Liefde in aksie

Goeiedag Vriende,

‘n Pragtige dag hier in Windhoek, en beloftes van genade water later. Dankbaarheid in my hart vir dit wat Jesus miljoene jare gelede vir my gedoen het, maak my opgewonde vir elke dag.

Hierdie dag kan ons nie herdenk as ons nie Johannes 3 in gedagte hou nie.

Johannes 3:16“God het die wêreld so liefgehad dat Hy sy enigste Seun gegee het, sodat dié wat in Hom glo, nie verlore sal gaan nie maar die ewige lewe sal hê. 17God het nie sy Seun na die wêreld toe gestuur om die wêreld te veroordeel nie, maar sodat die wêreld deur Hom gered kan word. 18Wie in Hom glo, word nie veroordeel nie; wie nie glo nie, is reeds veroordeel omdat hy nie in die enigste Seun van God glo nie. 19En so kom die skeiding: die lig het na die wêreld toe gekom, en tog het die mense eerder die duisternis as die lig liefgehad, want hulle dade was sleg. 20Elkeen wat kwaad doen, haat immers die lig en kom nie na die lig toe nie, sodat sy dade nie aan die kaak gestel moet word nie. 21Maar wie volgens die waarheid handel, kom na die lig toe, sodat dit duidelik kan blyk dat sy dade in gehoorsaamheid aan God gedoen is.”

Verder wil ek graag Risa Cronje se in diepte bybelstudie met julle op hierdie Paasfees deel.

GOD WYS SY LIEFDE IN JESUS.

Johannes 3:16: “Want so lief het God die wêreld gehad dat Hy sy unieke Seun gegee het, sodat elkeen wat in Hom glo, nie verlore sal gaan nie, maar die ewige lewe sal hê.”

DINK NA: In dié vers lees ons wat God gedoen het omdat Hy die wêreld liefgehad het. Wat beteken hierdie wonderlike daad vir jou?

JESUS BRING VERLOSSING.

Handelinge 4:12: “Daar is ook deur niemand anders verlossing nie, en daar is geen ander naam onder die hemel aan mense gegee waardeur ons verlos kan word nie.”

DINK NA: Dié vers sê dat Jesus alleen vir ons verlossing bring. Hoekom kan niemand anders, nie eers onsself, dit doen nie?

JESUS BRING VERGIFNIS VAN SONDE.

Efesiërs 1:7-8: “In Hom het ons die bevryding deur sy bloed, die vergewing van ons oortredings uit die rykdom van sy genade, wat Hy oorvloedig aan ons geskenk het, saam met alle wysheid en insig.”

DINK NA: Lees Jesaja 53:1-12, Handelinge 13:38-39 en 2 Korinthiërs 5:21. Wat leer jy uit hierdie gedeeltes oor die vergifnis van sonde?

JESUS HET JOU LOSGEKOOP EN GEREINIG.

Titus 2:14: “Hy wat Homself ter wille van ons gegee het, om ons los te koop van alle wetteloosheid, en vir Hom ‘n eie volk as eiendom te reinig, wat ywerig is om goed te doen.”

DINK NA: Ons is losgekoop en gereinig, en God wil hê dat ons ywerig moet wees om goed te doen. Lees Efesiërs 2:10. Wat leer jy uit hierdie vers oor goeie werke?

JESUS VERSOEN JOU MET GOD.

2 Korinthiërs 5:19: “Dit [die bediening van versoening] bestaan daarin dat God in Christus die wêreld met Homself versoen het deur hulle nie hulle oortredings toe te reken nie; en Hy het aan ons die boodskap van versoening toevertrou.”

DINK NA: Wat beteken versoening met God vir jou?

JESUS BRING VREDE MET GOD.

Romeine 5:1-2: “Omdat ons dan nou op grond van geloof geregverdig is, het ons vrede by God deur ons Here Jesus Christus. Deur Hom het ons in geloof ook toegang verkry tot hierdie genade waarin ons vasstaan, en ons beroem ons op die hoop om deel te kan hê aan die heerlikheid van God.”

DINK NA: Deur Jesus het jy nou vrede met God. Jy kan dus altyd met vrymoedigheid na Hom toe kom. Doen jy dit, of dink jy dat Hy nog kwaad is vir jou?

JESUS GEE LEWE.

1 Johannes 5:11-12: “En dit is die getuienis: dat God die ewige lewe vir ons gegee het, en dié lewe is in sy Seun. Wie die Seun het, het die lewe; wie die Seun van God nie het nie, het nie die lewe nie.”

DINK NA: Omdat jy in Jesus glo, het jy die lewe. Wat beteken hierdie waarheid vandag vir jou?

JESUS HET DIE DUIWEL SE DADE VERNIETIG.

1 Johannes 3:7-8: “Kinders, laat niemand julle mislei nie: wie doen wat reg is, is regverdig, soos Hy regverdig is. Wie sonde doen, is uit die Duiwel, omdat die Duiwel van die begin af sondig. Hiervoor het die Seun van God verskyn: om die dade van die Duiwel te vernietig.”

DINK NA: Wat, dink jy, beteken dit dat Jesus gekom het om die duiwel se dade te vernietig?

JESUS VERVUL DIE WET EN PROFETE.

Mattheus 5:17-18: “Moenie eers daaraan dink dat Ek gekom het om die Wet of die Profete af te skaf nie. Ek het nie gekom om af te skaf nie, maar om te vervul. Amen, Ek sê vir julle: Totdat die hemel en die aarde tot niet gaan, sal daar beslis geen jota of tittel van die Wet tot niet gaan nie, totdat alles vervul is.”

DINK NA: Wat beteken dit dat Jesus gekom het om die Wet en die Profete te vervul?

JESUS VERBIND GEBROKE HARTE.

Jesaja 61:1: “Die Gees van my Heer, die Here is op my, omdat die Here my gesalf het. Hy het my gestuur om ‘n goeie boodskap te bring aan magteloses, om dié met gebroke harte se wonde te verbind, om dié wat weggevoer is se vrylating aan te kondig en bevryding vir dié wat geboei is…”

DINK NA: Jesus weet wanneer jy om een of ander rede ‘n gebroke hart het en Hy wil jou weer heelmaak. Dink vandag bietjie na oor hierdie waarheid. Wat beteken dit vir jou?

JESUS STIL JOU GEESTELIKE DORS.

Johannes 4:13-14: “Jesus het haar geantwoord: ‘Elkeen wat van hierdie water drink, sal weer dors kry, maar wie van die water drink wat Ek hom gee, sal tot in ewigheid nooit dors kry nie. Die water wat Ek hom gee, sal in hom ‘n fontein van water word wat opborrel tot die ewige lewe.”

DINK NA: Lees Johannes 4:7-17. In dié gedeelte noem Jesus ‘n hele paar dinge oor die water wat Hy vir ons gee. Maak ‘n lys in jou joernaal van die dinge wat Hy opnoem, wat die water doen en is.

JESUS BRING GENESING.

Jesaja 53:3-5: “Hy is verag, deur mense verlaat, ‘n mens van smarte, bekend met siekte, soos iemand vir wie ‘n mens jou gesig verberg. Hy is verag, en ons het hom nie geag nie. Nogtans, ons siektes, hy het dit gedra, en ons smarte, hy het dit op hom gelaai. Maar ons het hom beskou as iemand wat gekasty word, geslaan deur God, en verneder. Hy is egter deurboor oor ons oortredings, verbrysel oor ons sondeskuld. Die straf wat ons vrede bewerk, was op hom, en deur sy wonde is daar vir ons genesing.”

DINK NA: Wat leer jy uit dié gedeelte oor Jesus en siekte? Lees ook Mattheus 8:1-3. Wat leer hierdie gedeelte jou oor Jesus?

JESUS BRING OORWINNING.

1 Korinthiërs 15:56-57: “Die angel van die dood is die sonde, en die krag van die sonde lê in die wet. Maar aan God die dank, wat aan ons die oorwinning gee deur ons Here Jesus Christus.”

DINK NA: Dink aan ‘n paar dinge waaroor Jesus vir ons oorwinning gegee het. Skryf dit sommer in jou joernaal neer.

JESUS HELP JOU VRUG DRA.

Johannes 15:5: “Ek is die druiwestok, julle die lote. Wie in My bly en Ek in hom, hy dra baie vrug, want sonder My kan julle niks doen nie.”

DINK NA: Jesus sê as ons in Hom bly, sal ons baie vrug dra. Wat beteken dit om vrug te dra?

JESUS HET VIR JOU PLEK GAAN VOORBEREI.

Johannes 14:2-3: “In die huis van my Vader is daar baie woonplek. As dit nie so was nie, sou Ek dit vir julle gesê het. Ek gaan om vir julle plek voor te berei. En as Ek gegaan en vir julle plek voorberei het, kom Ek weer en sal julle na My toe neem, sodat julle ook kan wees waar Ek is.”

DINK NA: Gee jou verbeelding so ‘n bietjie vrye teuels. Hoe dink jy gaan dit wees om eendag saam met God die Vader en Jesus in die hemel te wees?

My gebed is dat hierdie Paasseisoen vir jou tot groot seën gaan wees en dat jy Jesus sommer nóg liewer gaan kry en dat jy wat Hy vir jou aan die kruis gedoen het, nog meer gaan waardeer.

