Goeiemôre Vriende,
Weer lekker by ons gereën en ek hoef nie my tuin nat te maak nie, want ons Vader was getrou en het dit reeds vannag vir my gedoen.
Môre is dit Valentynsdag, maar ons kyk vandag na die liefde tussen man en vrou soos God dit bedoel het.
Daar is duidelike voorskrifte uit die woord hoe liefde tussen man en vrou moet lyk en ook hoekom God die vrou geskape het. Reeds so vroeg soos Genesis 2 in die Bybel met die grondlegging van die wêreld, het God gesien dat die mens alleen was.
Daar het God al dit duidelik gemaak dat die man en vrou een sal word en as ‘n eenheid sal staan, want daar word duidelik genoem dat die man sy ouers sal verlaat.
Genesis 2:22-24 En die Here God bou die rib wat Hy van die mens geneem het, tot 'n vrou en bring haar na die mens. Toe sê die mens: Dit is nou eindelik been van my gebeente en vlees van my vlees. Sy sal mannin genoem word, want sy is uit die man geneem. Daarom sal die man sy vader en moeder verlaat en sy vrou aankleef. En hulle sal een vlees wees.
Wat beteken dit? Dit beteken dat hy nie getroude man sy ouers se kant of sy vriende se kant of wie ook al se kant sal neem en teen sy vrou staan nie. Nee, dit is nie God se wil nie. God se wil is dat hulle in eenheid sal leef.
Mag man en vrou dan nooit verskil nie? Dit is onmoontlik, omdat God hulle individue geskape het. Wat dit wel beteken is dat hulle in liefde en onderlyding van die Heilige Gees hulle verskille sal uitsorteer en God sal vra om hulle te help daarmee.
Nie met ‘n geskel, geskree en slegsêery mekaar sal afkraak nie. Nie voor mense mekaar sal verneder omdat hulle nie met mekaar saamstem nie. Nie hulle huweliksprobleme met hul vriende of familie sal bespreek nie.
Hoor ek jou sê, maar jy weet nie hoe my man of vrou optree nie. Wel God weet en jy kan maar met Hom daaroor praat, hy het die oplossing en sal dit nie aan die hele wêreld verkondig nie.
Vandag is niks meer heilig nie, die mens het alles opgemors, so ook die huwelik. Dit is byna ‘n sonde as ‘n man sy vrou liefhet, dit wys en sê. Sy vriende kyk hom skeef aan, want eintlik moet hy mos saam met hulle stem dat vroue net daar is om die huis skoon te hou, kinders in die wêreld te bring en hulle te versorg en reg te wees om die man plesier te verskaf wanneer hy so voel.
Nee, dit is nie wat God se woord vir ons leer nie. Daardie siening is so reg van die satan wat net huwelike wil verwoes met sy leuens. Daardie storie van ‘maar ek het ook tyd met my vriende nodig’ – ek sien dit nêrens in die Woord van God nie en dames, dit geld ook vir ons.
Hier onder bevestig Matteus weer wat al in Genesis gesê is: die man en die vrou se lojaliteit is albei eerste in Christus en dan in mekaar.
Matteus 19:4-6
En Hy antwoord hulle en sê: Het julle nie gelees dat Hy wat hulle gemaak het, hulle van die begin af man en vrou gemaak het nie, en gesê het: Om hierdie rede sal die man sy vader en sy moeder verlaat en sy vrou aankleef, en hulle twee sal een vlees wees; sodat hulle nie meer twee is nie, maar een vlees? Wat God dan saamgevoeg het, mag geen mens skei nie.
Dan kom ons by die begrip van die vrou wat onderdanig moet wees. Ongelukkig is hierdie heilige stuk waarheid al so afgewater en het dit in ‘n grap ontaard. Ongelukkig lees en word net die eerste verse aangehaal en nie die hele stuk soos wat God dit gewil het nie.
Almal hak dus vas by die vrou moet onderdanig wees ongeag! Nee, dit is nie wat God se woord sê nie. Lees dit asseblief – miskien vir die heel eerste keer in jou lewe heel deur.
Efesiërs 5 Man en vrou
21Wees uit eerbied vir Christus aan mekaar onderdanig.
22Vrouens, wees aan julle mans onderdanig, net soos julle aan die Here onderdanig is. 23Die man is die hoof van die vrou, soos Christus die hoof van die kerk is. Christus is ook die Verlosser van die liggaam, sy kerk. 24Soos die kerk aan Christus onderdanig is, moet die vrouens in alles aan hulle mans onderdanig wees.
25Mans, julle moet julle vrouens liefhê soos Christus die kerk liefgehad en sy lewe daarvoor afgelê het. 26Dit het Hy gedoen om die kerk aan God te wy, nadat Hy dit met die water en die woord gereinig het, 27sodat Hy die kerk in volle heerlikheid by Hom kan neem, sonder vlek of rimpel of iets dergeliks, heilig en onberispelik. 28Die mans behoort hulle vrouens so lief te hê soos hulle eie liggame. Wie sy vrou liefhet, het homself lief, 29want niemand het nog ooit sy eie liggaam gehaat nie. Inteendeel, hy voed en versorg dit, soos Christus met sy kerk doen 30omdat dit sy liggaam is, waarvan ons lede is.
