Pappa - 46 jaar is 'n leeftyd

 Pappa, 46 jaar is ‘n leeftyd … jy is al ‘n leeftyd van my weg. Hoe dankbaar is ek dat dit net jou liggaam is wat weg is en nie jou gees nie. Jou gees wat in my hart voort leef al die jare nog. Vir ander is dit ‘n leeftyd, maar vir my voel dit soos gister.

Soos gister wat ons op die stoep gesit het in die skerm, na nog ‘n snik hede dag in Vredendal. Soos gister wat ek daar na pappa se stories en kwinkslae geluister het en ons lag op die aandwindjie gedra is. Soos gister wat ons daar tot baie, baie laat sit en koffie drink het – swart koffie!

Die herinneringe van die laatste aand wat ons so saam daar gekuier het, lê vlak in my geheue en hart. Dit was ‘n Vrydagaand … daar op die stoep het ons plat op die trappies gesit. Ek voel nog die warm van die leiklip deur my kortbroek. Jou stem wat soos die murmel van ‘n rustige stroom op my ore val met beloftes om nog meer tyd met my te spandeer in die nuwe jaar. Oor hoe bekommerd jy was toe ek net dae vantevore in die hospitaal was, dat jy my sal verloor. So dan en wan het ek dan opgestaan om vir ons nog koffie te gaan maak.

Later het die trant van ons geselskap baie ligter geraak. My hart was verheug, want ek het geweet, jy is daar vir my, soos jy nog altyd was. Al is ek net jou dogter, wil jy met my tyd spandeer en het jy my ontsettend lief.

Jy het soos altyd my vermaak met stories uit jul kinderdae daar in ons ou Namakwaland, en die aand het oggend geword daar op die stoep van Tuinstraat 10 in Vredendal.

Gelukkig kan ons as mense nie vooruit sien nie, ander sou ons dalk heel anders opgetree het, sou ons geweet het dit is ons laaste aand saam hier op aarde. Dan sou daar geen lag gewees het nie, net trane ...

Ons Vader het ons hierdie aand gegee, vir my om dit vir ewig te onthou. Jou vir ewig so, soos daardie laaste aand te onthou. Te onthou hoe net jy en ek, my pappa, daar in ons eie wêreldjie opgesluit was, knus en geborge.

Al is jy al ‘n leeftyd weg ... al spaar ons Vader my vir nog twee ... hierdie aand sal ek tot aan die einde van my dae in my hart koester. Nie die trane, gemis en seer kon dit van my wegneem nie, want ek sal dit nie toelaat nie ...

Dit is my Kersgeskenk van God van daardie aand af tot aan die einde van my dae.

Die Eregas is Jesus!

Goeiedag Vriende,


Die dag in die jaar het aangebreek waarop ons, ons Heiland se aardse geboorte vier, al is dit nie werklik die dag nie. Ons vier dit, want as Hy nie gebore was as mens nie, kon Hy nie vir ons sterf nie.

Sonder kersbome en geskenke, sonder liggies en kersversierings vier ek dit ... want ek wil my Jesus vier, en niks anders nie.

Ek wil in verwondering staan oor Vader God se liefde vir ons, vir elkeen van ons! Dat Hy sy geliefde, sondelose Seun, Jesus aarde toe gestuur het om onder ons te kom woon. Om te beleef wat dit is om verwerp te word, vervloek te word, gehaat te word, bedrieg te word, en selfs onskuldig soos Hy was ons sonder op Hom te neem. So 'n liefde ken ons nie hier op aarde nie ... liefde wat vandag nog dieselfde is vir ons.

Daarom vier ons, ons Jesus se geboorte, want al moes Hy vir ons sterf, vir ons ly het Hy ons nog net so lief. Het Hy ons nog nooit verwyd vir die seer en lyding wat Hy vir ons moes deurstaan nie.

Op hierdie dag kan ons net probeer om aan Hom al die eer en heerlikheid en lofprysing en dankliedere te bring vir so 'n liefde.

Jesus, ons Redder, ons Middelaar, ons Koning, ons eer U, ons loof U en ons het U oneindig lief. Dankie dat U ons grootste ewigdurende geskenk is van ons Vader.

Hiermee wens ons vir elkeen 'n geseënde Christusfees toe vandag. Mag julle in jul samesyn met geliefdes en familie nooit vergeet, wie die Eregas van hierdie dag is nie.

Vrede te midde van ...

 Goeiemôre Vriende,

Hier het die dag begin met ‘n snaakse wind wat waai, maar ons bekommer nie te veel nie, want dit bring koelte. Verder is die ouma nie met baie gepla nie, want my kleindogter Menandi kuier van gister af by my.

Vanoggend lees ek die wonderlike belofte in Lukas 1 raak.

Lukas 1:78 …Soos die môreson sal Hy opgaan
en uit die hoogte op ons afstraal,
79om lig te bring aan dié wat in duisternis
en in die skaduwee van die dood lewe,
om ons voetstappe te rig
op die pad van vrede.”

Dit is na Jesus wat Sagaria, Johannes die Doper se vader hier verwys.
Dit is vandag nog waar. Hierdie Prins van Vrede is gebore, het gesterf vir ons sondes en sit aan die regterhand van ons Vader. Sy begeerte is steeds vrede vir ons.

Het jy al Sy vrede ontvang? Soek jy daarna? Kry jy dit nie? Hoe kry jy dit?

Dit is glad nie moeilik nie, al mag van ons dink dit is onmoontlik. Perfekte omstandighede is nie ‘n voorwaarde vir Jesus se vrede nie, dit moet ons heel eerste verstaan.

Ons kan Jesus se vrede geniet te midde van ons omstandighede. Hierdie vrede kry ons as ons Hom kies, as ons besluit om alles in ons lewens aan Hom oor te gee. As ons elke besluit, elke gedagte aan Hom oorgee en onvoorwaardelik op Hom vertrou.

Dit is dan dat die storms maar om ons kan woed en ons rustig in die middel daarvan kan bly. Dit net omdat ons weet die Een wat binne in ons is, is baie groter as die wêreld, as enige struikelblok, is groter as enige probleem. Hy het reeds die wêreld oorwin. Hy kan enigiets doen.

Of twyfel jy nog daaraan. Moet ek jou weer herinner dat Hy die heelal in net ses dae geskape het deur net ‘n woord te spreek? Moet jy weer herinner word dat Hy net een woord gespreek het en die een nasie wat van die grondlegging af bestaan het, het daar by die toring van Babel verskillende nasies geword, wat skielik verskillende tale gepraat het. Moet jy herinner word dat Hy elke sekonde van elke dag elke gedagte van elke mens op hierdie aarde weet, die getal van die sand op die aarde, die getal van die sterre in die hemel ken.

Wel, dink jy regtig nog dat jou probleme vir Hom te veel is om uit te sorteer? Gee dit oor, en ervaar Sy vrede te midde van die storm.

Beskermer of ondier

Goeiemôre Vriende,

Hier by my gaan dit nou amper so bedrywig vanoggend soos dit elke oggend daar op die plase gaan. Vandag is die groot skoonmaak voor die kinders uit Engeland kom kuier. Gelukkig is dit nou nog koel.

Nouja, dit is skoolvakansie, en Desember-vakansie waar almal of die grootste deel van mense vakansie het. Daar word rondbeweeg, dorp toe, stad toe, stand toe, eetplekke word besoek en ander plekke waar ontspanning is.

Daar is ‘n mengelmoes van mense, tieners, jongmense, middeljarige mens en bejaardes.

Vanoggend wil ek ‘n onderwerp aanraak wat veral ons manne raak en hulle dalk vies gaan maak. Hoe lui die spreekwoord: die waarheid maak seer.

Geen man het die reg om ‘n vrou so aan te staar dat sy ongemaklik raak nie. Geen man het die reg om ‘n vrou of meisie met sy oë uit te trek nie. Geen man wat getroud is en homself ‘n Christen noem mag met wellus gedagtes na ‘n vrou of meisie kyk wat nie sy eie vrou is nie.

En nee! Daardie snert wat jou pa, jou oom, jou broer, jou vriende jou vertel dat as ‘n man ophou kyk is hy dood, dit is presies dit – SNERT!

Jy is dalk self ‘n pa met ‘n 13 jarige of tienerdogter, hoe sal jy voel as jou vriende of ander mans jou dogter so aanstaar en kwyl? Of is dit vir jou aanvaarbaar? As die antwoord hierop ja is, dat moet ons ernstig vir jou bid. Dan het jy beslis nog nie vir Jesus in jou hart nie.

Nou gaan jy jouself begin verdedig met: God het my so gemaak! Snert Meneer! God het jou nie so gemaak nie, Hy het jou ‘n verstand gegee om wys op te tree. Jy is die een wat jou denkpatrone vaslê van jonk af deur jou gedagtes met gemors besig te hou die hele dag. Dit is soos ‘n wildpaadjie. Die wild loop elke dag daarop en later lyk dit asof daar geen ander pad is nie, net daardie een. Tog is dit nie waar nie, hulle verkies net om elke dag daardie paadjie te loop.

So oefen jy jou brein om net gedagtes van wellus te dink, elke vrou en selfs kind staar jy aan met daardie gedagtes. Almal behalwe jou eie vrou …

Nou gaan baie protesteer dat vroue en meisie baie uitlokkend aantrek. Dit mag dalk so wees of nie – ‘n tiener meisie wat met ‘n kortbroek en hempie loop dink nie daaraan dat sy iemand wil uitlok nie. Sy wil net gemaklik wees. Steeds is dit nie jou plek om haar ongemaklik te laat voel nie.

Party mans gaan selfs so ver om suggestiewe aanmerkings teen oor vroue en meisies te maak. Dit is nie jou plek nie meneer. Verander jou denkpatrone om te pas by wat God van jou verwag. Dit is jou as pa, oom, oupa se verantwoordelikheid om meisiekinders te beskerm. Hulle mag dalk ouer lyk as wat hulle is, maar hulle bly kinders.

Toe gegee daar is vroue en meisies wat uitdagend is, uitlokkend is, maar hulle vind jy gewoonlik daar waar jy in elk geval nie hoort as man van God nie.

Ek het vir jou een vraag: Onthou jy dat God jou gedagtes kan sien? Hoe sal jy reageer as jou ma, of jou vrou, of jou dogter of God-self jou die oomblik wat jy daardie gedagtes het, sou vra daarna? Dink jy jou vrou en dogter kan jou respekteer as hoof van die huis as jy wellustig na ander dogters, jongvrou of vroue kyk? Hoe dink jy voel jou vrou? Dink jy sy sien dit nie raak nie?

Miskien het dit tyd geword dat jy baie goed introspeksie hou en kyk na wat in jou hart en gedagtes aangaan. Dat jy baie eerlik met jouself moet wees en erken dat hoe jy optree en dink glad nie tot eer van God is nie. As jy gewillig is en ons Vader vra vir hulp kan jy jou denkpatrone verander.