 

 

Liefdesoffer

Goeiedag Vriende,

In Windhoek is dit koel, maar die sonskyn tog na die reën wat ons gister gehad het. Ek sien Mariental is daar dele wat oorstroom is. Hierdie weet het ons begin met damme wat baie laag was, en kyk net hoe het ons Vader voorsien.

Hier op die Donderdag voor Paasfees, het ek ‘n vraag aan jou. Hoe gaan jy jou Paasnaweek deurbring?

Is jy reeds met vakansie iewers terwyl dit skoolvakansie is vir jou kinders?

Gaan jy die naweek saam met vriende kamp en jouself geniet?

Gaan jy tuis bly, in die tuin werk, of dinge in en om jou huis herstel?

As jy in Windhoek of Namibië bly, gaan jy Swakopmund toe vir ‘n lui lekker naweek?

Wat ook al jou antwoord is op bogenoemde vrae, is my volgende vraag die belangrikste – onthou jy wat ons hierdie naweek herdenk. 

Weet jy dat hierdie naweek die mees belangrike naweke in mense heugenis is?

Weet jy wat Jesus Christus duisende jare gelede vir jou en my op hierdie naweek gedoen en opgeoffer het?

Of is dit vir jou net nog ‘n naweek waarop jy nie hoef te werk nie en dit saam met jou vriende kan geniet?

Daar is niks fout daarmee om te gaan rus, weg te breek nie, die belangrike ding is dat ons heel eerste vir Jesus sal saam neem. Maak nie saak waarheen jy gaan en wat jy gaan doen nie, Hy moet altyd die ere plek en eerste plek opneem.

Vir my is dit moeilik om te dink en my verstand daarom te draai, hoeveel lyding en pyn en smart Christus vir my moes deurmaak. Dat Hy nog steeds elke dag vir my instaan by ons Vader, omdat Hy my so lief het, omdat Hy weier dat my siel verlore moet gaan.

Hoe kry ons dit dan reg om so maklik te vergeet van Paasfees en Jesus se offer? Kan ons so ondankbaar en so onverskillig wees?

Vriende Jesus is altyd daar en wagtende vir ons om Hom te erken, om dit wat Hy vir ons gedoen het te eer en dankbaar te wees daaroor, om dit te deurleef so goed ons kan saam met Hom dat die wonder van die lewe wat Hy vir ons gekoop het met sy bloed, deel van ons lewens kan word.

Waar jy ook al gaan, en wat jy ook al dien hierdie Paasnaweek, word op Goeie Vrydag net vir ‘n halfuur stil en dink aan hoe Jesus op pad is na die kruis, hoe Hy wat self God is bloed gesweet het en gepleit het as dit moontlik is dat die beker by Hom moet verby gaan, maar steeds gevra het vir ons Vader se wil. In gehoorsaamheid daarin berus het en die kruisweg gewandel het, ALLEEN. Dink aan hoe hy gegesel is, bespot is, verneder is, vir ons. Dink aan hoe Hy daar aan die kruis dood gebloei het en steeds vir die moordenaar vergifnis gehad het, soos Hy keer op keer vir ons het. En selfs daar vir Vader God gevra het om ons te vergewe ... omdat ons nie weet waarmee ons besig is nie!

Hoe hard moet ons harte wees as hierdie ons nie raak nie, as hierdie ons nie van binne uitmekaar wil skeur nie? Laat jou trane van dankbaarheid vloei as jy hieraan dink.

Dan op Paas Maandag, vier die oorwinning wat Jesus Christus se bloed vir jou gekoop het, die ewige lewe saam met Hom. Prys Hom, loof en eer Hom. Laat jou dankbaarheid en lofliedere na Hom opgaan soos ‘n soete geur.

Laat hierdie Paasfees nie net nog ‘n naweek vir jou wees nie, maar laat dit jou aanraak en jou lewe verander om in dankbaarheid te leef vir die liefdesoffer wat Jesus vir ons gebring het.

 

Jesus se Naam

Dagsê Vriende, 

Steeds lekker koel by ons, maar die son het sy gesig gewys. Hier in die middel van wat vir baie ‘n langnaweek is, wil ek kom gesels oor die Naam bo alle Name, die Naam van Jesus en wat dit vir ons beteken.

Eerste wil ek julle herinner aan hoe ons Sy kinders geword het of kan word as jy nog nie is nie.
As jy met jou mond die Here Jesus bely en met jou hart glo dat God Hom uit die dode opgewek het, sal jy gered word.
Romeine 10:9

Johannes 1:12 “Maar almal wat Hom aangeneem het, aan hulle het Hy mag gegee om kinders van God te word, aan hulle wat in sy Naam glo;” As u vir Jesus aangeneem het as u persoonlike salig maker, dan is u ‘n kind van God. God is die Koning van alles, dus is u ‘n kind van ‘n Koning! Het u geweet dat u deur daardie mag ‘n prins/prinses is?

Mattheus 28:18 “En Jesus het nader gekom en met hulle gespreek en gesê: Aan My is gegee alle mag in die hemel en op aarde.”

Dan ‘n belofte wat ons saam met ons kan neem.

Johannes 14:14 “As julle iets in my Naam vra, sal Ek dit doen.” Jesus het al die mag op Hemel en Aarde. As kind van God het u toegang tot hierdie mag.

Verder wil ek vandag wil met Risa Cronje se kalwers ploeg, hier is ‘n pragtige uiteensetting van wat ons Verlosser, Jesus se Naam vir ons as sy kinders beteken.

ALFA EN OMEGA
Openbaring 22:13: Ek is die Alfa en die Omega, die Eerste en die Laaste, die Begin en die Einde.

BROOD VAN DIE LEWE.
Johannes 6:35: Jesus het vir hulle gesê: “Ek is die brood van die lewe. Wie na My toe kom, sal nooit honger word nie, en wie in My glo, sal nooit weer dors word nie.”

DIE DEUR.
Johannes 10:9: Ek is die deur; as iemand deur My ingaan, sal hy gered word en hy sal ingaan en uitgaan en weiding vind.

DIE EGTE DRUIWESTOK.
Johannes 15:1: Ek is die egte druiwestok en my Vader is die landbouer.

DIE GOEIE HERDER.
Johannes 10:11: Ek is die goeie herder. Die goeie herder lê sy lewe af vir die skape.

DIE WOORD.
Johannes 1:1: In die begin was die Woord, en die Woord was by God, en die Woord was God.

EK IS.
Johannes 8:58: Jesus het hulle geantwoord: “Amen, amen, Ek sê vir julle, Ek Is al van voordat Abraham gebore is.”

EWIGE VADER.
Jesaja 9:5: Want ‘n kind is vir ons gebore, ‘n seun is aan ons gegee. Die heerskappy is op sy skouer. Hy word genoem: Wonderbare Raadgewer, Magtige God, Ewige Vader, Vredevors.

GETROU EN WAAR.
Openbaring 19:11: Toe het ek gesien dat die hemel geopen is. En kyk, daar was ‘n wit perd! Hy wat daarop sit, word getrou en waar genoem, en met regverdigheid oordeel Hy en voer Hy oorlog.

GROOT HOëPRIESTER.
Hebreërs 4:14: Terwyl ons dan ‘n groot Hoëpriester het wat deur die hemele gegaan het, Jesus, die Seun van God, laat ons styf vashou aan ons belydenis.

HOEKSTEEN.
Psalm 118:22: Die klip wat die bouers afgekeur het, het die hoeksteen geword.

HOOF OOR ALLES.
Efesiërs 1:22-23: Hy het alles onder sy voete gestel, en Hom aan die kerk gegee, as Hoof oor alles, die kerk wat sy liggaam is, die volheid van Hom wat alles in almal vul.

IMMANUEL.
Jesaja 7:14: Daarom sal my Heer self vir julle ‘n teken gee: Kyk, die jong vrou is swanger, en gaan ‘n seun in die wêreld bring. Sy sal hom Immanuel noem.

KONING VAN DIE KONINGS.
Openbaring 17:14: Hulle sal teen die Lam oorlog voer, maar die Lam sal hulle oorwin, omdat Hy die Heerser van die heersers en die Koning van die konings is, en saam met Hom is die geroepenes, uitverkorenes en getroues.

LAM VAN GOD.
Johannes 1:29: Die volgende dag sien Johannes Jesus na hom toe kom, en hy sê: “Kyk, die Lam van God wat die sonde van die wêreld wegneem!”

LEEU UIT DIE STAM VAN JUDA.
Openbaring 5:5: Toe sê een van die ouderlinge vir my: “Hou op huil! Kyk, die Leeu uit die stam van Juda, die wortel van Dawid, het oorwin, sodat Hy die boekrol en die sewe seëls daarvan kan oopmaak.”

LEIDSMAN EN VOLEINDER VAN DIE GELOOF.
Hebreërs 12:2: …die oog gerig op Jesus, die Leidsman en Voleinder van die geloof, Hy wat ter wille van die vreugde wat vir Hom in die vooruitsig gestel is, die kruis verduur het, die skande daarvan gering geag het, en sy plek aan die regterkant van die troon van God ingeneem het.

LIG VIR DIE WêRELD.
Johannes 8:12: Toe het Jesus weer met hulle gepraat en gesê: “Ek is die lig vir die wêreld. Wie My volg, sal beslis nie in die duisternis leef nie, maar sal die lig van die lewe hê.”