31Daar staan in die Skrif: “Daarom sal 'n man sy vader en moeder verlaat en saam met sy vrou lewe, en hulle twee sal een wees.” 32Hierin lê daar 'n diep geheimenis opgesluit, en ek pas dit toe op Christus en die kerk. 33Maar dit is ook op julle van toepassing. Elkeen moet sy vrou so lief hê soos hy homself liefhet, en 'n vrou moet aan haar man eerbied betoon.
Ja, die opdrag van God is dat die vrou onderdanig moet wees aan haar man. Kom ons kyk asseblief verder. Ek moet net hierdie verse mooi uithaal dat daar geen verwarring kan wees nie.
Efesiërs 5: 22Vrouens, wees aan julle mans onderdanig, net soos julle aan die Here onderdanig is. 23Die man is die hoof van die vrou, soos Christus die hoof van die kerk is. Christus is ook die Verlosser van die liggaam, sy kerk. 24Soos die kerk aan Christus onderdanig is, moet die vrouens in alles aan hulle mans onderdanig wees.
25Mans, julle moet julle vrouens liefhê soos Christus die kerk liefgehad en sy lewe daarvoor afgelê het.
In hierdie gedeelte is die opdrag nie alleen dat die vrou aan haar man onderdanig moet wees nie, maar dat die man die vrou moet liefhê en nie net sommer so nie, maar wel ‘soos Christus die kerk liefhet waarvoor Hy sy lewe afgelê het’.
Hierdie klink nie vir my na ‘n liefde wat sal seer maak, na ‘n liefde wat sal afkraak, na ‘n liefde wat sal sake berokken nie. Hierdie klink vir my na ‘n liefde wat niks sal kan breek nie.
As ‘n man God liefhet, en daarna sy vrou soos wat Christus hom beveel het, sal daardie vrou onderdanig wees en sy sal dit nie eers sien as ‘n las nie. Sy sal haar man wil dien, en respekteer omdat hy ‘n man is wat in Christus se liefde wandel en handel met haar en haar kinders.
Vroue maak ook fout, hanteer ook hulle mans verkeerd, die verse hier is net soveel van toepassing op ons. Voor jy jou vriendinne van jou man se foute en probleme vertel, praat met God.
Voor jy jouself wend na ‘n ander man op wie se skouer jy wil gaan huil en voor jy weet het dit ontaard in ‘n buite egtelike verhouding wat jy goed praat omdat jy glo dit is jou reg want jou man mishandel jou – praat met God daaroor.
Wat sê die woord van ontrouheid:
Hebreërs 13:4
Laat die huwelik in alle opsigte eerbaar wees en die bed onbesmet; want God sal hoereerders en egbrekers oordeel.
Ontrouheid in die huwelik is ‘n baie, baie ernstige saak. Dit is sekerlik ook die rede hoekom dit opgeteken is in Matteus en nog ander plekke dat egbreuk die enigste rede is waaroor ons mag skei.
Matteus 19:8Hy antwoord hulle: “Dit is oor die hardheid van julle harte dat Moses julle toegelaat het om van julle vrouens te skei, maar dit was nie van die begin af so nie. 9Ek sê vir julle: Elkeen wat van sy vrou skei, behalwe oor owerspel, en met 'n ander een trou, pleeg egbreuk.”
Dan kom daar die ding van begeerte in. Op sosiale media en in die werklike lewe is daar vroue wat uitlokkend aantrek, of mans opsetlik probeer verlei. Kyk wat is God se siening daaroor.
Matteus 5:27 “Julle het gehoor dat daar gesê is: ‘Jy mag nie egbreuk pleeg nie.’a 28 Maar ek sê vir julle dat elkeen wat aanhou om na ’n vrou te kyk en ’n begeerte na haar ontwikkel, reeds in sy hart met haar egbreuk gepleeg het.
Hierdie roep die man en die vrou tot verantwoording. Vroue moet hulle liggame bedek en nie opsetlik mans uitlok nie. Mans as jy getroud is, is daar net een vrou wie jy mag begeer en dit is die een waarmee jy reeds een is.
Ter afsluiting kom ons by die bekende Korintiërs 13 se uiteensetting van die liefde wat nog steeds die norm is van God se liefde vir ons en ons s’n vir ons lewens maat behoort te wees.
1 Korintiërs 13:4-5
Die liefde is lankmoedig en vriendelik; die liefde is nie jaloers nie; die liefde praat nie groot nie, is nie opgeblase nie, handel nie onwelvoeglik nie, soek nie sy eie belang nie, word nie verbitterd nie, reken die kwaad nie toe nie.
Daar is tog niks so wonderlik as om liefgehê te word nie, veral nie as daardie liefde in dieselfde maat beantwoord word nie. As man en vrou saam staan teen die wêreld en saam met God loop, is dit ‘n band wat onbreekbaar is. Die wete dat God tevrede is met jou en dat die persoon aan jou sy geanker staan in God en jou altyd sal ondersteun, wat ‘n wonderlike wete is dit nie?
Wees lief vir mekaar, soos God ons eerste liefgehad het – met ‘n liefde wat bereid was om te sterf vir ons.