Hoekom? Jou lewe sal verander, want daar is niks beter as om as hoof van jou huis daagliks met God te wandel nie. Jou vrou sal jou respekteer, jou dogter sal jou respekteer en ander vroue sal veilig voel by jou. Sal weet jy is ‘n man met waardes wat God behaag.

In Markus is dit duidelik wat die Woord van God hieroor sê.

Markus 7: 20En Hy sê: Wat uit die mens uitgaan, dit maak die mens onrein.

21Want van binne, uit die hart van die mense, kom die slegte gedagtes, egbreuk, hoerery, moord,

22diewery, hebsug, boosheid, bedrog, losbandigheid, afguns, lastering, hoogmoed, dwaasheid.

23Al hierdie booshede kom van binne uit en maak die mens onrein.

Hierdie vakansie, wees jy die man, of jongman, of seun waarby die vroulike geslag kan veilig voel omdat jy anders optree is die massas.

Ons Lig

 Goeiedag Vriende,

Mooi sonskyn dag hier in Windhoek, maar die blaartjies roer darem so bietjie. Klink my daar by julle gaap die kraaie al weer. Die beste plek om te wees is mos die see, gelukkig is dit nie vir julle ver nie. Standfontein, Brand-se-Baai, Skaapvlei, selfs Lambertsbaai is net om die draai. Gaan geniet die koelte en rus so bietjie.

Ek wil aangaan om oor Jesus, ons Verlosser te gesels. Ek dink dit is iets waaroor ons die hele jaar kan gesels.

Ons Verlosser, ons Middelaar, ons Broer, ons Prins wat ons gaan kom haal.

Johannes 1:1-5 Die Woord het mens geword

1In die begin was die Woord daar, en die Woord was by God, en die Woord was self God.

2Hy was reeds in die begin by God.

3Alles het deur Hom tot stand gekom: ja, nie 'n enkele ding wat bestaan, het sonder Hom tot stand gekom nie. 

4In Hom was daar lewe, en dié lewe was die lig vir die mense.

5Die lig skyn in die duisternis, die duisternis kon dit nie uitdoof nie.

Ons almal voel soms of ons in die duisternis rond ploeter, of ons net nie die pad sien nie. Dit is alles onnodig, want ons het reeds die ewige Lig. Ons moet net die keuse maak om in die Lig te bly.

Die belofte in Johannes 1:5 is so wonderlik: Die lig skyn in die duisternis, en die duisternis kon dit nie uitdoof nie.

Wat beteken dit vir ons vandag?

Dieselfde Lig, wat Jesus is, skyn steeds in hierdie donker, duister, deurmekaar wêreld. Ons moet net kies om in die Lig te wandel. Om nie na die leuens van die wêreld en die vyand te luister nie. Om elke duister situasie aan Jesus te gee en daar te los.

Ek het ‘n vriendinnetjie wat in Duitsland woon. Sy is baie jonger as ek en het onlangs deur baie moeilike en seer situasies gestoei. Baie vrae gehad, werklik net gesukkel. Sy is ‘n Christen kind, maar steeds het sy gesukkel.

Van hier uit Namibië het ek bly raad gee en net bly vra: Gee dit oor in Jesus se hande. Los dit net daar. Jy sal sien Hy sal dit uitsorteer op ‘n manier wat jou asem weg sal slaan.

Gisteraand stuur sy vir my ‘n boodskap: Ek weet nie hoe om vir jou dankie te sê nie. Vandag ek doelbewus dinge aan ons Vader oorgegee het en dit daar gelos het. Hom vertrou het daarmee, het alles net so baie verander. Alles val net in plek. Hy seën my so, ek kan dit nie glo nie.

Wel, ek kan dit glo, want niks is vir ons Drie-Enige-God onmoontlik nie. Hierdie wonderlike ervaring om te sien en te weet dat God die beste vir jou wil hê. Dat Jesus daagliks vir jou intree, dat Hy jou Lig wil wees, jou pad wil gelyk maak, is ook vir jou beskikbaar.

Gister kry ek die wonderlike nuus dat ek my Uitgewer se top verkoper is vir 2023. Dit is net God se guns op my woorde en my boeke. My Neef wens my geluk en gooi die woorde in ‘een van die dae sien ons jou boeke in rolprent vorm’. My antwoord: Niks is vir God onmoontlik nie.

Die oplossings is vir ons beskikbaar. Reeds betaal voor met Jesus se wonderlike, reddende liefde deur sy bloed wat hy gestort het. Hoekom bly jy teen die prikkels skop? Hoekom bly jy glo dat jy beter op jou eie kan vaar? Hoekom gee jy nie alles oor aan Hom en wandel saam met Hom in sy wonderbare lig wat die duisternis nie kan uitdoof nie?

Liefde, onbeskryflik groot!

Dagsê Namakwalaners,

Hier in Windhoek nog ‘n koeler dag, met wolke en tog skyn die sonnetjie so nou en dan. Ons kla nie, ons wag vir nog genadewater. Hoop daar by julle is die ergste hitte darem al verby. Laat vir ons weet.
Vanoggend wil ek Paulus se gebed vir die gelowiges in Efesiërs met julle kom deel. Dit is vandag nog vir ons geldig, want ons Drie-Enige-God het nog niks verander nie.

Ongeag wat jou en my omstandighede vanoggend of selfs in hierdie Desember is of gaan wees, Hy bly dieselfde. Sy liefde vir ons bly die selfde.

Efesiërs 3: 16Ek bid dat Hy deur sy Gees uit die rykdom van sy heerlikheid aan julle die krag sal gee om innerlik sterk te word,
17dat Christus deur die geloof in julle harte sal woon en dat julle in die liefde gewortel en gegrondves sal wees. 18Mag julle in staat wees om saam met al die gelowiges te begryp hoe wyd en ver en hoog en diep die liefde van Christus strek.
19Mag julle sy liefde ken, liefde wat ons verstand te bowe gaan, en mag julle heeltemal vervul word met die volheid van God.
20Aan Hom wat deur sy krag wat in ons werk, magtig is om oneindig meer te doen as wat ons bid of dink,
21aan Hom kom die eer toe, in die kerk, deur ons verbondenheid met Christus Jesus, deur al die geslagte heen tot in alle ewigheid. Amen.

Hierdie drie verse staan vir my uit. Dit is so telkens vir my duidelik dat ek en ek is seker dalk baie meer as net ek nie begryp hoe groot God se liefde vir my is nie.

Dit neem my terug na Jesus, ons Verlosser, God self – tog het Hy in gehoorsaamheid aan die Vader vlees geword, soos ‘n mens op aarde kom loop. Het hy die teleurstellings ervaar wat ons daagliks ervaar, het Hy verwerping ervaar soos ons ervaar, vervolging, marteling, tot die dood aan die kruis. Vir wie? Vir ons!

Dit is ‘n liefde wat te groot is vir ons menslike verstand met ons selfgesentreerdheid. Ons eie ek. Gaan sit vanoggend net vir ‘n minuut en dink – vandag kom iemand by jou en stel jou die voorwaarde – ek sal jou kind, jou vrou, jou man, jou ma, jou pa laat leef, indien jy bereid is om gemartel te word, en aan ‘n kruis vasgespyker te word om te sterf.

Voor jy net vinnig ja antwoord, dink bietjie aan die implikasies daarvan vir jou liggaam, gaan lees bietjie na oor hoe erg dit op die liggaam is om aan ‘n kruis gespyker te word en daar dood te bloei en die verskriklike pyn wat daarmee gepaard gaan.

Wel, dit het Jesus vir ons gedoen … was dit vir Hom maklik? Nee, of het jy al bloed gesweet van angs en gedink dit is maklik?

In hierdie tyd waar ons Jesus se geboorte vier, ongeag wanneer Hy werklik in die jaar gebore is – Hy is gebore ander sou Hy nie aan die kruis kon sterf vir ons nie – kom ons vat ‘n tydjie, net so by ons self en dink aan Sy alles omvattende liefde vir ons.

Nog meer, kom ons eer en loof en prys en dank Hom daagliks daarvoor. Moet Hom nie by die huis los as jy in jou voertuig klim om met vakansie te gaan nie, nee, Hy moet eerste wees om ingelaat en saam geneem te word.

Kom ons leef tweedens Sy liefde vir ons aan ons medemense uit. Net so tussen ons – geskenke is nie gelyk aan liefde nie – liefde is omgee, tyd, medelye, ‘n woord van bemoediging, om vir ‘n tydjie langs iemand se siekbed te sit, om met daardie tannie te gaan gesels wie al maande geen besoekers ontvang nie. Daar is nog baie meer.

Jesus se liefde en genade is wat ons van Januarie tot nou toe gedra het. Jesus se liefde is wat ons van die hel en ewige verderf gered het – wat doen ons om te wys ons het Hom lief en is dankbaar?
Soos hierdie blom hier bo bloei Sy hart as ons nie Sy liefde wil aanvaar en uitleef nie.

Dankbaarheid in oorvloed

Goeiemôre Vriende,

Ek is ‘n vrou met ‘n hart wat oorloop van blydskap. Ons het dit reg gekry om die Namakwalaners aan die kuier en praat te kry. Julle het gee idee hoe bly ek daaroor is nie. Ek sal nou net die volgende vraag opsit, maar eerste dinge eerste en ons Vader kom eerste.

By my blydskap oor julle wat so lekker gesels, is daar my blydskap oor ons Vader seën uit die hemele. Dit reën al van vannag af. Alles is koel en nat hier in Windhoek.

Die naweek was nie lekker nie, julle sal weet dat ek ‘n maagvirus het … ja nog steeds. Maar dit is al baie beter, dankie vir almal se raad, ek waardeer dit opreg.

Gister het ek ook nog die dag begin met ‘n baie siek diertjie, my een kat. Glo my hierdie diertjie het soos ‘n bees gebulk van die pyn en ek met my lag seer lyf het nie geweet hoe ek dit moet hanteer nie.
Dom van my … in die eerste plek is dit nie vir my om dit te hanteer nie. Gelukkig het ek dit onthou en dit vir God gegee. Hoe wonderbaarlik het Hy nie net weer vir my deurgekom nie.

Hy het mense gestuur wat omgee, wat gehelp het met my kat. Wat gehelp het om op ‘n Sondag ‘n veearts te kry deur die wonderlike groep CAPU – Cat Protection Unit. Hierdie mense het ‘n veearts gekry en dadelik verantwoordelikheid geneem vir die kostes en ek kan aan hulle terugbetaal. Is dit nie wonderlik nie.

My kat is op die einde van die dag diagnoseer met ‘n verstopte urienweg, wat tot sy dood so lei, as hy nie betyds by die veearts uit gekom het nie. Hy is okei en sal seker môre kan huis toe kom.
En ek … ek het steeds ‘n maagvirus, maar baie meer dankbaarheid in my hart as die lamheid en seer in my lyf.