LOSSER.
Job 19:25: Maar ek, ek weet: My Losser leef! Uiteindelik sal Hy op aarde opstaan.

MAGTIGE GOD.
Jesaja 9:5: Want ‘n kind is vir ons gebore, ‘n seun is aan ons gegee. Die heerskappy is op sy skouer. Hy word genoem: Wonderbare Raadgewer, Magtige God, Ewige Vader, Vredevors.

MIDDELAAR.
1 Timotheus 2:5-6: Want daar is een God, en een Middelaar tussen God en die mense: die mens Christus Jesus, wat Homself as losprys vir almal gegee het, tot getuienis op die bestemde tyd.

ONS HOOP.
1 Timotheus 1:1: Paulus, ‘n apostel van Christus Jesus, in opdrag van God, ons Verlosser, en van Christus Jesus, ons hoop…

ONS VREDE.
Efesiërs 2:14: Hy is immers ons vrede – Hy wat albei één gemaak het, en die middelmuur van skeiding, die vyandskap, deur sy liggaam afgebreek het.

OORWINNAAR.
Openbaring 3:21: Wie oorwin, sal Ek saam met My op my troon laat sit, net soos wat Ek ook oorwin het, en saam met my Vader op sy troon sit.

OPSTANDING EN DIE LEWE.
Johannes 11:25: Jesus het vir haar gesê: “Ek is die opstanding en die lewe. Wie in My glo, sal leef, al het hy ook gesterf…”

PARAKLEET OF VOORSPRAAK.
1 Johannes 2:1: My kinders, ek skryf hierdie dinge aan julle, sodat julle nie moet sondig nie; en wanneer iemand sondig, het ons Jesus Christus, die Regverdige, as Parakleet by die Vader.

ROTS.
1 Korinthiërs 10:4: …en almal het dieselfde geestelike drank gedrink. Want hulle het gedrink uit ‘n geestelike rots wat hulle gevolg het – en die rots was Christus.

VERLOSSER.
Lukas 2:11: Vandag is daar vir julle in die stad van Dawid as Verlosser gebore, Christus die Here.

VERSOENING VIR ONS SONDES.
1 Johannes 4:10: Hierin bestaan die liefde: nie dat ons God liefgehad het nie, maar dat Hy ons liefgehad het, en sy Seun gestuur het as versoening vir ons sondes.

VREDEVORS.
Jesaja 9:5: Want ‘n kind is vir ons gebore, ‘n seun is aan ons gegee. Die heerskappy is op sy skouer. Hy word genoem: Wonderbare Raadgewer, Magtige God, Ewige Vader, Vredevors.

WAARHEID.
Johannes 8:32: …en julle sal die waarheid ken, en die waarheid sal julle vry maak.

WONDERBARE RAADGEWER.
Jesaja 9:5: Want ‘n kind is vir ons gebore, ‘n seun is aan ons gegee. Die heerskappy is op sy skouer. Hy word genoem: Wonderbare Raadgewer, Magtige God, Ewige Vader, Vredevors.

Het jy nog iemand in jou lewe wat jy dink hierdie rolle en skoene sal kan volstaan? Ek het nie.

Is daar nog iets wat jou hierdie versekering in jou lewe kan gee? Ek weet nie van iets nie?

Besef dan vandag hoe groot ons Jesus se Naam is en wat dit vir ons doen. As jy gaan gaan in Sy naam. As jy iemand groet seën hulle met Sy naam, want dan sal Hy daar wees en sal die Gees jou in waarheid en vrede lei. As jy groet, groet en laat mense met Sy seën agter.

Ons is niks uit ons self nie, maar die werktuie waardeur Jesus werk. Nie jou naam nie, nie jou trots nie, nie jou toedoen nie!

Net deur Jesus en sy Naam.

Onafhanklikheid?

 

Goeiemôre Vriende,

Hier in Windhoek het ons opgestaan in ‘n baie koel, reënerige Donderdag. Vandag is Onafhanklikheidsdag by ons en dus ‘n vakansiedag.

Ek wil juis vanoggend daaroor gesels – in die wêreld is onafhanklikheid ‘n groot ding. Kinders wil onafhanklik wees van hul ouers. Vroue wil onafhanklik wees van hulle mans. In besigheid en mens se privaat lewe wil hulle onafhanklik wees, op hulle eie kan funksioneer en niks van niemand vra nie.

In God se Woord en sy wil vir ons lyk egter heeltemal anders. Hy vra dat ons algeheel afhanklik van Hom sal wees. Dat ons algeheel sal oorgee aan Hom in alles. Alles in Sy hand sal los en sal vertrou dat Hy dit vir ons tot ons beswil sal laat geskied.

Hy vra dat ons nie ons eie planne sal maak nie. Nie op ons eie krag en insig sal staat maak nie.
Hier is ‘n hele klomp verse uit die Woord wat aan ons vertel dat ons op ons Vader moet staatmaak vir alles en van Hom afhanklik moet wees.

Psalm 62: 6Wees net maar stil tot God, my siel, want van Hom is my verwagting!
7Sekerlik, Hy is my rots en my heil, my rotsvesting; ek sal nie wankel nie.
8By God is my heil en my eer; die rots van my sterkte, my toevlug is in God.
9Vertrou op Hom altyd, o volk! Stort julle hart uit voor sy aangesig! God is 'n toevlug vir ons. Sela.
10 Ja, nietigheid is die mensekinders, leuens is die aansienlikes; in die weegskaal moet hulle opgaan, almal saam is hulle minder as nietigheid.
11Vertrou nie op verdrukking en bou geen ydele hoop op rowery nie; as die vermoë aangroei, sit daar die hart nie op nie!
12 Een ding het God gespreek, twee is dit wat ek gehoor het: dat die sterkte aan God behoort,
13en aan U, o Here, behoort die goedertierenheid; want U vergeld elkeen na sy werk.

Want Ek, die Here jou God,
gryp jou regterhand aan, Ek wat vir jou sê:
Wees nie bevrees nie, Ek help jou.
Jesaja 41:13

Vertrou op die Here met jou hele hart
en steun nie op jou eie insig nie.
Ken Hom in al jou weë,
dan sal Hý jou paaie gelykmaak.
Spreuke 3:5-6

Die hart van die mens dink sy weg uit,
maar die Here rig sy voetstappe.
Spreuke 16:9

Al beswyk my vlees en my hart —
God is die rots van my hart
en my deel tot in ewigheid.
Psalm 73:26

Ek slaan my oë op na die berge:
waar sal my hulp vandaan kom?
My hulp is van die Here
wat hemel en aarde gemaak het.
Psalm 121:1-2

Baie planne is in 'n man se hart,
maar die raad van die Here, dié sal bestaan.
Spreuke 19:21

Ek is die wynstok, julle die lote. Wie in My bly, en Ek in hom, hy dra veel vrug; want sonder My kan julle niks doen nie.
Johannes 15:5

Hy gee die vermoeide krag
en vermenigvuldig sterkte vir die wat geen kragte het nie.
Jesaja 40:29

Hy kan jou voet nie laat wankel nie;
jou Bewaarder kan nie sluimer nie.
Psalm 121:3

Kwel julle dus nie oor môre nie, want môre sal hom oor sy eie dinge kwel. Elke dag het genoeg aan sy eie kwaad.
Matteus 6:34

Die Here is my herder;
niks sal my ontbreek nie.
Hy laat my neerlê in groen weivelde;
na waters waar rus is, lei Hy my heen.
Psalm 23:1-2

Ek stel die Here altyddeur voor my;
omdat Hy aan my regterhand is, sal ek nie wankel nie.
Psalm 16:8

Die Here sal vir julle stry, en julle moet stil wees.
Eksodus 14:14

As die Here die huis nie bou nie,
tevergeefs werk die wat daaraan bou;
as die Here die stad nie bewaar nie,
tevergeefs waak die wagter.
Psalm 127:1

Die seën van die Here — dit maak ryk,
en moeitevolle arbeid voeg daar niks by nie.
Spreuke 10:22

As ek dink: My voet wankel —
dan ondersteun u goedertierenheid my, o Here!
Psalm 94:18

Want wie is ek tog, en wat is my volk, dat ons in staat sou wees om sulke vrywillige gawes te skenk? Want dit kom alles van U, en uit u hand het ons dit aan U gegee.
1 Kronieke 29:14

Uit die benoudheid het ek die Here aangeroep;
die Here het my verhoor in die ruimte.
Psalm 118:5

Bewaar my, o God,
want by U skuil ek.
Psalm 16:1

Want hulle het die land nie deur hul swaard in besit geneem nie,
en hul arm het hulle nie die oorwinning gegee nie,
maar u regterhand en u arm en die lig van u aangesig,
omdat U 'n welbehae in hulle gehad het.
Psalm 44:4

O Here, God van die leërskare, herstel ons;
laat u aangesig skyn, sodat ons verlos kan word!
Psalm 80:20

As ek so deur die verse lees, lyk dit nie vir my of ons Vader vreeslik waarde heg aan onafhanklikheid nie. Hier in Afrika is dit ‘n groot gebeurtenis, dit word elke jaar gevier met baie duisende der duisende rande wat spandeer word. Maar na die vieringe gaan dieselfde mense wat dit gevier het honger, hulle het steeds nie skole waar hul kinders opvoeding kan ontvang nie, hulle het steeds nie ‘n werk wat hulle ‘n inkomste bring nie en so kan ek aangaan.

