat hy baie dinge ondersoek en bestudeer het, vir ons opgeteken het aan die einde van Prediker as ‘n opsomming van alles.

Prediker 12: 13 Die hoofsaak van alles wat gehoor is, is: Vrees God en hou sy gebooie; want dit geld vir alle mense.

14 Want God sal elke werk bring in die gerig wat kom oor al die verborge dinge, goed of sleg.

Sy opsomming is dat daar niks waardevolle is as om ons Almagtige God te vrees nie, te gehoorsaam nie, te dien nie.

So maklik by geleenthede soos die fees wat die naweek plaasgevind het, word God net vir die naweek by die huis gelos en gaan geniet ons onsself, tree ons losbandig op, gebruik ons taal wat nie vir God aanvaarbaar is nie. Kortom is ons op pad terug na ons plaas, terug na ons lewe en onthou ons van die uitdagings en raak ons oorweldig.

Net daar sonder om nog twee maal te dink, pak ons weer ons Vader uit, wat moes tuisbly dat jy jou kon gaan geniet. Ek verstom my soms aan ons mense se manier van dink. Dink ons regtig dat God nie gesien en gehoor het wat ons gedoen het nie? Daar staan tot baie duidelik in die Woord dat ons Vader ons elke gedagte en handeling ken nog voor ons dit dink of doen.

Ons weet immers hoe ons Vader oor gehoorsaamheid voel. Hoekom mag Hy die Almagtige nie so voel nie, jy wat ‘n aardse vader of moeder is en nie ‘n volmaakte voorbeeld vir jou kind is nie, vereis dan gehoorsaamheid van daardie kind.

God het vir ons in Jesus die volmaakte voorbeeld aarde toe gestuur om hier onder ons te kom wandel en gehoorsaamheid tot die dood uit te leef. Vir ons te wys in verskillende situasies dat Hy steeds gehoorsaam gebly het, al was Hy versoek. Hy het altyd gekies tot eer van Sy Vader, wat ook ons Vader is.

Ons kan nie net ons Vader dien en gehoorsaam aan hom wees as ons in die kerk is, of as ons daar by ons huis besig is met die Bybel nie. Hy is ‘n jaloerse God, en vereis onverdeelde trou en Hy het Sy seun gestuur om die prys te betaal. Dus wat is ons verskoning?

Ons Vader is nie ‘n noodhulpkassie nie, nee Hy is ons Lewensaar. Hom kom ons toewyding, ons lofprysing, ons gehoorsaamheid, ons onvoorwaardelike vertrou en nog meer toe.

Ons moet saai om te kan oes

Dagsê Vriende,

Die week is aan sy einde, en daar is beslis baie wat dankbaar is daarvoor. Hierdie tyd van die jaar is dit asof alles net te veel raak.

Vandag kom ons bemoediging uit Prediker 11. Jy en ek voel dalk ons het nie meer krag nie, en ons weet nie meer hoe nie. Ons kan nie meer dit of dat doen nie.

Ons kyk ons vas in omstandighede, die fisiese beperkings om ons. Hier kom die Prediker en hy vertel ons ‘n ander kant van die saak.

PREDIKER 11

Laat ons goed doen solank as ons in die geleentheid is.

1WERP jou brood uit op die water, want ná verloop van baie dae sal jy dit vind.

3As die wolke vol reën is, giet hulle dit uit op die aarde; en as 'n boom na die suide of na die noorde val, op die plek waar die boom val, daar bly hy lê.

4Wie op die wind ag gee, sal nie saai nie; en wie na die wolke kyk, sal nie oes nie.

So mooi vertel Prediker vir ons, as ons bly vas kyk in ons beperkings, in omstandighede om ons, sal daar niks van ons moeite kom nie.

Hy maan ons om te saai al lyk die wind nie gunstig vir reën nie. Hoekom? Want as ons in geloof saai, sal God die res doen. 

As jy net doen dit wat jy kan, sal God die bietjie wat jy gewys het jy bereid is om te doen in geloof omskep in oorvloed.

Pastoor Rynier vertel vanoggend iets wat hy gelees het en dit gaan so: God kan jou nie seën as jy op die graaf leun wat Hy jou gegee het om die gat mee te grawe nie.

Gebruik dit wat God jou gegee het, al voel jy dit is beperk, en Hy sien jou hart en sal die res doen.

As jy nie saai nie, kan jy nie oes nie!

Ons moet gaan ...

Goeiemôre Vriende,

Heerlike oggend hier, met ‘n windjie wat net die blare roer. Ek hoop daar by julle gaan alles ook goed en is die weer ook mooi, dat julle kan doen wat julle hand vind om te doen.

Wie van ons hou nie van reis nie? Ek dink daar is min mense wat kan sê hulle hou nie daarvan om te reis na ander dorpe, ander stede, ander plekke waar hulle nuwe mense kan ontmoet, of die mooi van die natuur kan sien nie. Van ons het nog net die voorreg gehad om in ons eie land te reis, ander het al die hele wêreld vol gereis.