Dankbaarheid vir hoe ons Vader mense gestuur het na my wat meesal net hier op my eie is. Dankbaarheid oor hoe alles net in plek geval het. Dankbaarheid dat my dier leef, vir die reën en dat ek eintlik nog gesond is, want ‘n maagvirus is mos net soos verkoue, net lastig.

Dit het my aan die volgende verse:

“Gisteraand was daar nog trane en vanmôre lag ek al weer” (Ps 30:6)

“Luister, Here, en wees my genadig! Help my, Here! Ek was in die rou, maar U het my met vreugde laat dans. U het my rouklere uitgetrek en vir my feesklere aangetrek” (Ps 30:11-12).

Daar is baie meer plekke in die woord wat die dissipels, en ander mense radeloos was en tot God geroep het en Hy het uitkoms gegee. Ek dink aan die vissermanne wat heelnag probeer visvang het, en in die oggend het Jesus hulle beveel om weer in te gaan en die net aan die anderkant uit te gooi en die vangs was so goed dat die net geskeur het.

Ek dink aan toe die dissipels op die see was en die storm losgebreek het. Jesus het op die water na hul gegaan en die storm gestil.

Vriende hierdie week wil ek net begin met dankbaarheid in my hart en ek glo dat as ons elkeen gaan stil sit, ons soveel sal vind waarvoor ons dankbaar kan wees te midde van wat om ons aangaan.

Mooi loop.

Namakwaland in murg en been

Of jy jou eerste asemteug
geneem het
op Vanrhynsdorp, Vredendal of Koekenaap
of jy jou eerste treë gegee het
op Bitterfontein, Nuwerus of Soebatsfontein
of jy sitvlak heel eerste geland het
op die skoolbank in Garies
jou eerste vakansieromanse gesmeul het
daar langs die mond van die Groenrivier
kan jy maar weet
die murg in jou pype
is die
van ‘n Namakwalander
die bloed in jou are
is bont geblom
soos die vlaktes van ons aarde
as die Vader se saadsak
telkens
daar skeur
Hy ons barre aarde kleur
in wit, geel, oranje, pers, en blou
jy weet van die
rys in die miershoop
van die platklip
waar jy jou broek
se sitvlak deur ry
op die botterboom
jy weet van die koekemakranka
se krul-kop
die veldkool
wat soos groenbone smaak
die uintjie en die veldbeet
Jantjie Berends met sy
mooi rooi blom
galbitter, maar wat vir kanker help
jy weet van jakkalse
wat die vee verniel
van droogte
wat die boer laat kniel
van genade water
wat oor die vlaktes uitsak
alles bedek soos ‘n grys gordyn
dit is ons Namakwaland
geen grense of mense
kan ons dit ontneem
dit is diep-diep
in ons siele
ingebrand
en daar sal
die herinnerings vure brand
wat niemand ooit kan blus
waar ons ook al onsself bevind
of ons laaste asem uitblaas.
© Marsofine Krynauw

God se beloftes staan ...

 Goeiedag Namakwalaners,

Nouja, ek het so pas gehoor dat dit daar in my hartland baie, baie warm is. Hier in Windhoek is dit ‘n heerlike 31 grade met ‘n ligte windjie wat die blare roer. Veral die boere wat op lande en in die veld in hierdie hitte moet werk, het ek baie simpatie mee. Baie sterkte vir hierdie snikhete dag.

In hierdie dag, so op die laaste dag van November wil ek jou kom bemoedig. Wil ek jou herinner aan net ‘n paar van God se beloftes uit sy woord.

Ons elkeen se situasie, se lewe, se uitdagings is uniek. Tog is God se beloftes vir ons almal bedoel wat Jesus Christus as ons Saligmaker aangeneem het en elke dag ons vertroue ten volle op Hom rig.

Wat ook al jou situasie, jou uitdaging, jou seer, jou teleurstelling vandag is, glo my daar is ‘n belofte in God se woord vir jou. Een wat jy maar kan glo en aan vas hou. Een wat jou kan bemoedig en tot aksie kan beweeg omdat jy weet jy stap nie alleen nie.

Wees nie bevrees nie, want Ek is met jou;

kyk nie angstig rond nie, want Ek is jou God.

Ek versterk jou, ook help Ek jou,

ook ondersteun Ek jou met my reddende regterhand.

Jesaja 41:10


Want Ék weet watter gedagtes Ek aangaande julle koester, spreek die Here, gedagtes van vrede en nie van onheil nie, om julle 'n hoopvolle toekoms te gee.

Jeremia 29:11


Laat ons die belydenis van die hoop onwankelbaar vashou, want Hy wat dit beloof het, is getrou.

Hebreërs 10:23


Maar die wat op die Here wag, kry nuwe krag;

hulle vaar op met vleuels soos die arende;

hulle hardloop en word nie moeg nie,

hulle wandel en word nie mat nie.

Jesaja 40:31


As jy deur die water gaan, is Ek by jou;

en deur die riviere — hulle sal jou nie oorstroom nie;

as jy deur vuur gaan, sal jy jou nie skroei nie,

en die vlam sal jou nie brand nie.

Jesaja 43:2


Hy wat julle roep, is getrou; Hy sal dit ook doen.

1 Tessalonisense 5:24


EN mag die God van alle genade self, wat ons geroep het tot sy ewige heerlikheid in Christus Jesus, nadat ons 'n kort tyd gely het, julle volmaak, bevestig, versterk en grondves!

1 Petrus 5:10


Bid, en vir julle sal gegee word; soek, en julle sal vind; klop, en vir julle sal oopgemaak word.

Matteus 7:7


Die Here vertraag nie die belofte soos sommige dit vertraging ag nie, maar Hy is lankmoedig oor ons en wil nie hê dat sommige moet vergaan nie, maar dat almal tot bekering moet kom.

2 Petrus 3:9


Jy moet dan weet dat die Here jou God God is, die getroue God wat die verbond en die goedertierenheid hou vir die wat Hom lief het en sy gebooie onderhou, in duisend geslagte.

Deuteronomium 7:9


Jesus sê vir haar: Ek is die opstanding en die lewe; wie in My glo, sal lewe al het hy ook gesterwe; en elkeen wat lewe en in My glo, sal nooit sterwe tot in ewigheid nie. Glo jy dit?

Johannes 11:25-26


TERWYL ons dan hierdie beloftes het, geliefdes, laat ons ons van alle besoedeling van die vlees en die gees reinig, en laat ons die heiligmaking in die vrees van God volbring.

2 Korintiërs 7:1


Kyk, Ek staan by die deur en Ek klop. As iemand my stem hoor en die deur oopmaak, sal Ek ingaan na hom toe en saam met hom maaltyd hou, en hy met My.

Openbaring 3:20


God is geen man dat Hy sou lieg nie; of 'n mensekind dat dit Hom sou berou nie. Sou Hý iets sê en dit nie doen nie, of spreek en dit nie waar maak nie?

Numeri 23:19


Wie oorwin, sal beklee word met wit klere, en Ek sal sy naam nooit uitwis uit die boek van die lewe nie, en Ek sal sy naam bely voor my Vader en voor sy engele.

Openbaring 3:5


My boog gee Ek in die wolke; dit sal 'n teken wees van die verbond tussen My en die aarde.

Genesis 9:13


Waardeur Hy ons die grootste en kosbare beloftes geskenk het, sodat julle daardeur deelgenote kan word van die goddelike natuur, nadat julle die verdorwenheid ontvlug het wat deur begeerlikheid in die wêreld is.

2 Petrus 1:4


Want so lief het God die wêreld gehad, dat Hy sy eniggebore Seun gegee het, sodat elkeen wat in Hom glo, nie verlore mag gaan nie, maar die ewige lewe kan hê.

Johannes 3:16


En kyk, ek gaan vandag die weg van die ganse aarde, maar julle moet erken met jul hele hart en met jul hele siel dat nie een woord van al die goeie woorde wat die Here julle God oor julle gespreek het, onvervuld gebly het nie; alles het vir julle uitgekom, nie een woord daarvan het onvervuld gebly nie.

Josua 23:14

Geliefdes, nou is ons kinders van God, en dit is nog nie geopenbaar wat ons sal wees nie; maar ons weet dat ons, as Hy verskyn, aan Hom gelyk sal wees, omdat ons Hom sal sien soos Hy is. En elkeen wat hierdie hoop op Hom het, reinig homself soos Hy rein is.

1 Johannes 3:2-3

Want die liggaamlike oefening is tot weinig nut, maar die godsaligheid is nuttig vir alles, omdat dit die belofte van die teenwoordige en die toekomende lewe het.

1 Timoteus 4:8

Maar die Skrif het alles ingesluit onder die sonde, sodat die belofte uit die geloof in Jesus Christus aan die gelowiges gegee kon word.

Galasiërs 3:22

En daarom is Hy Middelaar van 'n nuwe testament, sodat, terwyl daar 'n dood plaasgevind het vir die verlossing van die oortredinge onder die eerste testament, die wat geroepe is, die belofte van die ewige erfenis kan ontvang.

Hebreërs 9:15

En Ek rig my verbond met julle op, dat alle vlees nie meer deur die waters van die vloed uitgeroei sal word nie, en dat daar geen vloed meer sal wees om die aarde te verwoes nie.

Genesis 9:11

Maar as julle jul weë en julle handelinge waarlik goed maak, as julle waarlik reg doen onder mekaar; vreemdeling, wees en weduwee nie verdruk nie en geen onskuldige bloed in hierdie plek vergiet nie en agter ander gode nie aan loop tot julle eie skade nie — dan sal Ek julle laat woon in hierdie plek, in die land wat Ek aan julle vaders gegee het, van eeu tot eeu.

Jeremia 7:5-7

Hierdie beloftes en riglyne uit ons Vader se woord is ook vir die een wat nog nie vir Jesus aanvaar het nie. Vandag, as jy jou sondeskuld erken en aanvaar dat Jesus Christus daarvoor gesterf het. Dat Hy jou en my Middelaar is, ons Verlosser is, die Seun van God is en self God is, sal Hy jou vergewe. Sal hy jou verlede en alles daarin skoon was en vergeet as jy kies om Hom lief te hê en te volg. Om Sy woord te lees en Hom elke dag beter te leer ken. Sy groot genade, so onbeskryflike liefde vir ons, voor ons nog eers Hom gekies het.

Hou aan God se beloftes vas, daar is nog baie meer in Sy woord. Staan vas en gee elke dag alles vir Hom. Hy kan alles en weet alles en het jou steeds lief.

Gesondheid!