Wat beteken dit dan dat hulle onafhanklik is of hulle land onafhanklik is. Hoe onafhanklik is ‘n land as dit steeds van ander lande voedsel, eletronieseware, motors, boumateriaal en nog ‘n elle lange lys ander dinge moet invoer?

Onafhanklikheid in die wêreld lyk vir my dus maar na ‘n groot klug. Net so is dit ook ‘n versinsel in mense se lewens, ‘n manier om die eie ek te verhef. Want jy kan op jou eie voete staan.

Nee, jy kan nie! Want die suurstof wat jy inasem kom van God af, Hy laat jou asemhaal en wakkerword elke oggend. As Hy vandag sy genade en liefde en hand van ons onttrek, vergaan die wêreld in dadelik.
Bedink bietjie hierdie onafhanklikheid van jou en wat dit jou in die sak bring. Wees baie eerlik met jouself, kan jy werklik sonder God klaar kom? Kan jy werklik sonder jou man, vrou, kind, pa, ma of vriend se liefde en ondersteuning klaar kom?

Kom ons hou op om die wêreld se leuens te glo – dat lande onafhanklik is, dat mense onafhanklik is, dat instansies onafhanklik is – hulle is nie, want dan moes hulle niks van iets of iemand anders nodig gehad het nie.

Kies vandag om afhanklik te wees van God en geniet die ondersteuning van die mense wat Hy op jou pad plaas om Sy hande en voete te wees.

Eensgesindheid

Goeiedag Vriende, 

Hier roer die windjie die blare en ons is dankbaar, ander mag die sweet ons dalk aftap. In Namibië is die môre ons Onafhanklikheidsdag en die meeste besighede en mense gaan gesluit wees op Vrydag ook. Mense neem ‘n lekker langnaweek. Ek word gelukkig nie meer geraak deur vakansiedae nie, want ek is mos permanent met vakansie! Verder is ek opgewonde, want my kleindogter kom vandag. Die skole het ‘mid term break’ hier in ons land. Vir die volgende twee weke gaan ek dus dalk stiller wees, maar ek sal steeds probeer om elke dag ‘n gedagte te deel.

Die Woord is mos ons voedsel, so daarsonder kan ons tog nie.

Vanoggend praat ons oor eensgesindheid of eenheid. Kom ons kyk wat Matteus 18:19 daarvan sê en gesels dan daaroor. 

Matteus 18:19Verder verseker Ek julle: As twee van julle op aarde oor enige saak saamstem en daaroor bid, sal my Vader wat in die hemel is, hulle dit laat kry, 20want waar twee of drie in my Naam saam is, daar is Ek by hulle.”

Nou kan ons die vraag vra: Hoe moeilik kan dit nou wees om saam met iemand te stem?

Wel, die vyand ken ook hierdie vers, en daarom sal hy altyd sy bes doen om tweespalt te bring tussen man en vrou, tussen vriende, tussen families, tussen kollegas. Omdat hy weet, as mense saamstem is hulle binne God se wil en kan hulle soveel meer vermag. 

Hierdie is ‘n skrik waarin ons baie dikwels val. Ons eie ek kom in die pad, ons wil altyd die een wees wat reg is en aandui hoe dinge gedoen moet word. So werk ons reg in die vyand se hand. 

Daar is wel nog ‘n voorwaarde, die motief van ons hart moet ook reg wees as ons saamstem. As jy net saamstem om die saak afgehandel te kry, of saamstem omdat dit in jou guns kan tel, is daar ook nie eenheid nie. Die motiewe van albei se harte moet wees om in God se wil te handel. 

As man en vrou saam bid, maar een van die partye doen dit net omdat hy of sy die ander wil beïndruk of plesier, is dit nie vir God welgevallig nie. Ons Vader ken mos ons hart se bedoeling. Daar is dus nie regtig eenheid nie. 

Die dinge waaroor ons verskil met ander is soms so onbenullig, so onnodig, en glad nie die moeite werd nie. Ons word gewaarsku dat ons stryd op aarde nie teen vlees en bloed is nie, tog verblind die vyand ons so met sy leuens dat ons so dink. Al die tyd is dit net sy manier om verwarring en onmin tussen ons te saai dat ons kan swak wees. Hy weet as ons saamstem, ‘n eenheid is, is ons sterk, want dan is ons in ons Vader se wil en Sy krag is ons krag.

Wees bedag daarop in jou daaglikse wandel dat die vyand jou nie mislei en jy swak bly omdat jy in tweespalt bly lewe nie.

ROMEINE 12:16-18 AFR53

... wees eensgesind onder mekaar; moenie na hoë dinge streef nie, maar voeg julle by die nederige; moenie eiewys wees nie; vergeld niemand kwaad vir kwaad nie; bedink wat goed is voor alle mense; as dit moontlik is, sover as dit van julle afhang, leef in vrede met alle mense.

Jy sal verstom staan om te sien dat jy baie meer regkry deur met mense in liefde en eensgesindheid te leef as wanneer jy gedurig veg. ‘n Strydlustige persoon se vlaggie val vinnig as jy met hulle in liefde en rustigheid handel en die vyand stap uit as die verloorder.

 

 

 

Jou liggaam

 
Goeiemôre Vriende,

Uit ‘n koel, nat Windhoek, waar die son pas deur die wolke gebreek het. Ons het gister namiddag meer as net ‘n paar druppels gehad, en was dit nou vir jou heerlik.

Vanoggend kom praat ons Vader met ons uit Romeine. Hy praat met ons oor ons liggame, iets wat ons baie male misbruik, misken en mee handel net soos ons goed dink. Tog is dit eintlik mos nie ons s’n om mee te maak wat ons wil nie, of hoe?

Ons mishandel ons liggame deur verkeerde spys en drank. Ons misbruik ons liggame deur aan allerhande verkeerde praktyke deel te neem om ons eie begeertes te voed. Ons kleur ons velle in met ink en maak gate waar daar ook al moontlik ‘n plek is.

Ons doen dinge aan ons liggame asof ons nie dink God se volmaakte skeppingswerk is goed genoeg vir ons nie. Ek wonder soms hoe ons Vader voel as Hy elke dag so na ons kyk.

Kom ons plaas onsself vir ‘n paar minute in Sy skoene, met respek gesê. Jy as man van die huis bou vir jou die perfekte braaiarea. Jy doen moeite en werk vir dae daaraan. Dan staan jy terug en kyk daarna en voel trots op jou hande werk. ‘n Paar dae later kom jy by die huis en hoor ‘n gekap. Dan vind jy jou vrou by jou braai en sy is besig om ‘n gedeelte daarvan af te kap. Jou hart wil gaan staan, maar haar mening is dat sy dit anders wil hê.

Hoe sal jy daaroor voel? Sal jy dit net so geredelik aanvaar? Wat sal jy van jou vrou se optrede dink? Hoe sal jy handel?

Nou kom ons by die vroue, jy maak vir jou die pragtigste uitrusting vir jou dogter se troue. Dit is ‘n ingewikkelde ontwerp, maar jy druk deur en werk saans tot in die nag om dit perfek te kry dat dit jou pas soos ‘n handskoen. Wanneer dit klaar is, pas jy dit aan en draai in die rondte voor die spieël, jy is baie tevrede en gelukkig. Jy wys dit aan jou dogter en al jou vriendinne wat daar aankom. Jy is so trots daarop dat jy die in jou spaarkamer voor die kas laat hang dat jy elke keer daarna kan kyk as jy daarin loop.

‘n Paar dae later gaan jy dorp toe en wanneer jy terug keer en weer by jou spaarkamer inloop lyk jou pragtige uitrusting heel anders, heel misvorm. Iemand het nie van jou rok se hals gehou nie, en ook nie van die moue nie. Hulle het dit verander en dit is ‘n algehele gemors in jou oë.

Hoe sal jy daaroor voel? Sal jy dit net so geredelik aanvaar? Wat sal jy van jou vrou se optrede dink? Hoe sal jy handel?

Hier is wat God se woord van ons verwag.

Romeine 12:1EK vermaan julle dan, broeders, by die ontferminge van God, dat julle jul liggame stel as 'n lewende, heilige en aan God welgevallige offer — dit is julle redelike godsdiens.

2En word nie aan hierdie wêreld gelykvormig nie, maar word verander deur die vernuwing van julle gemoed, sodat julle kan beproef wat die goeie en welgevallige en volmaakte wil van God is.

As ek so na die vers kyk lyk dit my of ons nie kan doen met ons liggame wat ons wil nie. Jesus is ons voorbeeld, hy het heilig gelewe en in gehoorsaamheid aan ons Vader. Dit is wat Hy van ons ook verwag.

Wanneer ons so ons liggame misbruik, mismaak en net aan ons eie begeertes oorgee, glo ek Hy moet ook soos die man voel wie se braai sy vrou wou verander en die vrou wie se pragtige perfekte rok iemand gaan uitmekaar knip het.

Wees bedag daarop dat jou liggaam ook ‘n geskenk van God is, perfek gevorm en aanmekaar geweef deur Homself. Hoekom is dit nie goed genoeg vir jou nie?

