Dagsê Vriende,
Hier is die dag nog nie warm nie, maar ek sien die son is besig om die wolkies weg te jaag. Daar in ons Namakwaland sien ek is dit darem draaglik. Selfs die Boland se mense sal vandag weer kan asemhaal. Ek dink baie aan die boere wat nou besig is om te oes, daar op die lande in hierdie hitte.
Tog is dit ook ‘n tyd van seën. My skoonsuster se pa het altyd gesê: As die oes reg is moet ons skep. Dit is ware woorde, maar tog moet ons ook versigtig wees om nie alles alleen te probeer doen en ons self so uit te brand nie. Ons Vader het ‘n manier op ons dan te stop en ons hou gewoonlik niks van daardie stop nie.
Selfs so vroeg soos Eksodus in die Bybel, maan Jetru, Moses se skoonpa hom dat hy nie alles op homself kan neem nie. Dat hy homself die mense om hom so benadeel.
Eksodus 18: 17Maar Moses se skoonvader sê vir hom: Die ding wat jy doen, is nie goed nie.
18Jy sal heeltemal uitgeput raak, jy sowel as hierdie volk wat by jou is. Want die saak is te swaar vir jou; jy kan dit nie alleen doen nie.
Gelukkig was Moses wys genoeg om te luister en dit het ook sy Vader se goedkeuring weg gedra, want alles het goed uitgewerk.
So dikwels hoor en sien ons ‘n familielid of vriend/in wat hulself heeltemal afsloof vir hulle beroep. Hulle kom saans laat huis toe en is soggens dou voor dag op en al weer op pad werk toe. Oor naweke word hulle geskakel om probleme op te los. Hulle het nooit tyd vir hulle families nie, nie eers vir hulle self nie.
Dit laat hulle miskien baie belangrik voel, of hulle is net so lojaal en pligsgetrou dat hulle nie kan of wil ‘nee’ sê nie. Ek was daar toe ek nog gewerk het en ek weet al lankal dat dit mens niks, maar niks in die sak bring behalwe dat jy jouself uitput nie. Onlangs het ek vir ‘n vriendin se man wat so gewerk het, naweke, laat, maak nie saak wanneer nie hy was by die werk en sy vrou moes haarself besig hou. As hy wel by die huis was, was hy so moeg hy wou net slaap.
Ek het hom eendag gevra hoekom hy dit doen en daar is gewoonlik baie redes. Niemand anders kan dit doen nie. As ek dit nie doen nie, sal niemand daaraan dink nie en so kan ek aangaan. Ek het hom ook gevra of hy dink hulle waardeer dit en hom reguit vertel dat wanneer hulle hom nie meer nodig het nie, hulle hom net so sal wegstuur. Ongeag hoe hard hy gewerk het, of hoeveel ure hy oortyd gewerk het waarvoor hy niks betaal is.
Dit alles het ek nie gedoen om hom te ontmoedig nie, maar om sy oë te probeer oopmaak dat die wêreld jou sal gebruik en ons nie altyd alles vir almal kan wees nie. Dit is nie in ons Vader se plan nie.
Ongelukkig het dit net so gebeur ... die firma het skielik kontantvloeiprobleme en wie is eerste om te moet gaan? Die een wat alles gegee het.
Daar moet altyd ‘n balans wees, en God se woord vertel ons baie duidelik, ons moet ons eerste vir Sy koninkryk beywer en die ander dinge sal volg. Ons mag maar vir God vra om ons te help dat daar nie in ‘n dag meer van ons verwag sal word as wat ons kan hanteer nie. Dan moet ons ook luister na Sy stem en mense kry om ons te help as ons voel die werkslading raak te veel. Nie probeer om alles alleen te doen om iemand te beïndruk nie.
Ons Vader verwag nie van jou om twee dae se werk in een dag in te pas nie! Elke dag vir ditself, dit is wat Hy ons leer. Bekommer jou nie oor môre nie, want die sal vir ditself sorg. Doen wat jou hand vind om te doen vandag.
Dit is ons verantwoordelikheid om na ons liggame en gesondheid om te sien. Gesondheid is ‘n gawe van ons Vader. Moet dit dus nie misbruik deur jouself te bly ooreis nie.
Onthou asseblief, ons moet niks, nie eers asemhaal nie, want dit doen ons Vader ook vir ons. Hy is ons Versorger en Voorsiener.
Geen opmerkings nie:
Plaas 'n opmerking