Goeiemôre Vriende,

Jammer ek het julle gister afgeskeep, ek weet nie of ek stadiger raak en of die dae net korter raak nie. Steeds, hier is ek nou. Hoop dit gaan goed met julle, so op die tweede laaste dag van November.
Ek wil graag met julle oor gesondheid gesels vanoggend, ‘n onderwerp wat ek glo baie mee kan vereenselwig. Jy kan of dit hê of die gebrek daaraan beleef.

Die feite is, ek dink nie ek is verkeerd as ek die aanname maak dat mense wat gesond is dit heeltemal as vanselfsprekend aanvaar nie.

Ons dink nie daaraan nie, ons staan elke oggend op en vaar die dag in. Soms het ons geen begrip vir die mense wat siek is nie, geen simpatie nie.

Ek wil graag voorbeelde uit my eie lewe gebruik as julle my sal toelaat.
Jare gelede het ek geweldig aan migraines gely. Ek bedoel nie een ‘n maand of selfs een ‘n week nie, ek bedoel tot drie maal ‘n week. Ek is van geaardheid nie iemand wat kan in ‘n donker kamer gaan lê vir dae tot die pyn nou uit eindelik die pad vat nie. Daardie tyd was ek ook ‘n moeder met kinders wat versorg moes word en ‘n man.

Elke keer as ek so ‘n aanval gekry het, moes ek ‘n dokter in die hande kry om my ‘n inspuiting te gee wat dit byna dadelik weg neem of ten minste binne ‘n uur. Ek moes werk, kinders versorg en vrou wees.

Die mense om my kon nie my pyn sien nie, want hoe sien jy daardie versengende pyn wat in iemand se kop en oë die persoon wil laat sterf? Dus het hulle nie eintlik simpatie met my gehad nie, tot eendag.
My man het wakker geword met ‘n migraine. Hy wat nooit eers hoofpyn gekry het nie. Hy wou sterf van die pyn, kon sy kop nie oplig nie, was naar, kon nie gaan werk nie.

Daar is die bordjies verhang. God is getrou en het hom gewys, want dit is net as jy self iets ervaar wat jy weet hoe dit ‘n mens se lewe kan beïnvloed. Ek is dankbaar dat God my ook hiervan genees het.
Ek het op skool my rug beseer en oor die jare al ‘n rug en nekoperasie gehad. My rug is 200% beter as wat dit my hele skoolloopbaan was. Tog so nou en dan is dit ontevrede met my oor ek tuin werk of wat ook al doen waarvan dit niks hou nie. Dan het ek pyn en al wat ek kan doen is om so stil as moontlik te wees en te wag totdat die senuwee nou weer los kom en ek kan aangaan. Intussen moet ek net die pyn beheer.

My vriend het dit nie verstaan as ek so seer het, nie kan opstaan van ‘n stoel af nie, nie kan saam met hom swaar goed dra nie.

Hy is ‘n baie fikse persoon, draf met sy hond en klim op die dak, en spring oor die draad as hy moet. Tot eendag …

Daardie oggend bel hy my en hy huil van die pyn. Verduidelik aan my hy kan nie beweeg nie so pyn sy rug. Ek wat weet presies hoe dit is, kry hom toe vreeslik jammer en stel voor hy moet gaan lê dit is al wat sal help.

Nadat hy wat nooit pille wil drink nie, uiteindelik ingegee en spierverslappers en anti-inflammatoriese middels begin drink het, het sy rug beter geraak. Tog het dit nooit weer heeltemal reg gekom nie. Dit is mos maar ‘n rug. Elke nou en dan het hy pyn.

Eendag sit ons so en hy vra: Hoe is jou rug deesdae? Ek hoor nie dat jy meer daaroor kla nie.
My antwoord: “My rug is nou eers weer reg, tot die volgende keer wat ek dit kwaad maak.”
Toe bieg hy dat hy nooit kon verstaan hoe ek so pyn kon hê van my rug, nie kon beweeg nie, nie kon opstaan sonder om te kerm nie, maar nou baie goed verstaan hoe dit is.

Dit is hoe ons mense is … ons moet eers voel om te glo.

Wat sê die Woord oor gesondheid?

En julle moet die Here julle God dien; dan sal Hy jou brood en jou water seën, en Ek sal siektes uit jou midde verwyder.
Eksodus 23:25

Geliefde, ek wens dat dit met jou in alles goed mag gaan en dat jy gesond is, soos dit met jou siel goed gaan.
3 Johannes 1:2

Hy genees die wat gebroke is van hart,
en Hy verbind hulle wonde.
Psalm 147:3

'n Vrolike hart bevorder die genesing,
maar 'n verslae gees laat die gebeente uitdroog.
Spreuke 17:22

Vriendelike woorde is soos 'n heuningkoek:
soet vir die siel en 'n genesing vir die gebeente.
Spreuke 16:24

Wees nie wys in jou eie oë nie;
vrees die Here, en wyk af van die kwaad;
dit sal genesing wees vir jou liggaam
en verkwikking vir jou gebeente.
Spreuke 3:7-8

Want die liggaamlike oefening is tot weinig nut, maar die godsaligheid is nuttig vir alles, omdat dit die belofte van die teenwoordige en die toekomende lewe het.
1 Timoteus 4:8

En weer verdriet uit jou hart, en hou die kwale weg van jou liggaam, want die jeug en die jonkheid is nietigheid.
Prediker 11:10

Die Woord maan ons om ons liggame op te pas omdat dit nie ons eie is nie. Om daarmee God te eer. Om ook ons gees gesonde te hou deur ‘n nou pad met God te stap.

Tog is daar soveel mense wat siek is, wat kroniese siektes soos kanker, alsheimers en vele meer het wat hulle hele lewens omvergooi. Hulle in erge pyn dompel. Vir die meeste van hulle gaan daar nie genesing wees van hul liggame nie.

Watter troos is daar vir hulle? Die troos dat ons aardse liggame verganklik is en dat siekte hier op aarde nie ons geestelike liggaam kan aanraak nie. Dit is juis die rede hoekom ons nie aan ons aardse liggaam moet vaskleef nie, maar eerder aan ons geestelike lewe met God tyd moet spandeer.

Eendag sal ons almal as Jesus kom ‘n verheerlikte liggaam, wat ‘n geestelike liggaam is ontvang.
Intussen moet ons dankbaar wees as ons ‘n gesonde aardse liggaam het. Elke dag ons Vader dank dat Hy sy genesende hand op ons hou en ons liggame onderhou. Ons ken nie die stryd, pyn en lyding van die wat siek is nie. Vir hulle moet ons in gebed dra, hulle help om in geloof te bly staan deur die pyn en die lyding van hul aardse liggame.

Die grootste rykdom wat ons hier op aarde kan hê, is om met God ons Vader ‘n pad te stap en dit met ‘n gesonde liggaam te kan doen. Dit kan geen geld koop nie!

Liefde teenoor vrees

 Vriende,

Vertrou julle het ‘n goeie naweek gehad. Hier by ons het dit Saterdag gereën en ons is baie dankbaar daaroor. Die laaste week in November het voorwaar aangebreek.

Vanoggend wil ek bietjie oor vrees met julle gesels. Ek hoor dat daar veral van die manne is wat sê: Ek vrees niks.

Dit is egter nie waar nie, want as jy ‘n boer is of jy nou in die Namakwaland boer met skaap, of koring en of jy nou ‘n Olifantsrivier boer is wat met druiwe, tamaties, groente of wat ook al boer – jy bekommer jou oor iets. Wat dink jy is dit anders as vrees?

Ek dink terug aan hierdie jaar en die baie water wat daar in daardie selfde Olifantsrivier vallei gelê het. Wingerde was vir lank oorstroom. Nie een maal nie, twee maal.

Die oes moet aan die begin van volgende jaar daar wees. Gaan daar ‘n oes wees? Jy sal self al hierdie antwoord kan gee … ek ken ook die antwoord want ek het vriende en familie wat daar woon en boer.

Van dit wat ek gehoor het, lyk die prentjie nie so rooskleurig nie.

Dit is nie al waaroor daar vrees is nie, dalk het jy siekte in jou familie, dalk moet jou kind volgende jaar begin werk, en jy weet nie waar sal jou kind werk kry nie. Dalk bekommer jy jou oor die invloed van politiek in jou omgewing, want dit raak jou direk.

Wat nou gemaak met al die dinge wat ons elke dag lewe noem wat vol struikelblokke kan wees. Wat nou gemaak met die vyand wat ons net wil bly oortuig dat dit nooit goed sal gaan nie, dat alles nie sal uitwerk nie, ens.

Eerstens moet jy weet in wie jou krag lê. In jou God. In die bloed van Jesus wat jou vrygekoop het.

Tweedens moet jy weet dat die vyand altyd, altyd ‘n leuenaar is en die gemors wat hy in jou oor fluister moet jy dadelik van vergeet.

Inteendeel, jy moet soos ons pastoor die ander dag gesê het hom terugstuur van waar hy kom – stuur hom hel toe, dit is waar hy hoort.

Jy kan hierdie net weet en glo as jy elke oggend wanneer jy jou oë oopmaak weet en besef hierdie dag kan ek net loop en leef met my hand in God se hand. As jy weet en besef hoe lief God jou het, en jy Hom ook lief het. Jy ook bereid is om al sy beloftes in sy woord te glo en dat Hy altyd die beste vir jou wil hê.

Ek het ‘n hele paar verse hier onder. Kyk gerus na elkeen. Daar is nog baie, baie meer in die Woord. Gaan kyk daarna. Kies vir jou een, skryf dit op ‘n papiertjie, hou dit in jou sak. Lees dit deur die dag. Glo my daar is geen beter manier as om die vyand met sy nonsens te verjaag as om hom aan God se woord te herinner nie. Dit is wat Jesus ons geleer het toe die vyand hom in die woestyn versoek het – Hy het die duiwel verjaag deur die te herinner aan God se beloftes in sy woord.

Daar is geen vrees in die liefde nie; maar die volmaakte liefde dryf die vrees buite, want die vrees sluit straf in, en hy wat vrees, het nie volmaak geword in die liefde nie.

1 Johannes 4:18

Wees nie bevrees nie, want Ek is met jou;

kyk nie angstig rond nie, want Ek is jou God.

Ek versterk jou, ook help Ek jou,

ook ondersteun Ek jou met my reddende regterhand.

Jesaja 41:10


Die dag as ek vrees, sal ék op U vertrou.

Psalm 56:4

Het Ek jou nie beveel nie: Wees sterk en vol moed, wees nie bevrees of verskrik nie; want die Here jou God is met jou, oral waar jy heengaan.

Josua 1:9


Want God het ons nie 'n gees van vreesagtigheid gegee nie, maar van krag en liefde en selfbeheersing.

2 Timoteus 1:7


Die vrees vir die mens span 'n strik;

maar hy wat op die Here vertrou, sal beskut word.

Spreuke 29:25


LAAT julle hart nie ontsteld word nie; glo in God, glo ook in My.