Na trane kom lag

 

Vriende,

Jammer dat ek nog nie by julle uitgekom het vanoggend nie. Hier was dit nou voorwaar 'n potblou Maandag vanoggend. Nou is my rug so kwaad vir my dat ek niks anders kan doen behalwe tik vir die res van die dag nie. Dit sal ook weer reg kom gelukkig. Hoop julle naweek was rustig.

Vanoggend lees ek Psalm 30 en dit val my weer op hoe vol genade ons Vader vir ons is.

Psalm 30

Vir altyd sal ek U loof

1'n Psalm. 'n Lied vir die inwyding van die tempel. Van Dawid.

2Ek wil u lof verkondig, Here, want U het my gered

en my vyande nie laat bly wees oor my nie.

3Here my God, ek het na U geroep om hulp

en U het my gesond gemaak.

4Here, U het my gered van die doderyk,

my aan die lewe gehou toe ek al op pad was na die dood toe.

5Sing tot eer van die Here, julle wat Hom getrou dien,

loof sy heilige Naam!

6Waarlik, sy toorn duur net 'n oomblik,

maar sy goedheid lewenslank.

Gisteraand was daar nog trane

en vanmôre lag ek al weer.

Ons lees nie hier dat ons Vader ontsteld raak met ons nie, maar wel dat sy toorn net vir 'n rukkie duur en Hy ons dan weer vergewe en verder vir ons lief bly.

Is dit nie ook hoe Hy verwag ons moet met ons familie, vriende en medemense omgaan nie? Ja, ons mag kwaad word, maar ons mag nie kwaad bly nie en ook nie sondig terwyl ons kwaad is nie.

Bedoelende nou is ek kwaad vir Piet, in plaas daarvan dat ek vrede maak beswadder ek nou Piet se naam by almal wat wil luister.

Vanoggend sê een van die pastore waarna ek luister 'n baie waar ding. Hy sê die Onse Vader gebed is die gevaarlikste gebed wat ons ons kinders of enigiemand kan leer om te bid.

Hoekom? Omdat ons in daardie gebed verklaar: 'vergeef ons ons sondes, net soos ons die vergewe wat teen ons sondig' - werklik?

Wat is die implikasie van hierdie woorde?

Die implikasie is dat as ek en jy nie bereid is om ons naaste, ons broer, ons suster, ons vriend te vergewe vir iets nie, hoef ons Vader ons ook nie te vergewe nie.

Dus as jou vriend vir jou gejok het, en jy kom dit agter en is kwaad. Jy voel verraai, jy voel dat dit net nie iets is wat jy kan vergewe nie, want hoe vertrou jy weer die persoon.  Dan hoef God jou ook nie te vergewe sou jy vir iemand ander jok nie – en Hy sal dadelik weet as jy dit doen, want Hy weet alles.

Dink dus volgende keer as jy hierdie gebed bid, baie mooi oor wat jy bid en wees vir seker dat jy nie dalk ‘n oordeel oor jouself bring nie.

Wees hou om te vergewe al was jy nie die skuldige party nie, want dit is die voorbeeld wat ons van Jesus gekry het.

Laat ons dankbaar wees in die wete dat al kry ons swaar, ons Vader weer ons vreugde sal herstel.

Jy het 'n uitnodiging ...

Goeiedag Vriende, 

Die koelte hou nog hier in die voormiddag, met ‘n windjie wat so liggies die blare roer. Verder gaan dit goed en skryf ek heerlik. So voor die naweek wil ek nog vir laas met julle kom gesels uit ons Vader se rykdom van beloftes.

Gisteraand by die Bybelstudie, gee ons Bybelstudie leidster, wat gisteraand ‘n vrou was, vir my ‘n lantern in die hand, een wat brand al was dit nog helder daglig. Sy gee my ‘n soort van ‘n raaisel en vra dat ek die raaisel volg om iets te vind. Ek kyk haar toe so skeef-kop aan soos ‘n getroue skaaphond soms doen.

Sy gee my toe ‘n leidraad om my te help waar ek moet begin soek. Die leidraad was so goed, dat ek dadelik geloop het met my lampie en die versteekte item gaan vind het. Dit was twee kerse met ‘n rooi lintjie vasgebind en ‘n kaartjie waar op daar staan: “Uitnodiging aan Marsofine Krynauw, Kom ...”

Met die naweek op hande, sit jy dalk vanaand alleen by die huis, terwyl jy weet van jou vriende, of mense wat sê hulle is jou vriende braai heerlik saam. Of jou vriendinne is reeds besig om by een of ander kwekery saam tee te drink, maar jy is nie genooi nie.

Soms vra jy vir jou vrou of man, hoekom is ons altyd die mense wat almal moet nooi, hoekom word ons nie genooi nie.

Die antwoord daarop is moeilik, en ons sal dit dalk nooit weet nie. Miskien is dit maar net dat die ander nie inisiatief het nie, of nie die persoonlikheid het om mense te onthaal nie.

Hoe dit ook al sy, daar is een baie belangrike Persoon wat ons elke dag uitnooi. Lees bietjie saam met my ‘n vers wat ons vroeër die week ook reeds gelees het.

Matteus 11: 28“Kom na My toe, almal wat uitgeput en oorlaai is, en Ek sal julle rus gee. 29Neem my juk op julle en leer van My, want Ek is sagmoedig en nederig van hart, en julle sal rus kry vir julle gemoed. 30My juk is sag en my las is lig.”

Jy mag dalk nooit van jou vriende of vriendinne of familie ‘n uitnodiging ontvang nie, maar jy ontvang elke dag ‘n uitnodiging van die Koning van die heelal en jy het ‘n keuse of jy op daardie uitnodiging gaan reageer.

Jesus nooi jou om te kom net soos jy is, of jy vet of maer, ryk of arm, baie of min aansien het, of jy met ‘n Mercedes of ‘n trekker ry, of jy baie berese of nog nooit in jou lewe gereis het nie – niks maak aan Hom saak nie. Jy bly kosbaar vir hom, Hy wil jou aan sy tafel hê. Hy wil jou voed, hy wil saam met jou lag, saam met jou bly wees, saam met jou huil, jou optel en troos as jy seer het.

Hy het geen moeite of ontbering ontsien om jou aan sy tafel te kan hê nie.

Buiten die kaartjie met die uitnodiging, was daar die twee kerse wat ek gevind het. Wat simboliseer dit?

Dit simboliseer die gelykenis van die 5 wyse maagde met die vol lampe en ekstra olie. Daar was ook 5 dwase maagde wat nie ekstra olie gebring het nie en hulle het uit olie uit gehardloop en was nie gereed toe die Bruidegom opgedaag het nie.

As jy die uitnodiging van die Koning ontvang, moenie op jou louere rus nie, wees gereed. Sorg dat jy genoeg olie in jou lamp het en neem nog ekstra saam, vir dit wat jy nie weet wat voor is nie.

Hoe berei ons ons voor vir hierdie uitnodiging? Presies soos Jesus vir ons vertel in die res van daardie vers – leer van my.

PSALMS 119:105 A

U woord is 'n lamp vir my voet en 'n lig vir my pad.

Gebruik hierdie lamp wat ons Vader vir ons gegee het en onthou al nooi niemand jou nie, jy het ‘n staande uitnodiging elke dag van die Koning van die heelal: ‘Kom ...

Hierdie naweek as jy so by jouself sit en wonder oor jou vriende en hoekom jy nie genooi is nie, neem jou Bybel en antwoord op Jesus se uitnodiging en word vervul, verkwik en geniet sy vrede wat alle verstand te bowe gaan.

 

Dankbaarheid teenoor trots ...

Goeiedag Vriende,

Hier is dit lekker koel, maar natuurlik sal die son sy werk nie ophou doen tot die kraaie gaap nie. Tog het ons die hitte nodig vir die reën om te kom.

Vanoggend wil ek weer gesels oor die dinge wat ons vir ons Vader doen. Soos kos wat jy vir iemand gee wat jy weet nie kos het nie. Ou klere wat jy vir ‘n gesin gee wat swaarkry. Daardie uitreik wat jy mee maak van jou gemeente. Daardie siek of bejaarde persoon wat jy besoek en wie se dag of week of maand jy net maak. 

So dikwels sien ons dat mense en selfs gemeentes foto’s van hierdie liefdadigheidswerk op sosiale media deel en breed glimlag vir die lof wat hulle dan toegeswaai word. Ek as skrywer en digter sien gereeld hoe mede-skrywers en digters aan kompetisies deelneem en vir ‘n week daarna hulle sertifikate en trofees aan die wêreld tentoonstel. 

Jesus is baie duidelik daaroor in sy Bergrede: 

MATTHÉÜS 6

Bergpredikasie (vervolg). Liefdadigheid, gebed en vas.

1PAS op dat julle nie jul liefdadigheid voor die mense bewys om deur hulle gesien te word nie; anders het julle geen loon by julle Vader wat in die hemele is nie.

2Wanneer jy dan liefdadigheid bewys, moenie 'n trompet voor jou blaas soos die geveinsdes in die sinagoges en op die strate doen, dat hulle deur die mense geëer kan word nie. Voorwaar Ek sê vir julle, hulle het hul loon weg.

3Maar jy, as jy liefdadigheid bewys, laat jou linkerhand nie weet wat jou regterhand doen nie,

4sodat jou liefdadigheid in die verborgene kan wees; en jou Vader wat in die verborgene sien, Hy sal jou in die openbaar vergelde. 