Deur my werk het ek die geleentheid gehad om so bietjie in die wêreld in te reis. Ek was bevoorreg om die Grand Canyon te sien in al sy grootsheid en glo my dit is massief. Dit is so diep en wyd dat helikopters daar onder rond vlieg en dit lyk soos speelgoed helikopters. Ek het ‘n ‘road runner’, daardie voëltjie op Tom en Jerry wat so neep-neep maak en hardloop in lewende lywe gesien. Ek het regte rooihuide gesien, ‘n dorpie uit die vorige era wat ‘n regte ‘cowboy’ dorpie was, alles is nog net so. Soos ons dit in die western movies sien, die Saloon, die Sherif se kantoor, met die tralies van die tronk en voor dit die galg, die herberg, kompleet. Ons is selfs geleer hoe om ‘n vangtou te gebruik, dit was pret.

Daar is nou net een vang plek, wat doen ons as ons so reis? Want ons as kinders van die Lewende God het ‘n opdrag wat Jesus vir ons gelos het in van sy laaste woorde op aarde.

Markus 16:15
15Hy het vir hulle gesê: “Gaan uit, die hele wêreld in, en verkondig die evangelie aan die hele mensdom.

Is is beveel om te gaan … wat is reis anders as om te gaan? Maar voer ons die tweede deel van die opdrag ooit uit?

Vergeet jy van God die oomblik wat jy by die voordeur uit loop, op pad om te gaan reis? Jou opdrag is om daar waar jy reis ook die evangelie te verkondig. Nee, jy hoef nie op die straathoek te gaan staan nie. Net daar waar jy tuisgaan, daar waar die portuur jou bagasie indra, daar waar die skoonmaakster jou kamer skoonmaak, daar waar jy in die restaurant eet, of saam met ander op ‘n vliegtuig sit vir ure.

ROMEINE 10:14-15 AFR83
Maar hoe kan 'n mens Hom aanroep as jy nie in Hom glo nie? En hoe kan jy in Hom glo as jy nie van Hom gehoor het nie? En hoe kan jy van Hom hoor sonder iemand wat preek? En hoe kan iemand preek as hy nie gestuur is nie? Daar staan ook geskrywe: “Hoe wonderlik klink die voetstappe van dié wat die goeie boodskap bring.”

Kom ons gesels oor hierdie vers: Die woord preek kan bloot met vertel vervang word, en as jy vashaak by ‘gestuur’ – Jesus het ons almal gestuur, net net die predikante, pastore, en wat kerklike herders ook al nog genoem word, nie. Dit is ons almal se opdrag en verantwoordelikheid.

ROMEINE 10:17 AFR83
Die geloof kom dus deur die prediking wat 'n mens hoor, en die prediking wat ons hoor, is die verkondiging van Christus.

Dit is heel eenvoudig, as iemand jou nie van iets vertel nie, sal almal weet, en jy nie. So is dit ook met die goeie nuus dat Jesus vir ons gesterf het, en opgewek is uit die dood. Dat Hy ons sondes versoen het en ons uit liefde en dankbaarheid nou in gehoorsaamheid aan Sy wil moet leef.

1 KORINTIËRS 9:16 AFR83
As ek die evangelie verkondig, is dit nie vir my 'n rede om te roem nie. Ek verkondig die evangelie omdat ek móét! En wee my as ek dit nie doen nie!

Hier kom ons broer, Paulus en maan ons dat ons nie ‘n keuse het nie. Dit is ‘n opdrag van ons Verlosser.
Vriende, wanneer jy weer reis, na ‘n ander dorp, binne jou omgewing, na ‘n ander stad, of oorsee – jy het ‘n opdrag. Hoe anders sal die wêreld weet van die goeie nuus as ons wat dit reeds weet, beleef en leef nie aan ander dit vertel nie.

Jy hoef ook glad nie ver te reis nie, jy kan net van jou huis tot by die winkel reis, daar sal iemand op jou pad wees wat hierdie nuus moet hoor. Is jy bang dat jy nie sal weet wat om te sê nie? Wel, ons Vader is ‘n liefdevolle vader wat aan alles gedink het, Hy sal jou deur sy Heilige Gees die woorde gee.

Reis so al wat jy kan, maar moet nooit vergeet om jou opdrag uit te voer wat Jesus jou self gegee het nie.

Net 'n mens-gestalte

So dikwels breek familie huwelike op - hierdie vers handel daaroor.


By die meer op ‘n rots
met die water se klots
tuur sy in die verte
om haar weergalm vrede
met geen eggo in haar siel
die is verniel
in die kasteel
oorkant die meer
deur ‘n man
met voete van klei
hierdie is nie balsem vir haar siel
hierdie waar die stilte praat
die water neurie
van vrede
hier waar sy haar vaskyk
in die torings
van die kasteel van verraad
sprokiesmooi van buite
maar agter die swaar hout deure
skuil die adder en sy maat
sy gif vul die gange
met dood en smaad
los geen plek
vir liefde, vreugde of geluk
want soos ‘n anakonda
het hy die lewe gewurg
uit die man want eens haar geliefde was
totdat die leweloos
soos ‘n pop aan ‘n tou
net kon dans
op sy bevel
sy alleen gelaat is
in die hel van verraad
sonder ‘n maat
met net ‘n mens-gestalte
wat dit wat eens haar geliefde was
vlug voetig sal sy vlug
met haar laaste krag
sy moet hom agter los
al breek dit ook haar hart
vir hom het sy net nog waarde op die swartmark
die monster het hom geheel ge-brain-wash …
© Marsofine Krynauw