Johannes 14:1


Want julle het nie ontvang 'n gees van slawerny om weer te vrees nie, maar julle het ontvang die Gees van aanneming tot kinders, deur wie ons roep: Abba, Vader!

Romeine 8:15

Elke een van hierdie beloftes is waar, hou daaraan vas. Sorg dat dit jou anker, jou gids, jou bemoediging, jou alles is. Moenie luister na mense se negatiewe woorde nie en nog minder na die vyand s’n.

Om dit laastens mooi vir jou te verduidelik: As jy iemand onvoorwaardelik lief het en vertrou vrees jy mos nie dat daardie persoon jou sal skade doen nie.

God het jou meer lief as onvoorwaardelik!

Tyd is omgee

Vriende,

Ek is hopeloos laat vandag. Ten minste kan ek met julle die goeie nuus deel dat dit heerlik hier by ons gereën het van gisteraand af en nog gaan reën.

Ek het eers vanoggend 'n vriendin gaan bederf op haar verjaardag wat eintlik al gister was. Sy is een van daardie mensies wat altyd besig is en altyd 'n hart vir ander het.

Ons kan altyd lekker saam lag, raad vra, bid of sommer net lekker gesels. Sy is die een persoon wat my altyd laat klink soos die wêreld se beste skrywer en lees ook elke boek wat daar uit my pen verskyn.
Ons het almal so 'n persoon nodig, iemand wat altyd eerlik en opreg is. Wat jou ondersteun in alles wat jy doen en selfs vir jou tyd maak al is hulle hoe besig.

Wat nog vir my wonderlik is van hierdie vrou en haar familie is dat hulle vir mekaar tyd maak. Haar man is 'n skoolhoof by een van die privaatskole in Windhoek, sy werk by 'n nasorg in die namiddae, haar kinders, wat almal getroud is, werk almal.

Deur die week sal sy waar sy tyd het met 'n vriendin koffie drink, Vrydae namiddae is haar en haar man sy tyd, dan gaan drink hulle alleen koffie. En naweke word daar met al die kinders saam gekuier ten minste een middag of aand.

Dit bring my terug na my siening van tyd en mense waarvoor jy omgee: as iemand of iets vir jou belangrik genoeg is, sal jy tyd maak vir dit.

Bo aan jou lys moet jou God wees, daarna jou man/vrou, daarna jou kinders en daarna die res van die mense in jou lewe.

As daardie rangorde reg is, sal jy altyd tyd vir almal hê en daar sal liefde en respek wees.

Mooi naweek vir julle.

My dank aan Solly Levi vir die gebruik van sy uitmuntende foto.

Jou keuse ...

 Goeiedag Vriende,

Die week is byna op sy einde en dit is diep somer hier by ons in Windhoek. Daar is darem ‘n paar wolkies in die lug, en ons hoop hulle voorspel ‘n bietjie lafenis vir ons later.

Vanoggend wil ek bietjie stilstaan by ‘n vers in Jeremia wat ons almal sekerlik ken, maar tog vind ek dikwels dat mense net die eerste deel daarvan lees en nie die daaropvolgende verse wat net so belangrik is daarmee saam nie.

Ja, ek verwys na Jeremia 29:11Ek weet wat Ek vir julle beplan, sê die Here: voorspoed en nie teenspoed nie; Ek wil vir julle 'n toekoms gee, 'n verwagting! 12Dan sal julle My aanroep, tot My kom bid, en Ek sal julle gebede verhoor. 13Julle sal vra na my wil en julle sal dan my wil ken as julle met julle hele hart daarna vra.

In die eerste gedeelte van die vers 11 vertel God ons dat Sy planne vir ons goed is, dat Hy wil hê dat dit met ons goed moet gaan en ons voorspoedig moet wees in ons toekoms.

Maar die tweede deel is baie meer belangrik as ek so daarna kyk. ‘12Dan sal julle My aanroep, tot My kom bid, en Ek sal julle gebede verhoor. 13Julle sal vra na my wil en julle sal dan my wil ken as julle met julle hele hart daarna vra.’

God ons Vader weet wat Sy planne vir ons is, tog begeer Hy dat ons hom sal aanroep, sal bid tot hom. Ons afhanklikheid van hom sal verklaar. Sal vra na Sy wil vir ons lewens en nie ons eie nie.

Daarop volg die pragtige troos en belofte: ‘Ek sal julle gebede verhoor … julle sal dan My wil ken as julle met julle hele hart daarna vra.’

Is ons bereid om God se wil vir ons lewens te volg? Vra ons met ons hele hart daarvoor, bid ons tot Hom met ‘n verwagting. Of probeer ons Hom net in boelie in dit wat ons vir onsself wil hê?

Hierdie belofte is baie duidelik, daar is niks aan hierdie verse wat jy kan misverstaan of waarmee jy verward kan wees nie.

Jesus was ons voorbeeld in Getsemane … selfs daar, terwyl Hy die Seun van God, self God, bloed gesweet het van angs aan die gedagte dat Hy die beker van sonde moes drink het Hy steeds gevra …’laat hierdie beker by my verby gaan my Vader, maar nie my wil nie U wil.’

Ons sal nooit in ons lewens ‘n beker soos daardie hê, wat ons so sal laat bloed sweet nie, want Jesus het dit reeds namens ons gedrink. Dus die ‘bekers’ waarmee ons sukkel sal nooit so erg wees nie, hoekom kan ons nie soos Jesus in gehoorsaamheid tot ons Vader leef en ook Sy wil in alles in ons lewens soek nie.

Die beloftes is duidelik, baie duidelik. Of ons daardie beloftes ons eie gaan maak, is ook ons keuse, die grondwerk is reeds deur Jesus gedoen.

Hoe doen ons God se wil?

Vriende,

Jammer ek kom so laat by julle uit, maar soms gebeur dinge mos maar so. Liewer laat as nooit, of hoe?
Hoe kry ons dit reg om volgens die wil van God te leef?

Meeste mense dink dit is heeltemal onmoontlik. Dit is nie onmoontlik nie. En jy hoef dit nie alleen te doen nie.

Matteus 7:7-11 Bid, en vir julle sal gegee word; soek, en julle sal vind; klop, en vir julle sal oopgemaak word. Want elkeen wat bid, ontvang; en hy wat soek, vind; en vir hom wat klop, sal oopgemaak word. Of watter mens is daar onder julle wat, as sy seun hom brood vra, aan hom 'n klip sal gee; en as hy 'n vis vra, aan hom 'n slang sal gee? As julle wat sleg is, dan weet om goeie gawes aan julle kinders te gee, hoeveel te meer sal julle Vader wat in die hemele is, goeie dinge gee aan die wat Hom bid!

Ons verstaan opsetlik hierdie verse verkeerd, want ons wil aardse goed vra. Ons wil ‘n nuwe motor, ‘n groot huis, ‘n plaas, ‘n motorfiets, of wat ook al vra en as God dit dan nie gee nie, want Hy weet dit is dalk nie vir jou goed nie, dan is ons ontsteld.

As ons vir die dinge vra wat ewigheidswaarde het, wysheid, insig, onderskeidings gees sal Hy dit vir ons gee. Dit is glad nie te sê dat Hy nie vir ons materiële dinge sal gee nie, maar net die wat Hy weet ons nodig het, en ons nie van Hom af sal wegneem nie.

In Kolossense noem Paulus ook dat hy vir die gemeente bid dat God hulle sy wil sal bekend maak deur Sy Gees.

Gaan Hy vir ons presies sê wat ons moet doen? Nee, Sy Gees gaan jou rig en leer met daardie ‘stemmetjie’ wat jou maan om goed nie te doen nie, of goed te doen waaroor jy twyfel.

Kolessense 1: 9Daarom, van die dag af dat ons van julle gehoor het, hou ons ook nie op om vir julle te bid nie. Ons vra God dat Hy deur al die wysheid en insig wat die Gees gee, julle sy wil duidelik sal laat ken, 10sodat julle tot eer van die Here sal lewe deur net te doen wat Hy verlang.

Uit onsself is ons baie male nog te self gesentreerd om die wil van God te doen. Daardie eie ek moet sterf. Dit is een van die voorwaardes wanneer jy jou hart en lewe vir Jesus gee. Hy het mos nie net gedeeltelik aan die kruis gesterf nie, nee hy het heeltemal gesterf.

Soos Filippense 2 so mooi sê dit is net God deur sy Gees wat ons gewillig maak om sy wil te doen. Daar is soveel meer wat Hy ons wil gee, as ons maar net sy wil sal doen.

Filippense 2:12My geliefdes, julle was altyd gehoorsaam wanneer ek by julle was. Des te meer moet julle gehoorsaam wees nou dat ek nie daar is nie. Julle moet julle met eerbied en ontsag daarop toelê om as verloste mense te lewe, 13want dit is God wat julle gewillig en bekwaam maak om sy wil uit te voer.
14Doen alles sonder kla of teëpraat.

Daarby maan Paulus ons om nie dinge te doen terwyl ons kla nie, want God wil nie enigiets hê wat jy met ‘n gekerm gedoen het nie.

Weereens, Jesus het nie te kere gegaan aan die kruis nie, nee! Hy het nog ons Vader gevra om die mense te vergewe vir wat hulle aan Hom gedoen het.

Ons Vader vir almal lief, maar dit maak sy hart ekstra bly as ons in sy wil wandel en dit met ‘n dankbare hart doen.

Spore ...

 Die getuienis

van ‘n dag geleef

van spore getrap

lê nog vanaand

in die sagte duinsand

maar as die môre kom

behoort dit aan gister

is daar geen teken meer van

want deur die nag

wyl maan wit

teen die inkblou

hemel hou

sy silwer strale

‘n voetpad oor

die blou water baan

is wind besig

om die spore van vandag

uit te wis

en wanneer die nuwe dag

oopmond lag

lê ons elkeen se duin

gereed

vir die nuwe spore

van hierdie dag

trap jou spore sag

dat jy nie spore laat

in die harte van die mense

om jou heen

dat hul nie merke laat

laat hul liewer jou lag

as die spore wat jy trap

onthou!

©Marsofine Krynauw

Vertrou ...

 
Goeiedag Vriende,

Die jaar se uurglas loop vir sommige vinnig en ander stadig uit. Vir die vrou wat die koekblikke probeer vol kry, die huis probeer skoon kry, die klere probeer reg kry vir die groot vakansie, gaan dit te vinnig. Vir die tiener wat besig is met eksamen en nie kan wag om strand toe te gaan nie, gaan dit stadig.

Hoe dit ook al sy … deur dit alles staan een feit vas: vertrou op God!

Vanoggend deel ek graag met julle die bekende en pragtige beloftes van Psalm 37.

Psalm 37:3Vertrou liewer op die Here en doen wat goed is,

woon en werk rustig voort.