Niemand moet weet wat jy vir die minderbevoorregtes doen nie. Dit is jou opdrag van jou Vader. Hy sal jou daarvoor eendag self beloon. Dieselfde met jou gawes, jy het dit van God ontvang, die eer kom Hom toe. 

Daardie storie van ‘jy kan trots wees op jouself’ werk nie in God se boeke nie. 

Wat doen ek – wanneer ek ‘n boek wat uitgekom het adverteer, sal ek heel eerste die eer aan my Vader gee. Ek besef maar te goed, elke woord, sin, gedagte en my storielyn in daardie boek kom net van my Vader af. Ek weet dit, want ek bid dit elke dag wat ek skryf van Hom af.

Ons moet besef dat alles wat ons besit, aan ons Vader behoort. Wat ons dus doen as ons liefdadigheidswerk doen, is net om wat aan ons Vader behoort te deel. Of dit nou tyd, of kos, of klere of bemoediging of gebed is. 

Ons het dus geen rede op ons eie beuel te blaas nie en dit is ook nie wat God van ons verwag nie. Ons kan net nederig en dankbaar wees vir die voorreg dat ons Vader deur ons werk om ander te seën. 

Wanneer jy weer iets vir iemand doen, dink daaraan dat jy eerder dankbaar as trots moet wees. Dankbaar omdat ons Vader aan jou in soveel oorvloed gegee het dat jy dit kan deel. Dankbaar dat Hy jou gekies het om sy verlengstuk te wees om ander te seën.

 

Rus ...

Vriende,

Hier in Windhoek is dit ‘n heerlike betrokke, koel oggend. Hier by my is alles so stil en rustig en ek is dankbaar. Tog weet ek dat almal nie in die bevoorregte posisie is wat ek is nie. Almal kan nie soos ek sonder ‘n wekker wakker word, hul koffie gaan maak, dit rustig geniet, daarna in vrede stiltetyd hou en dan hulle dag begin nie.

Net gister luister ek na my vriendin in Duitsland – sy is ‘n Suid-Afrikaner wie se man in Duitsland gaan werk het. Hulle woon al ses of sewe jaar daar. Sy het al redelik vlot Duits leer praat en ook baie gelukkig dat sy dit gedoen het.

Want soos enige jongvrou moet sy ook werk. Dit kan sy nie doen as sy nie kan Duits praat nie. Sy werk Maandae as hulp by twee diep bejaarde mense, doen hulle inkopies, versorg die tannie se hare, was die wasgoed, stryk, maak die huis skoon. Die res van die week doen sy of aanlyn onderrig in Engels vir Duitse kinders of gee klas in Engels aan Duitse kinders by ‘n skool of selfs tuis. Dan het sy self ‘n tiener dogter wat sy skool toe neem, en ‘n man wat soms van die huis werk, daarby nog ‘n huis om te versorg.

Sy raak soms nie kant of wal nie, en gister was weer een van daardie dae. Sy jaag van die een plek na die ander om klas te gee, tussendeur gaan haal sy haar dogter by die skool, voor sy weer op pad is na die volgende afspraak vir nog ‘n Engelse les. Vanaand soek haar gesig kos en die huis moet ook skoon kom iewers.

Haar woorde aan my gister was: So tussen lesse, trek ek net vinnig by ‘n parkeer area in en doen my stilte tyd.

Die vraag vanoggend is, almal is besig, almal is moeg. Waar vind jy rus?

Die antwoord sal baie gee as: Om net ‘n naweek of dag of week af te vat en te gaan rus. Tog is dit nie die antwoord nie, want net laas week het ‘n vriend van my wat met verlof was vir drie weke die volgende stelling gemaak: Dit was vandag my eerste dag terug by die werk en dit voel of ek nog nooit verlof gehad het nie.

Dan kom Jesus in Matteus en nooi ons:

Matteus 11: 28“Kom na My toe, almal wat uitgeput en oorlaai is, en Ek sal julle rus gee. 29Neem my juk op julle en leer van My, want Ek is sagmoedig en nederig van hart, en julle sal rus kry vir julle gemoed. 30My juk is sag en my las is lig.”

Ons steek altyd net by vers 28 vas, maar vergeet om aan te lees na wat die voorwaarde is om hierdie rus te ontvang. Jesus nooi ons om te kom, maar Hy sê ook: neem my juk op en leer van my ...

Ons dink dit is ons liggame wat moeg is, maar dit is nie ... dit is ons gemoed wat moeg is. Deur van Jesus te leer, leer Hy ons hoe om elke situasie in ons lewens op die regte manier te hanteer en dit sal ons rus vir ons gemoed gee. Ons sal nie meer spook en stoei met vrae of ons dit reg of verkeerd hanteer het nie. Verder sal die Heilige Gees ons leiding gee as ons gewillig is om te leer en te luister.

Jesus het reeds die spore getrap, ons moet net volg en dan sy uitnodiging en aanvaar om rus by Hom te vind as ons Hom leer ken het soos ‘n eie broer.

Kom ons soek rus op die regte plek, en hou op onsself verder vermoei deur dit op die verkeerde plek te soek. Rus sal jy vind as jy stil raak by die voete van jou Middelaar. Daarvoor het jy nie ‘n week of maand nodig nie, net ‘n tydjie elke dag.

Skaam jy jou ...

 Vriende,

Net so voor dit twaalfuur slaan kom groet ek vir hierdie dag. Ek hoop dit gaan goed met almal. Hier by my gaan dit goed, want ek skryf aan ‘n nuwe boek en dit is heerlik en opwindend.

Praat jy oor God se Woord? Of is jy skaam om daaroor te praat?

Soms skaam ons ons vir ‘n familielid of ons kind, of omdat ons Afrikaans sprekend is, of omdat ons in Afrika woon. Miskien het die familielid of kind iets aangevang waaroor jy jou skaam. Miskien het jy besluit Afrikaner wees is nie ‘glamorous’ genoeg vir jou nie, of jy sou baie eerder wou in Frankryk woon. 

Dit is jou goeie reg. Verder weet ek ook dat baie van ons groot gemaak is om nie oor die God se woord te praat nie. So soort van ‘n FBI-geloof. Niemand moet tog weet jy is ‘n Christen nie, of jy probeer jou lewe op Christelike beginsels volgens die Woord leef nie. So ‘undercover’ soos ‘n FBI ondersoek. 

Jy hoef jou nie oor God se Woord te skaam nie, en dit is ook nie hoe Hy wil hê ons daarmee met omgaan nie. Hy wil juis hê ons moet die goeie nuus aan die wêreld vertel. Paulus maan ons presies hieroor. 

Romeine 1: Die regverdigmaking deur die geloof.

16WANT ek skaam my nie oor die evangelie van Christus nie, want dit is 'n krag van God tot redding vir elkeen wat glo, eerste vir die Jood en ook vir die Griek.

17Want die geregtigheid van God word daarin geopenbaar uit geloof tot geloof, soos geskrywe is: Maar die regverdige sal uit die geloof lewe.

Ons moet aan ons familie, ons vriende en die wêreld van Jesus vertel. Ons moet so lewe dat ander Hom in ons kan sien. Ons mag ons nie skaam vir ons Skepper nie, want daar is geen rede om ons oor te skaam dat ons die Een wat vir ons gesterf het dat ons kan lewe voor moet skaam wees nie. 

As iemand jou gered het van verdrinking, of van ‘n ongeluk wat jou lewe kon neem, sal jy daardie persoon se naam wil wegsteek? Nee, gewis en beslis nie. Jy sal vir almal van die wonder wil vertel.

Jesus het jou van die hel en die ewig verderf gered, moet jou nie skaam om dit aan mense te vertel nie. Hy het hom nie geskaam om aan ‘n kruishout vir jou te hang nie.

 

Jy is besig om dit te maak ...

Goeiemôre Vriende,

Hier by ons was dit oor die naweek versengende warm, maar getrou soos ons Vader is, het hy dit hitte kom breek met ‘n heerlike reënbui gisteraand. Nou is alles vars en fris. Ek hoop julle is ook uitgerus en reg vir die nuwe week.

Dit is weer een van daardie oggende wat die drie boodskappe wat ek luister en lees dieselfde tema het. Ek glo dit is nooit toeval nie.

Dikwels voel ons oorweldig en uiter ons die volgende frase: ‘Ek weet nie hoe ek/ons dit gaan maak nie.’

Jou omstandighede oorweldig jou, maar die feite is jy is besig om dit te maak, anders sou jy nie eers daardie frase kon uiter nie.

Ek plaas vanoggend lang skrifgedeeltes, maar dit is so pragtig en vertel ons so mooi van ons Vader se getrouheid. In Ps 145:18 & 19 is daar egter ‘n belofte van ons Vader. Dit staan steeds vir jou en my en ook in daardie situasie wat ons glo ons dit nie in gaan maak nie.

Maar kyk gerus na die lofprysing voor daardie verse. Wanneer laas het jy jou Skepper so geloof en geprys? Is dit nie dalk die oorsaak daarvan dat jy voel jy gaan dit nie maak nie.

