Ons identiteit in Christus

Dagsê Vriende,

Ons het gister namiddag ‘n bui of twee reën gehad, genoeg om my tuin nat te maak. Ons is dankbaar. Ek hoor net van die versengende hitte van die Boland en hoop dat dit beter gaan in Namakwaland. Hier by ons is alles in rep en roer, want ons President wat al die 5de oorlede is, word eers Saterdag en Sondag begrawe. Nie net kom daar Staatshoofde van regoor die wêreld nie, hulle bring nog hul eie sekureiteit mense ook saam. Dan sal die hele Namibië sekerlik optrek Windhoek toe.

Vanoggend hoor ek pastoor Rynier Nolan praat oor ons identiteit in Christus en besluit toe om bietjie daaroor meer navorsing te gaan doen. Die gedeelte wat hy gelees het was uit 1 Petrus 4 – dit handel oor wat jy nie meer moet doen nie. Ek wil egter met julle baie waardevolle inligting deel wat deur Risa Cronje baie moeite mee gedoen het met julle deel. Gaan staan gerus die verse na en skryf dit op die tafels van jou hart.

JOU IDENTITEIT IN CHRISTUS.
Jy is….

‘n Kind van God (Johannes 1:12).
Voor God geregverdig (2 Korinthiërs 5:21).
Die tempel van die Heilige Gees (1 Korinthiërs 6:19).
Deur God gesalf (1 Johannes 2:27).
‘n Erfgenaam van God (Romeine 8:17).
Geseën met elke geestelike seëning in die hemel (Efesiërs 1:3).
Een gees met die Here (1 Korinthiërs 6:17).
Vry van veroordeling (Romeine 8:1).
Uit God gebore en die Bose kan niks aan jou doen nie (1 Johannes 5:18).
God se maaksel, in Christus geskep vir goeie werke (Efesiërs 2:10).
Sit saam met Jesus in die hemel (Efesiërs 2:6).
Geseën met alles wat nodig is vir ‘n godvresende lewe (2 Petrus 1:3).
Dood vir die sonde, maar lewend vir God (Romeine 6:11).

WAT JOUNE IS AS KIND VAN GOD.

Jy besit….

Die Heilige Gees (Johannes 14:16-17).
Die denkwyse van Christus (1 Korinthiërs 2:16).
Deur salwing van die Heilige Gees en jy ken die waarheid (1 Johannes 2:20).
Guns by God en mense (Lukas 2:52).
‘n Gees van krag, liefde en selfbeheersing (2 Timotheus 1:7).
Deel aan die heiliges se erfdeel in die lig (Kolossense 1:12).
Toegang tot die troon van genade (Hebreërs 4:16).
Verbondenheid aan die Vader, die Seun, en ander gelowiges (1 Johannes 1:3).
Bevryding en vergifnis van sonde (Kolossense 1:13-14).
Vrede by God (Romeine 5:1).
Genesing (1 Petrus 2:24).
Kosbare en grootse beloftes, sodat jy deel kan kry aan die goddelike natuur (2 Petrus 1:4).

WAT GOD JOU IN STAAT STEL OM TE DOEN.
Jy kan….

Enige iets hanteer, omdat Jesus jou die krag gee (Filippense 4:13).
Siekes genees, dooies opwek en demone uitdryf (Mattheus 10:8).
Met vrymoedigheid die troon van genade nader (Hebreërs 4:16).
Ontferming en genade ontvang om op die regte tyd gehelp te word (Hebreërs 4:16).
Dieselfde werke doen as wat Jesus gedoen het, en nog groter dinge, omdat Hy by die Vader is (Johannes 14:12).
Hierdie is maar net ‘n paar dinge wat die Bybel noem oor jou identiteit in Christus, en al die wonderlike dinge wat joune is omdat jy aan Hom behoort.
Ek glo dat dit vir jou ‘n kykie gegee het op die wonderlike werk wat God in jou lewe gedoen het, toe jy weer gebore is.
Ek stel voor dat jy ‘n mini-Bybelstudie doen oor elkeen van die verse, sodat dit in jou hart kan insink.
Onthou, jy is wie God sê jy is.
Jy besit alles wat Hy sê aan jou behoort.
En jy kan doen wat Hy jou in staat stel om te doen.
Glo dit en leef van nou af in jou identiteit in Christus!
(c) Risa Cronje
Môre sal ons DV kyk na die dinge wat ons as Christene nie meer in ons lewens moet en mag toelaat nie. Hierdie is ‘n hele mond vol en kan jou vir ‘n maand besig hou. Neem dit vers vir vers en werk dit deur en weet wie jy in Christus is. Dan sal jy nie meer hoef iemand anders as rolmodel te gebruik nie, want Jesus is ons enigste Rolmodel.


Soos die blomme in hierdie tuin, so is ons elkeen uniek en het ons elkeen ons plek in God se tuin op aarde.