4Vind jou vreugde in die Here,

en Hy sal jou gee wat jou hart begeer.

5Laat jou lewe aan die Here oor

en vertrou op Hom; Hy sal sorg.

Jy is dalk die vader van hierdie huishouding, die wingerd staan mooi groen op die land, maar die drag is maar skraal of ontbreek dalk. Jy weet nie of jy wil hê die tyd moet stilstaan of vinnig verby flits nie. Miskien staan jy moedeloos moeg in die bloedige son en wingerd plant.

Wat jou situasie ook al is hierdie tyd van die jaar – weet dat ons ‘n God en Vader het wat jou spesifieke situasie beter ken as jyself. Ek weet dit is moeilik, ek weet jy wil self dit oplos … maar hoekom het jy dit dan nog nie opgelos as jy dink jy kan nie? Word vir een oomblik stil, besin oor wat jy al alles gedoen het om die uitdagings wat jy mee stoei te oorbrug.

God nooi jou vandag, of jy ‘n tuisteskepper, ‘n tiener, ‘n boer, ‘n besigheidsman of -vrou, ‘n ouma of oupa is. Hy nooi jou om Hom ten volle te vertrou. Te glo dat Hy jou situasie wil en kan oplos.

Ek word vanoggend wakker met die woorde van ‘n bybelvers wat my geliefde tante Ellie so dikwels opgesê het dat ek dit vandag, veertig jaar later nog onthou: ‘ek slaan my oë op na die berge, waar sal my hulp vandaan kom?’

Dit kom natuurlik uit Psalm 121: Ek slaan my oë op na die berge: waar sal my hulp vandaan kom?

2 My hulp is van die Here wat hemel en aarde gemaak het.

3Hy kan jou voet nie laat wankel nie; jou Bewaarder kan nie sluimer nie.

Dadelik besef ek, dat hierdie vers nie net vir my is om al het ek geen iets wat my pla, maar ook net is om my weer te vir seker wie my al en my alles moet wees. Dit is ook vir my gegee om te deel met elke mens wat of ‘n moeilike situasie beleef of net moet hoor waar ons hulp, waar ons krag, waar ons voorsiening, waar ons liefde vandaan kom.

Vandag kom Dawid hy vertel ons op wie ons moet vertrou en waar ons altyd ons hulp sal kry. Laat ons daarteen waak dat ons nie net na ons God sal hardloop in tye van nood nie, maar elke dag vir alles op Hom sal vertrou en Hom elke dag al die liefde, eer, glorie, dank en lofprysing sal gee wat Hom toekom.

Wat is jou verwagting?

 Goeiemôre Vriende,

Hoop julle is lekker uitgerus na die naweek. Hier is dit heerlik met ‘n ligte windjie wat met die blare speel. By julle sien ek is dit ook nie te warm nie, en daar is self voorspelling van bietjie reën.

Ek het hier aan die begin van die nuwe week vir jou ‘n vraag. Wat is jou verwagting van ons Vader die week?

Verwag jy dat dinge na die einde van die jaar toe net erger sal raak? Dat die situasies in jou lewe net op rampspoed sal uitloop? Dat jy kind dalk nie sy of haar matriekeksamen sal slaag nie? Dat jy nie met vakansie sal kan gaan nie, want die finansies is net nie daar nie? Dat daardie siek familielid net sal sieker word?

1 Korinthiers 2:9 Maar soos daar geskrywe staan:

“Wat die oog nie gesien en die oor nie gehoor het nie,”

en wat in die hart van 'n mens nie opgekom het nie,

dit het God gereed gemaak vir dié wat Hom liefhet

Hier kom Paulus en bas ons bubble. Wat beteken hierdie vers nou eintlik? Dit beteken dat ek en jy geen idee het hoe graag God ons wil seën of van die omvang van die seëninge wat Hy vir ons het as ons Hom lief het en getrou in sy weë stap nie.

Hy ken ons harte, Hy weet of ons op Hom vertrou vir alles in ons lewe. Hy weet of ons strewe elke dag is om Sy wil te doen in alles.

Hy wil sy kinders beloon, hier op aarde al reeds. Ons is egter ons eie grootste vyande. Ons glo nie dat God ons wil seën nie. Ons glo nie dat dit vir ons beskore is dat iets goed met ons moet gebeur nie. Dat God ons wil guns gee nie.

Hoekom glo ons dit nie? Omdat die vyand jou met leuens voer en jy eerder die vyand se leuens glo oor jouself. Jy kry dit nie reg om te glo dat God jou, met al jou foute wat jy maar te goed ken, kan so liefhê nie.

Dan is dit miskien tyd dat jy meer Sy woord lees. Gaan kyk na al Sy beloftes daar vir ons, vir jou en vir my vandag nog.

Dawid het dit so mooi gesê in Psalm 16:5-6: Here, U is my lewe, U sorg vir my.

Wat ek ontvang, kom alles van U af.

6'n Pragtige deel is vir my afgemeet,

ja, wat ek ontvang het, is vir my mooi.

Was Dawid sonder sonde? Nee, hy was ongehoorsaam, net soos ons soms is. Die verskil is, hy het dit geweet en dit nie daar gelos nie. Hy het erken toe hy besef het dat hy gesondig het. Hy het vergifnis gevra omdat hy besef het sonder God, sonder sy liefdevolle Vader kan hy nie leef nie. Verder het hy nie toegelaat dat die vyand hom met leuens voer nie, maar sy deel geneem wat God vir hom so graag wou gee.

Kom ons luister na die stem van die Heilige Gees, kom ons erken as ons verkeerd doen en vra vergifnis. Daarna staan ons soggens op met ‘n verwagting in ons harte, ‘n verwagting om te sien wat God vandag vir ons wil doen.

Soos ‘n kleinkind wat nie kan slaap die aand voor sy/haar verjaardag nie, omdat hulle te opgewonde is om te sien watter geskenk hulle Pappa en Mamma vir hulle gaan gee.

So opgewonde moet ons wees oor die geskenke wat ons Vader ons elke dag wil gee.

Roos tussen die rotse...

 

Goeiedag Vriende,

‘n Heerlike koel oggend in Windhoek, met beloftes van reën in die lug. Na ‘n week van hard werk, en die lewe aanvat wat genoeg van sy eie struikelblokke in ons weg plaas, kan ons uitsien na ‘n paar dae van rus.

Voor dit wil ek egter met julle oor iets praat wat vir ons almal soms ‘n probleem is. Wat is dit? Daardie een persoon in jou lewe wat jou vyand is. Die persoon wat jou net nie kan uitlos nie, jou uittart en jou vies maak. Alles wat jy sê of bevraagteken of kritiseer. Regtig vir jou ‘n doring in die vlees is.

Nou kan jy dadelik wonder, hoekom daar ‘n vermaning aan jou is omtrent hierdie persoon. Omdat hierdie die persoon is wat dit regkry om jou te laat verkeerd praat en optree.

Baie gereeld voel jy jy wil net hierdie persoon terug kry, net vir hierdie persoon iets sê wat hulle op hul plek sal sit. Soms wend jy jou selfs tot sosiale media en plaas daardie pos wat jy glo niemand weet vir wie die woorde bedoel is nie. Die waarheid is, hulle weet en die persoon weet ook.

Nou vra jy my, wat is daarmee verkeerd? Die persoon irriteer en verpes my dan al so lank.
Kyk wat sê Titus daaroor in die Woord van God wat ons as Christene se gids is.

Titus 2: 7Betoon jou in alles 'n voorbeeld van goeie werke, met onvervalstheid in die leer, waardigheid, opregtheid.

8 Laat die woord gesond en onweerspreeklik wees, sodat die teëstanders beskaam kan word en niks slegs kan hê om van julle te sê nie.

Titus maan ons om nie aan die versoeking toe te gee om net soos daardie persoon op te tree nie. Om eerder ‘n onberispelike voorbeeld te wees dat ons nie daardie persoon nog meer ammunisie kan gee om teen ons te gebruik nie.

Ons volmaakte voorbeeld was weereens ons Heiland self terwyl Hy hier op aarde gewandel het. Terwyl die mense hom uitgejou en bespot het, hom geslaan en gemartel het, het hy steeds vir hulle gebid tot ons Vader.

Ons het ‘n verantwoordelikheid teen oor ons Vader om altyd sy Naam te eer in wat ons doen. Ons is sy kinders en dra sy naam. Dit is soos wanneer jou kinders of jou vrou, of jou broer of suster iets verkeerd aanvang waarvan die hele wêreld weet. Dan sal ons vinnig wees om aan daardie persoon te sê: Nee, hoe kan jy dit gedoen het, hoe kan jy ons as familie se naam so in die skande steek?

Maar lyk my ons gee nie om as die Almagtige Soevereine God se kinders om sy naam in die skande te steek met ons optrede nie. Miskien moet ons elkeen gaan introspeksie hou.

Timotheüs kom gee ons ‘n riglyn wat baie duidelik vir ons vertel dat ons ‘n voorbeeld moet wees, want ons is die erfgename van Christus, duur gekoop met sy bloed.

1 Timotheüs 4: 12 … maar wees 'n voorbeeld vir die gelowiges in woord, in wandel, in liefde, in gees, in geloof, in reinheid.

Die oordeel en vergelding kom ons nie toe nie. Ons moet vir hierdie persoon bid. Bid dat God hulle harte sal verander, bid dat God hulle omstandighede sal verander, want dit is heel dikwels asgevolg van hulle seer, teleurstelling, jaloesie wat hulle so optree. Soos Jesus aan die kruis gesê het: “Vader, vergewe hulle, hulle weet nie wat hulle doen nie.”

Kom ons gee die mens/mense wat ons tot sonde dwing aan ons Vader oor. Kom ons tree so op dat hulle beskaamd sal staan omdat hulle niks het om oor ons te sê nie. Nie in ons eie krag nie, maar deur die krag van die Heilige Gees wat ons Helper is. Wees jy die roos tussen die rotse.

Mag julle elkeen ‘n rustige en vreugdevolle naweek geniet.

Lewenswater vir sieledors

Goeie, goeiemôre Vriende,

Hoekom is ek so ekstra opgewek vanoggend? Maklik, dit het gisteraand 14mm gereën hier by my huisie. Alles is nat en vars vanoggend. Ek is dankbaar om te hoor dat die erge hitte darem ook bietjie by julle gebreek is.

Vanoggend wil ek graag gesels oor daardie gevoel in jou binneste wat jy nie ‘n naam kan gee nie. Daardie gevoel dat jy na iets soek, na meer soek, na vrede soek.

Ons ken almal die verhaal van die Samaritaanse vrou wat Jesus by die put ontmoet het.

Hierdie vrou het ook na meer gesoek, al het sy dit nie eers self besef nie. Sy het van die een man na die ander gegaan. Dan ontmoet sy Jesus en hy tree heel anders op as wat sy van hom verwag het.