PSALMS 145
Ek wil getuig van u magtige dade
1'n Loflied van Dawid.
Ek wil u lof verkondig,
my God en Koning,
ek wil u Naam altyd loof.
2Elke dag wil ek U loof,
ek wil u Naam altyd prys.
3Die Here is groot, alle lof kom Hom toe,
sy grootheid is ondeurgrondelik.
4Geslag na geslag prys wat U doen
en vertel van u magtige dade,
5van die luister, die heerlikheid van u majesteit.
Ek wil getuig van u magtige dade,
6sodat die mense oor u wonderdade sal praat.
Ek wil van u grootheid vertel.
7Sonder ophou moet hulle u groot goedheid verkondig
en oor u reddingsdade jubel.
8Genadig en barmhartig is die Here,
lankmoedig en vol liefde.
9Die Here is vir almal goed
en barmhartig oor alles wat Hy geskep het.
10Almal wat deur U geskep is, loof U, Here,
en u troue dienaars prys U!
11Hulle vertel van u koninklike mag
en getuig van u groot krag.
12Die mense moet weet van sy krag,
van sy koninklike mag en majesteit.
13U koningskap is 'n koningskap vir alle tye,
u heerskappy strek oor die geslagte heen.
14Die Here help almal op wat geval het.
Hy ondersteun dié wat bedruk is.
15Die oë van almal is op U gerig,
en U gee hulle kos op hulle tyd.
16U maak u hand oop
en skenk u guns in oorvloed aan al wat leef.
17Die Here is regverdig in al sy handelinge,
getrou in alles wat Hy doen.
18Die Here is naby almal wat Hom aanroep,
almal wat Hom in opregtheid aanroep.
19Aan dié wat Hom dien, gee Hy wat hulle vra,
Hy hoor as hulle om hulp roep, en Hy red hulle.
20Die Here beskerm almal wat Hom liefhet,
maar al die goddeloses verdelg Hy.
21Ek sal die lof van die Here verkondig.
Laat al wat leef, sy heilige Naam vir altyd prys.

Hier in Deuteronomium gee God ons weer daardie belofte dat Hy ons nie sal begewe of verlaat nie. Tog kan iemand jou nie begewe of verlaat as daardie persoon nie ‘n hegte vriendskap of verhouding van enige aard met jou het nie.

Ons moet dus kies om ‘n verhouding met ons Vader te hê. Om naby Hom te bly. Daarop belowe Hy om ons vas te hou en by te staan.

Deuteronomium 31:8 En dit is die Here wat voor jou uit trek; Hy sal met jou wees; Hy sal jou nie begewe of verlaat nie; jy mag nie bevrees of verskrik wees nie.

Dan lees ek verder in Jesaja, en my mond hang behoorlik oop oor ons Vader se almag. Vers 14 van Jesaja 40 is nog altyd die vers in die Woord wat God se almag vir my so mooi saamvat. Ek plaas ook hier vir jou die 1983 vertaling se weergawe, want dit sê dit nog duideliker: 

Jesaja 40:14 wie kan sy raadgewer wees?
14Vir wie raadpleeg Hy
dat dié Hom tot insig sou bring
en Hom sou leer wat om te doen?
Wie leer Hom en onderrig Hom
dat Hy met insig kan optree?

Jesaja 40:
God alleen groot bo alle skepsele.
12WIE het die waters met die holte van sy hand afgemeet, en van die hemele met 'n span die maat geneem, en in 'n drieling die stof van die aarde opgevang, en die berge geweeg met 'n weegtoestel en die heuwels met 'n weegskaal?
13 Wie het die Gees van die Here bestier en as sy raadsman Hom onderrig?
14Met wie het Hy raad gehou, dat dié Hom verstand sou gee en Hom sou leer aangaande die pad van die reg, en Hom kennis sou leer en Hom bekend maak die weg van volledige insig?
15Kyk, die nasies is soos 'n druppel aan die emmer, en soos 'n stoffie aan die weegskaal word hulle gereken. Kyk, Hy hef die eilande op soos 'n stoffie!
16En die Líbanon is nie genoeg as brandhout en sy wild nie genoeg as brandoffer nie.
17Al die nasies is voor Hom soos niks: as niks en nietigheid word hulle by Hom gereken.
18By wie wil julle God dan vergelyk? Of watter gelykenis naas Hom stel?
19 Die ambagsman giet 'n beeld, en die goudsmid trek dit oor met goud en smelt silwerkettings.
20Wie te arm is vir so 'n offergawe, kies 'n stuk hout wat nie vergaan nie; hy soek vir hom 'n kunsvaardige ambagsman om 'n beeld op te rig wat nie wankel nie.
21 Weet julle nie? Hoor julle nie? Is dit julle nie van die begin af bekend gemaak nie? Het julle nie op die fondamente van die aarde gelet nie?
22Hy sit bo die kring van die aarde, en die bewoners daarvan is soos sprinkane; Hy span die hemele uit soos 'n dun doek en sprei dit uit soos 'n tent om in te woon.
23 Hy maak die vorste tot niet, die heersers van die aarde verander Hy in nietigheid;
24skaars is hulle geplant, skaars is hulle gesaai, skaars wortel hulle stam in die grond, of Hy blaas op hulle, sodat hulle verdor, en die storm voer hulle weg soos 'n stoppel.
25 By wie sal julle My dan vergelyk, dat Ek net so kan wees? sê die Heilige.
26Slaan julle oë op in die hoogte en kyk! Wie het hierdie dinge geskape? Hy laat hulle leërskare uittrek volgens getal, Hy roep hulle almal by die naam, vanweë die grootheid van kragte en omdat Hy sterk van vermoë is; daar word nie een gemis nie.
Laat Israel nie moedeloos wees nie.
27WAAROM sê jy dan, o Jakob, en spreek jy, o Israel: My weg is vir die Here verborge, en my reg gaan by my God verby?
28Weet jy dit nie? Of het jy dit nie gehoor nie? 'n Ewige God is die Here, Skepper van die eindes van die aarde; Hy word nie moeg of mat nie; daar is geen deurgronding van sy verstand nie.
29Hy gee die vermoeide krag en vermenigvuldig sterkte vir die wat geen kragte het nie.
30Die jonges word moeg en mat, en die jongmanne struikel selfs;
31maar die wat op die Here wag, kry nuwe krag; hulle vaar op met vleuels soos die arende; hulle hardloop en word nie moeg nie, hulle wandel en word nie mat nie.

Steeds is hierdie Almagtige God altyd naby ons, gaan hy voor ons uit. So jou situasie waarin jy is, Hy weet reeds daarvan en het reeds die pad berei.

Niemand kan Hom raad gee nie, Hy het alles in stand gebring en onderhou dit. Tog beloof hy om as ons met ons hand in syne stap, hy ons vir elke dag nuwe krag sal gee, dat ons soos arende sal hoog sweef.
Jy maak dit, jy sal dit maak, en bly maak as jy jou skuiling by ons Allerhoogste maak. Jy is nie alleen nie, jy sal nie moeg raak nie, want jou krag is nie uit jouself nie, maar uit Hom.

Neem vandag tyd om jou Vader te loof, te prys en te eer vir wie Hy is en nie vir wat jy van Hom kan kry nie.

Ons Vader is Almagtig

 Goeiedag Vriende,

Jammer ek het julle gister afgeskeep. Dit was net erg besig omdat my nuutste boek uitgekom het vroeg oggend en ek met die bemarkingsvideo besig was. Steeds is ek dankbaar. So het die derde maand afgeskop en is die eerste week al weer verby.

Vanoggend so aan die einde van die week praat ek graag oor die almag van ons Vader. Dit was weer opvallende vanoggend drie van die oordenkings waarmee ek vanoggend besig was dieselfde hoof gedagte het – die almag van God en sy beloftes aan ons.

In Josua 1 beveel God vir Josua om sterk en vasberade te wees omdat hy met hom sal wees. Om vir niks terug te staan nie, om nie bang te wees nie. Hy weet dat Josua dit nie in sy eie krag kan doen nie, maar hy belowe dat hy daar sal wees en dan is enigiets moontlik. Dieselfde geld vir ons lewens. Die uitdaging kan vir ons onmoontlik lyk om te oorbrug, maar vir God is dit heeltemal moontlik. Met God sal ons daardeur kom.

Josua 1:9Ek self gee jou die opdrag. Wees sterk, wees vasberade. Moenie skrik nie, moenie bang wees nie, want Ek, die Here jou God, is by jou oral waar jy gaan.”

Dan gaan ons aan na Habakuk, en vertel hy ons dat ons God se magtige teenwoordigheid oral oor die aarde geken sal word. Hoe sal dit geken word? Dit word deur jou en my lewe geken, deur die struikelblokke en uitdagings wat ons oorkom wat mense nie kan verstaan hoe ons dit oorkom het en nog steeds so positief is of steeds soveel vreugde in ons lewens het nie.

Deur ons getuie van wat God vir ons gedoen het en steeds doen. Deur onsself sal ons nie die dood van ‘n kind, ‘n lewensmaat, ‘n ouer, ‘n vriendin kan oorkom nie. Deur ons self sal ons nie die kind wat in dwelms verval of die lewensmaat wat in alkoholisme verval het kan aanvaar en ondersteun nie. Net met God se hulp, net deur op ons knieë te bly kan ons daardie groot struikelblokke oorkom en kan ons mense genesing kry. God kan ‘n jongmens wat in dwelms verval het, genees en so ook die persoon wat in alkoholisme verval het.

Habakuk 2: 14Soos waters die seebodem bedek,

so sal die magtige teenwoordigheid van die Here oral op die aarde geken word.

Jona kom vertel ons dat hy daar was waar hy eintlik geen uitweg gehad het nie, die walvis en watermassa van die see was om hom. Daar was niks wat hy vir homself kon doen nie. Tog toe hy uitgeroep het in gebed in hierdie situasie, was God reeds daar.

God is alom teenwoordig, ons vergeet dit so maklik. Hy wag net vir ons om met Hom te praat. Hy ken reeds jou gedagtes, jou nood, jou uitdaging, maar wag vir jou om jou afhanklikheid van Hom te verklaar.

Nou kan jy vra, maar hoekom moet ek eers vra, eers bid? Doen ons nie dieselfde met ons kinders nie. Ons ken hulle behoeftes en wense, tog wil ons hê hulle moet vir ons vra vir hulp. Ons wil voel hulle het ons nodig en waardeer ons. God ons Vader wil ook voel ons het hom lief en waardeer hom.

Jona 2: 6Ek het afgesak tot by die fondamente van die berge,

die aarde het my vir altyd toegesluit.

Maar U, Here my God, het my van die dood gered.

7Toe ek wou vergaan, het ek aan die Here gedink,

en my gebed het by U gekom, in u heilige tempel.

 

Kom ons gaan hierdie naweek in met die wete ons Vader is Almagtig en alom teenwoordig. Daar is niks wat Hy nie kan doen nie.

Ek wil ...

 

Goeiemôre Vriende 

Lekker koel oggend, maar die son het reeds begin werk, die termometer beloof om vandag sommer goed te styg. Gelukkig werk ek nie in die son op ‘n land of in die veld nie, vir die manne en vrou wat doen, baie sterkte met die hitte.

Vanoggend lees ek Lukas 5:12 – 16, ‘n gedeelte wat ons almal al  baie gelees het. Maar vanoggend kom tref Jesus se antwoord in vers 13 my reg voor die bors.

Ons weet al almal dat in daardie dae mense nie naby melaatses gekom het nie. Tog het hierdie man uit desperaatheid na Jesus gegaan en hom gesmeek om hom te genees.

Lukas 5

Die gesondmaking van 'n melaatse.

12 EN terwyl Hy in een van die stede was, kom daar 'n man vol van melaatsheid; en toe hy Jesus sien, val hy op sy aangesig en smeek Hom en sê: Here, as U wil, kan U my reinig.

13Daarop steek Hy die hand uit en raak hom aan en sê: Ek wil, word gereinig! En dadelik het die melaatsheid hom verlaat.

14Toe gee Hy hom bevel om dit aan niemand te vertel nie; maar, sê Hy, gaan vertoon jou aan die priester en offer vir jou reiniging, soos Moses voorgeskrywe het, vir hulle tot 'n getuienis.

15 Maar die gerug aangaande Hom is nog meer versprei, en groot menigtes het bymekaargekom om te luister en deur Hom van hulle siektes genees te word.

16 Maar Hy het Hom in verlate plekke teruggetrek en gebid.

Hoekom het dit my so getref? Die Koning van die wêreld, die Een deur wie alles ontstaan het, die Lig, die Waarheid, die Weg en die Amen op alles in hierdie heelal deins nie weg nie. Praat ook nie die man aan omdat hy hom waag nader het nie. Nee! Hy antwoord onmiddellik: ‘Ek wil ...’

Sit jouself vir ‘n wyle in Jesus se skoene. As iemand wat jy ken, of nie ken nie, na jou sou kom wat jy weet aan ‘n baie aansteeklike siekte ly. Jou vra om te help. Wat sal jou reaksie wees?

Sal jy die persoon wegstuur uit vrees dat jy ook sal siek raak. Sal jy die persoon aanpraat oor sy onverantwoordelikheid om met ‘n aansteeklike siekte tussen mense te beweeg? Of sal jy soos Jesus dood eenvoudig ook sê: Ek wil jou help.

So staan Jesus nog elke dag by ons, en net so verklaar Hy hom nog elke dag bereid om ons met alle, ja alles in ons lewens te help. Hy maak nie verskonings nie. Hy stuur nie die persoon weg nie. Hy praat hom nie aan nie. Hy help hom!

So seker as wat jou kleuter is dat as hy van die hoë plek af spring jy as sy ouer hom sal vang. Dat hy of sy nie sal val nie, so seker is dit dat Jesus ons sal vang, ons wil help. Ons kan ook soos daardie kleuter net ontspan in die seker wete ons Koning wil!

Wat is daar vandag wat jy wil hê Jesus moet vir jou doen? As dit iets is wat volgens God se riglyne vir jou lewe is, sal Jesus dit vir jou wil doen.

Vra Hom en vertrou soos ‘n kleuter.

Integriteit ...

Goeiemôre Vriende,

Hier raak dit baie duidelik koeler in die nag en oggende, ek sien gisteraand op Facebook dat van die Boesmanlanders praat van koue by hulle. So dat hulle geheel sop en kerrieafval gemaak het. Wel ek het nie koue nodig om enige een van daardie te maak nie, want ek vrek oor albei.

Kom ons gesels vandag bietjie oor integriteit. Ons woord van eer soos ons daarmee grootgeword het.

Ek kan nog goed onthou as kind dat daar nie geskrewe kontrakte vir ooreenkomste was nie. Vir die eerlike mense, het dit goed gewerk as die ander persoon ook eerlik was, maar as die ander persoon skelm was, het dit maar sleg uitgedraai soms. 

Daarvan het ek eerstehandse kennis opgedoen toe my Pappa skielik oorlede is. Hy was ‘n bouer en was besig om vir ‘n hele paar mense huise, slagpale en nog wat te bou. Daar was nêrens kontrakte nie, met die gevolg toe hy sterf, het hierdie mense net stil gebly en dit wat reeds gebou was verniet gekry. Op navraag van die grootmense wat ons versorg het, was die antwoorde net: ‘waar is die kontrak’.

Gelukkig is dit maar daardie mense se probleem, want God het vir my broer en my mooi gesorg deur mense wat vir ons omgegee het.

Dit geld egter nie net vir groot kontrakte nie, maar ook vir beloftes wat ons aan ons man/vrou, vriend/vriendin, kinders, familie of selfs kennisse maak.

Soms maak jy ‘n belofte wat jy terwyl jy dit maak reeds weet jy nie gaan kan nakom nie. Soms maak jy ‘n belofte en is so besig dat jy daarvan vergeet.

Een ding wat ek as moeder geleer het, as jou kinders jonk is, moet nie aan hulle beloftes maak wat jy nie nakom nie. Dit is vir hulle baie ontstellende en beslis nie reg nie. 

Moet aan niemand ‘n belofte maak wat jy nie kan nakom nie, dit is wat die Woord ons leer. 

Die probleem is dat ons soms so hard probeer om mense te plesier dat ons links en regs beloftes maak, terwyl ons nie die tyd het of die middele om daardie beloftes na te kom nie. Ons wil net goed lyk in die mens se oë. Op die einde doen jy baie meer skade as jy daardie belofte nie nakom nie.

Leer om ‘nee’ te sê as jy werklik nie kan nie.

Matteus 5

Die aflê van 'n eed

33“Verder het julle gehoor dat daar van die ou tyd af aan die mense gesê is: ‘Jy mag nie jou eed verbreek nie, en 'n eed in die Naam van die Here moet jy nakom.’

34Maar Ek sê vir julle: Moet glad nie 'n eed aflê nie, nie by die hemel nie, want dit is die troon van God; 35nie by die aarde nie, want dit is die rusplek vir sy voete; nie by Jerusalem nie, want dit is die stad van die groot Koning.

36Jy moet ook nie jou kop op die spel plaas as jy 'n eed aflê nie, want jy kan nie een haar wit of swart maak nie.

37Laat julle ‘ja’ eenvoudig ‘ja’ wees en julle ‘nee’, ‘nee’. Wat meer gesê word as dit, kom van die Bose.”

Hierdie gedeelte het my laat terug dink aan daardie gesegde wat ons almal ken: ‘ek sit my kop op ‘n blok’. Ek wonder hoeveel van ons sal nog koppe gehad het as ons koppe moes rol wanneer ons nie ons beloftes kon nakom nie?

Dieselfde geld vir daardie stukkie wat altyd so aangelas word by ‘n belofte: ‘ek sweer op die Bybel’. Hier bo is die Woord baie duidelik dat ‘n belofte net ‘n ja of ‘n nee hoef te wees en wat ook al bykom is verkeerd en heel onnodig. As jou woord jou eer is is dit al wat nodig is.

As jou kind nie mag TV kyk ‘n sekere tyd van die dag nie, moet asseblief hom of haar nie verwar deur een dag in te gee op hul gesanik om wel TV te kyk daardie tyd nie. As dit nee is is dit nee elke dag, daar is nie uitsonderings nie.

Of is dit so: vandag mag jy nie vloek nie my kind, maar môre is dit okei? 

Jesus se woorde staan vas, jou nee moet jou nee wees en jou ja jou ja.

Kom ons gaan leef as mense met integriteit. Wees eerlik met jouself en met ander. As jy nie kan nie, is dit nee. As jy kan, is dit ja.

Leë beloftes is sonde ...