Hy was nie eers volgens haar veronderstel om met haar te praat nie. Verder wanneer hy praat sê Hy heeltemal iets anders as wat sy verwag het van ‘n man. In plaas daarvan om net nog ‘n man te word wat haar wil misbruik, kom bied Hy vir haar die lewenswater aan.

Voor Hy dit egter doen, vra hy haar om haar man te gaan haal en sy is eerlik om te erken dat sy nie ‘n man het nie. Jesus het dit reeds geweet en vertel aan haar dat sy die waarheid praat. Dan bied Hy haar die lewende water wat haar sieledors sal versadig aan.

JOHANNES 4

Die Samaritaanse vrou.

9En die Samaritaanse vrou sê vir Hom: Hoe is dit dat U wat 'n Jood is, van my vra om te drink terwyl ek 'n Samaritaanse vrou is? Want die Jode hou geen gemeenskap met die Samaritane nie.

10Jesus antwoord en sê vir haar: As jy die gawe van God geken het en geweet het wie Hy is wat vir jou sê: Gee vir My water om te drink, sou jy Hom gevra het en Hy sou vir jou lewende water gegee het.

11Die vrou sê vir Hom: Here, U het nie eens 'n skepding nie, en die put is diep; waarvandaan kry U dan die lewende water?

12U is tog nie groter as ons vader Jakob nie, wat die put aan ons gegee het en self daaruit gedrink het, en sy seuns en sy vee?

13Jesus antwoord en sê vir haar: Elkeen wat van hierdie water drink, sal weer dors kry;

14maar elkeen wat drink van die water wat Ek hom sal gee, sal in ewigheid nooit dors kry nie, maar die water wat Ek hom sal gee, sal in hom word 'n fontein van water wat opspring tot in die ewige lewe.

15Die vrou sê vir Hom: Here, gee my daardie water, sodat ek nie dors kry en hier hoef te kom skep nie.

16Jesus sê vir haar: Gaan roep jou man en kom hier.

17Die vrou antwoord en sê: Ek het nie 'n man nie. Jesus sê vir haar: Jy het reg gesê: Ek het nie 'n man nie;

18want jy het vyf mans gehad; en die een wat jy nou het, is nie jou man nie. Dit het jy met waarheid gesê.

Miskien het jy ook ‘n sieledors wat nog nie geles is nie. Hierdie lewenswater is vir almal beskikbaar. Wat moet ons doen as ons daarvan wil drink?

Ons moet die waarheid erken. Die waarheid oor ons lewe, die waarheid oor Jesus. Dus moet ons erken dat Jesus die Seun van die lewende God is, en daarna moet ons die sondige dinge waarmee ons besig is erken en bely.

Daarna sal ons die lewende water ontvang en dit sal soos ‘n fontein in ons oorborrel vir almal om te sien. Hierdie vrou kon net eenvoudig nie stil bly oor hierdie lewende water wat sy ontvang het nie.

Niemand wat Jesus as hulle Saligmaker aanvaar en van Sy lewende water elke dag uit Sy woord drink kan stilbly daaroor nie. Dit is die grootste geskenk wat ons nog ooit ontvang het, en een wat ons nooit moet suinig wees om met ander te deel nie, dit sal nooit opraak, oud raak, weg raak nie. Hoe meer jy hierdie geskenk met ander deel, hoe kosbaarder word dit.

Deel vandag die lewende water wat Jesus aan jou gegee het, wat jou sieledors geles het en elke dag nog les, met ander.

Wees bly vir ander se geluk

Goeiedag Vriende,

Heerlike wind stil dag en die Pieterpol is besig om vir my ‘n baie mooi liedjie te sing.

Vanoggend wil ek gesels daaroor om geliefdes te laat gaan. Hiermee bedoel ek nie aan die dood af te staan nie. Kom ek verduidelik.

Jare gelede, het ons besluit om ons oudste seun na ‘n hoërskool in Suid-Afrika te stuur. ‘n Skool waar hy ‘n groot keuse in sport gehad het, en ook net so ‘n groot keuse in akademie.

Hy was in die sewende hemel van geluk oor die vooruitsig om na hierdie skool te gaan. Die voorbereidings is getref en ons het die reis van 1500km aangepak. Daar was hy goed ontvang.

Toe ons hom groet en daar agterlaat moes ek maar op my tande byt om die trane terug te byt. Hoekom? Omdat ek dit nie vir hom wou moeilik maak nie. Vir die eerste paar kilometers weg van hom het ek vir die eerste en die laaste maal gehuil.

Ons kind was gelukkig. Hy het vinnig aangepas en was geliefd onder sy nuwe maats en by die onderwysers. Hy het uitgeblink op akademiese en sport gebied soos nog nooit voorheen nie.

Vriende en kennisse het gevra: hoe kry jy dit reg om jou kind so ver van jou weg te stuur?

Maklik: As my kind gelukkig is, is ek gelukkig. Hoe kan ek hom daardie geluk ontneem omdat ek selfsugtig is en hom naby my wil hou?

Soms moet ons van ons self af wegkyk as ons geliefdes veranderings in hulle lewe maak wat hulle gelukkiger sal maak. Soms moet ons dink aan hoe lekker dit sal wees as hulle gelukkig is en hulle dit gun. Gelukkig wees omdat hulle gelukkig is.

Ons is so vasgevang in hierdie wêreld waar almal net aan hulle self dink, aan hulle eie geluk dink, dat ons vergeet om gelukkig te wees as ons geliefdes gelukkig is.

Jesus was ons voorbeeld – vir Hom het dit nooit gegaan oor sy eie geluk nie, maar om Sy Vader te behaag en ander gelukkig te maak en te help.

Kom ons loop in die spore van ons Meester, kyk ‘n slag weg van onsself en wees gelukkig omdat ons mense gelukkig is, al beteken dit dat hulle dalk nie by ons is nie.

 

Jy het vergeet!

Goeiemôre Vriende,

Betrokke hier by ons in Windhoek, ons kyk uit vir die reën.

Vanoggend wil ek deel oor iets wat ons almal ken: vergeet!
Hoe dikwels, hoor jy jou man, jou vrou, jou kind, jou vriende aan jou sê oor iets wat baie belangrik vir jou was: 'Ai, ek is so jammer ek het vergeet!'

Ons self vergeet soms goed. Ons vergeet die winkellysie, ons vergeet om die kraan vir die tuin toe te draai, ens. Daagliks vergeet ons dinge. Soms vergeet ons van ons Vader, totdat die spreekwoordelike 'paw-paw die fan slaan'.

Dan kom Jesaja in hoofstuk 49:15-16 en vertel ons hoe God oor ons voel. Hoe belangrik ons vir Hom is.

Jesaja 49:15 Kan 'n vrou haar eie baba vergeet,
haar nie ontferm oor die kind
wat sy in die wêreld gebring het nie?
Selfs al sou so iets kon gebeur,
Ek sal jou nie vergeet nie.
16Ek het jou naam in my handpalms gegraveer,
Ek sien jou mure altyd voor my.


Hier kom vra God die vraag of 'n vrou haar baba kan vergeet. Hy het reeds geweet dat daar vroue gaan wees wat hulle babas gaan weggooi, nooit weer aan hulle gaan dink nie, maar daarvoor het Hy ook voorsiening gemaak in sy belofte aan ons. Hy verseker ons, al sal 'n vrou ook haar skoot se vrug verwerp, Hy sal ons nooit vergeet nie, Hy het ons name in sy handpalm graveer.

Nie op sy arm of been of iewers op sy lyf nie, op Sy handpalm. Daar waar Hy dit altyd kan sien. Is dit nie vir jou kosbaar nie, dit is beslis vir my.

Die Een wat die hele wêreld elke dag in stand hou, wat dag en nag na ons smeking, versoeke, gebede luister, vergeet ons steeds nie.

Want by ons as mense is die volgende verskoning na 'Jammer, ek het vergeet' gewoonlik 'Ek is so besig, dit is hoekom'.

Ons kan juis nie bekostig om van ons Vader, Jesus ons Koning en die Heilige Gees ons Trooster te vergeet as ons soooooo besig is nie. Hoe anders gaan jy deur jou 'besig' kom as jy nie Sy hulp het nie?
Sorg dat jy jou besige dag, jou besige tyd, jou besige lewe altyd elke dag begin deur dit met die Een te bespreek wat reeds vir jou die antwoorde gereed het, wat reeds vir jou die mate van krag en energie gereed het, wat reeds vir jou die emmertjie genade vir die dag gereed het - dan mag ons dalk baie minder belangrike dinge vergeet.

Al vergeet jy alles in jou lewe, kan jy nie bekostig om van ons Drie-Enige God te vergeet nie.

Dankbaarheid ...

Goeiedag Vriende,

Ek hoop julle het ‘n heerlike, rustige naweek gehad. Hier by ons was dit snikkend warm, maar ons het darem gisteraand ‘n paar druppels gekry wat dit bietjie afgekoel het.

Vanoggend gesels ek graag weer oor dankbaarheid, hoe kan ons anders? Ons het gister ons tweede dankdiens gehard en gedurende hierdie dankdiens het mense getuig van ons Koning se goedheid in die jaar wat verby is.

Een van die gesinne wat getuig het, was die van ons Namibiese Rugby kaptein wat die land gelei het tydens die wêreldbeker. ‘n Jongman met ‘n pragtige vrou en twee kindertjies.

Hy het onder andere ‘n paar jaar gelede vir vyf jaar vir Frankryk rugby gespeel. Met die wêreldbeker kom Namibië toe teen Frankryk te staan. Gedurende hierdie wedstryd, duik hy die Franse kaptein, en hulle koppe stamp teen mekaar. Dit was so ‘n hard duikslag dat die Franse kaptein se skedel gekraak het. Die Namibiese Kaptein se wedstryd eindig net daar met ‘n geel kaart wat later na ‘n rooi kaart gegradeer word nadat dit bekend word wat die omvang van die besering is.

Chaos volg vir hierdie jongman en sy familie. Buiten die teleurstelling om nie die wedstryd te kon klaar speel nie, breek die hel los in Frankryk. Hy ontvang doodsdreigemente, sosiale media ontplof soos ‘n vulkaan met allerhande lelike dinge wat hom toegesnou word.

Sy vrou en kinders word na hom geneem in die hotel. Sy vrou waarsku voor die tyd hulle seuntjie van vyf om te onthou dat sy pappa dalk kan hartseer wees omdat hy ‘n rooikaart gekry het. Die mannetjie stap by die hotel kamer in en sê aan sy pappa: Pappa, ek is jammer dat jy ‘n rooi kaart gekry het, maar dit is ok, kan ons nou gaan karretjies speel asseblief.

Hy maak hierdie hele drama wat die wêreld besig is mee, as niks af nie. Hy ken sy Pappa, en weet wie hy is en dat hy die rooikaart-situasie ook sal hanteer.

Dit is dan ook die jongman se getuienis, ongeag hoe teleurgestel hy was, hy het geweet sy Vader sal hom hierdeur ook dra.

Hebreërs 12:28Daarom, omdat ons 'n onwankelbare koninkryk ontvang, laat ons dankbaar wees, en so God welbehaaglik dien met eerbied en vrees.

Die wêreld om ons is veranderlik, maar ons God is onwankelbaar en altyd dieselfde. Kyk om jou en wanneer jy glo jy het niks om voor dankbaar te wees nie, sal jy vind daar is iemand anders wat nog minder as jy het om voor dankbaar te wees.

Doen dan weer ‘n opname en jy sal vind, dat jy ‘n oorvloed van dinge het waaroor jy moet dankbaar wees. Loop jou pad met jou hand in die van Christus, en jy sal altyd bewus wees van hoeveel jy het om voor dankbaar te wees.

Jou gedagtes ...

 
Goeiedag Vriende,

Ek verneem dat die hitte daar by julle aangekom het, of dan ten minste beslis in die Kaap. Hier by my is 35 warm maar draaglik, ek weet daar by julle is dit anders met die vog. Sterkte as dit by julle ook so warm is.

Gisteraand by die Bybelstudie groep waar ek inskakel, het ons gesels en gekyk na hoe gevaarlik ons gedagtes is. Dit is eintlik waar al die onheil begin. Sonder dat jy agterkom dink jy gedagtes van kwaad, gedagtes van vergelding, gedagtes van wellus en baie meer. Jou brein vorm denkpatrone, wat soos wildpaadjies in die veld is. En jou gedagtes gaan onwillekeurig op daardie paadjies as jy hulle nie doelbewus keer nie.

Kyk wat vra God van ons in Romeine 12.

1En nou doen ek 'n beroep op julle, broers, op grond van die groot ontferming van God: Gee julleself aan God as lewende en heilige offers wat vir Hom aanneemlik is. Dit is die wesenlike van die godsdiens wat julle moet beoefen.

2Julle moenie aan hierdie sondige wêreld gelyk word nie, maar laat God julle verander deur julle denke te vernuwe. Dan sal julle ook kan onderskei wat die wil van God is, wat vir Hom goed en aanneemlik en volmaak is.

Eerstens word ons gemaan om ons as lewende en heilige offers vir ons Vader te gee.

Tweedens word ons gemaan om nie soos die wêreld te dink en te doen nie. Hoe sal ons dit regkry? Die antwoord is ook daar: ‘… laat God julle verander deur julle denke te vernuwe …’

Ons sal nie maklik daardie denkpatrone op ons eie verander nie. Dit mag denkpatrone wees van haat en vergelding teenoor iemand wat ons seer gemaak het. Dit mag denkpatrone wees van begeerte van iemand ander se goed. Dit mag denkpatrone wees van jaloesie omdat dit so goed gaan met iemand anders en sovele meer.

Hoe moet ons nou maak? Kom ons kyk na wat Paulus sê in 2 Korintiërs.

2 Korintiërs 10: 3Natuurlik leef ons in 'n menslike liggaam, maar ons voer nie die stryd met menslike wapens nie.

4Die wapens van ons stryd is nie die wapens van die mens nie, maar die kragtige wapens van God wat vestings kan vernietig. Daarmee vernietig ons die redenasies

5en elke hooghartige aanval wat teen die kennis van God gerig word. Ons neem elke gedagte gevange om dit aan Christus gehoorsaam te maak.

Nooit stry ons die stryd alleen nie. Met die hulp van die Heilige Gees kan ons dit regkry. Sodra ons hierdie verkeerde gedagte begin dink, stop ons dit. Vra ons onsself of God wat ons gedagtes sien, gelukkig sal wees met daardie gedagte. Vra ons Hom om daardie gedagte net weg te neem.

Maklik? Nee, nie maklik nie. Oor en oor totdat ons denkpatrone ontwikkel wat vir God welgevallig is.

Afrekening vir die dinge wat mense aan ons doen, behoort nie aan ons nie. Daarom kan ons elke keer as iemand ons seermaak of te na kom net na ons Vader gaan en dit net daar by Hom gaan los. Hom vra vir Sy vrede oor die aangeleentheid en nie verder ons eie lewens versuur met haat gedagtes nie.

Kom ons neem daardie negatiewe gedagtes dadelik gevange en weier om ons verder siek te maak daarmee. Dit is die dinge wat ons laat hartseer raak, laat depressief raak.

Kies vandag om jou gedagtes te leer om op paadjies van dankbaarheid, liefde, vergifnis en vreugde te stap.

Hoor jy ...?

Goeiemôre Vriende,

Uit ‘n reeds warm Windhoek, maar daar is sekerlik verligting in die windjie wat roer aan die blare.

Hoe gaan dit vanoggend met jou? Ja, ek wil werklik weet.

Wag jy op ‘n antwoord van God af op iets? Wat is jou verwagting? Hoe dink jy gaan Hy jou antwoord?

Vanoggend deel ek graag met julle een van my mees gunsteling verse in die Woord van God, 1 Konings 19:12-13

Hier is Elia besig om te vlug vir sy lewe omdat Hy God se opdragte uitgevoer het. Ons sien hoe God hom beskerm, hom voed dat hy die reis kan aanpak en hom neem na daar waar Hy met hom wil praat.

1 Konings 19: 11Maar die Here sê vir hom: “Kom uit, en gaan staan op die berg voor My, die Here, Ek wil verbygaan.”
Skielik was daar 'n baie sterk wind wat die berg stukkend geruk en die rotse gebreek het voor die Here. Maar in die wind was die Here nie. Na die wind was daar 'n aardbewing. Maar in die aardbewing was die Here nie. 

12Na die aardbewing was daar 'n vuur. Maar in die vuur was die Here nie. En na die vuur was daar 'n fluistering in die windstilte.
13Toe Elia dit hoor, het hy sy gesig met sy mantel toegemaak en by die bek van die grot gaan staan. Toe hoor hy 'n stem wat vir hom sê: “Wat maak jy hier, Elia?”

Ons as mense glo omdat God so Almagtig is Hy met ‘n bulderende stem sal praat, want dit is mos wat ons doen as ons gehoor wil word.

So dikwels verhef jy jou stem teenoor jou vrou/man, jou kinders, jou vriende en dan volg die vraag agterna: Het jy my gehoor! Ons wil seker maak ons word gehoor.

Hier in Konings kom leer God ons weer iets, ons hoef nie te bulder of op mense te skree vir hulle om ons te hoor nie. Hy wat ons God is doen dit nie eers met ons nie, en Hy het alle reg om dit te doen.

Dit is vir my so ontsettend pragtig:

Skielik was daar 'n baie sterk wind wat die berg stukkend geruk en die rotse gebreek het voor die Here. Maar in die wind was die Here nie. Na die wind was daar 'n aardbewing. Maar in die aardbewing was die Here nie. 12Na die aardbewing was daar 'n vuur. Maar in die vuur was die Here nie. En na die vuur was daar 'n fluistering in die windstilte.

13Toe Elia dit hoor, het hy sy gesig met sy mantel toegemaak …

Die Skepper God fluister vir ons in die windstilte!

So sag, so teer, so pragtig.

Dit beteken ons moet mooi luister, altyd verwag om Sy stem te hoor, want anders gaan ons die mis deur die geraas van die wêreld.

Tog het Elia dadelik geweet en gehoor, want hy was ingestel, het geglo dat sy God hom nooit in die steek sal laat nie, het gewag vir daardie antwoord.

Eerstens moet ons miskien gaan kyk na die manier waarop ons met mense en veral ons eie mense omgaan. Skree ons die hele tyd om gehoor te word en al die tyd lê die antwoord in ons fluistering?

Tweedens, miskien moet ons van vandag af anders luister en dan sal ons God se stem hoor. Sal ons die antwoord hoor waarvoor ons wag. Ons wag dalk vir ‘n wind wat rotse breek, ‘n aardbewing of vuur, maar dit is nie hoe ons geliefde, liefdevolle, genadige en almagtige Vader met sy kinders handel en praat nie.

Kom ons volg ons Vader se voorbeeld as ons praat. Kom ons luister na die fluistering van die windstilte – dit is waar ons antwoorde lê.

Wysheid en geloof

 

Dagsê Vriende,

Dit is weereens vir my ‘n voorreg om die boodskap wat ons Vader op my hart lê te bring. 

Ons het gister oor wysheid gesels, en ek wil daarmee voortgaan.

Gister het Salomo ons vermaan om wys op te tree. Vandag kyk ons na waar kan ons hierdie wysheid bekom as ons voel ons het dit nie.

Jakobus vertel ons eers dat ons dankbaar moet wees as ons beproewinge op ons pad het. En ons het beslis almal. Hy troos ons dat dit is ons sterker maak in ons geloof.

Dan vertel hy ons hoe maklik dit is om wysheid te bekom, vra vir God en Hy sal dit vir jou gee.

Jakobus 1

Geloof en wysheid

2My broers, julle moet baie bly wees wanneer allerlei beproewings oor julle kom, 

3want, soos julle weet, as julle geloof die toets deurstaan het, stel dit julle in staat om te volhard.

4En die volharding moet end-uit volgehou word sodat julle tot volle geestelike rypheid kan kom, sonder enige tekortkoming. 

5As een van julle wysheid kortkom, moet hy dit van God bid, en Hy sal dit aan hom gee, want God gee aan almal sonder voorbehoud en sonder verwyt. 

6Maar 'n mens moet gelowig bid en nie twyfel nie, want iemand wat twyfel, is soos 'n brander in die see wat deur die wind aangejaag en heen en weer gedryf word. 

7-8So 'n mens wat altyd aan die twyfel is en onbestendig is in al sy doen en late, moet nie dink dat hy iets van die Here sal ontvang nie.

Hou dit daarby op? Nee, dit doen nie, want soos in alles verwag ons Vader dat ons ons deel sal doen om te wys dat ons ernstig is oor Hom.

Jakobus maan ons teen die een ding wat ons almal ken, almal al gedoen het. Terwyl ons so bid, besluit ons in ons klein breintjies reeds, dit is onmoontlik. Ons gee nie vir God kans om sy Almag aan ons te bewys nie. Ons twyfel, ons glo nie.

Hy vermaan ons om nie te twyfel nie. Verder gaan hy aan en waarsku ons dat as ons so onbestendig is, ons niks van God moet verwag nie.

Hoekom voel dit dan vir my asof ons in ons eie pad staan om ons Vader se guns en seëning te ontvang? Of hoe voel julle daaroor?

Mag ons elke dag ryker word in wysheid omdat ons dit van ons Vader vra en nie vir een oomblik twyfel dat Hy dit aan ons sal gee nie.